某日返到公司，無啦啦有個新同事返工，態度一般，感覺冇乜禮貌，好想問Manager點解會請啲咁嘅人，當時佢做嘢得唔得就未知，不過款頭就一定唔掂，成個人無厘神氣咁，好似咩都唔想做，以後真係合作到咩？
Manager：「呢位係Fernando，新嘅Assistant Manager，大家好好合作，一陣book咗位㗎喇，一齊食個Welcome lunch！」叫Fernando已經夠造作㗎啦，費蘭度托利斯呀？同埋咩係「新嘅Assistant Manager」，從來都冇呢個position，冇舊又何來有新呢？
趁住新同事去咗廁所，Manager就走埋嚟同大家講：「Fernando係老細個仔嚟㗎，醒定呀！特別係你呀Hugo，西口西面咁，寬容啲啦！」
我：「鬼知佢係老細個仔咩，唔早講！」
另一位同事Connie：「玩嘢呀？無端端請老細個仔入嚟我哋department？」
又有另一位同事Jessica：「咁大整蠱呀？今日我冇化妝仲要著牛仔褲，好似好唔尊重佢咁。」
Manager：「老細就真係唔尊重我喇，今朝未夠8點打嚟，話會安排個仔入嚟做，去我個部門學嘢喎，我早你哋一個鐘頭知道咋！」
其實我哋個department有鬼嘢學咩，喺度除咗OT，我完全學唔到其他技能，請問太子爺可以學到咩呢？
Welcome lunch嘅時候本來氣氛尷尬，無論我哋講咩都好，太子爺都好似冇乜興趣，直至……
Connie：「Hugo你聽晚係咪出嚟㗎？孖妹都出喎，而家女就好多呀，不過一條仔都冇。」
我：「梗係去啦，有大孖我就一定到。」
Jessica：「次次都係得你一條仔，之前仲話搞船P，全女班都唔知著泳衣畀邊個睇，搞笑就有份。」
太子Fernando：「船P我啱呀！Join埋得唔得？真係好多女？」
一講玩同埋女人，呢個太子爺即刻精神晒，終於見到佢挺直個身喇，原來有腰骨㗎！
Jessica：「Join埋囉，多條仔都好吖，不過唔知搞唔搞得成，有條女好鍾意格價，book嚟book去都未book到。」
Fernando：「你意思係book船？使咩book啫，我有架遊艇，隨時去都得啦！」
Connie：「真定假呀？」
咩真定假啫，Connie真係畀貧窮限制想像，人哋太子爺呀，你估同我哋一樣係平民咩，有架遊艇幾咁奇呀……不過有架遊艇又確實幾誇張，俗語有云輸在起跑線，總有人一出生已經喺終點。
精神晒嘅Fernando已經等唔切咩船P，第二日放工就跟我哋出咗去食飯飲嘢，有女在場果然變咗另一個人，都合理嘅，得個廿零歲仔，屋企又咁有錢，聽講老細淨係計香港都有幾層樓，未計海外物業，公司又keep住賺錢，仲要得Fernando一粒仔，遲早畀晒佢㗎啦，我係太子爺都只會關心吃喝玩樂，乜仲有嘢要煩㗎咩？
Fernando：「今晚盡情嗌嘢食，想飲咩酒隨便開，唔使同我慳。」一落到酒吧，太子爺已經土豪上身，唔使錢喎，個個都歡呼啦！
Connie同Jessica周不時會帶唔同女仔friend出嚟，但我只係鍾意孖妹裡面嘅大孖，佢有啲似吳美珩後生版，大家仲記唔記得邊個係吳美珩呀？每次講出嚟啲人就話：「《東張西望》吖嘛！」嗰個係吳幸美，我講緊吳美珩呀！
幸美又好，美珩又好，我淨係知道太子爺都睇中大孖，佢仲同我講：「有啲似吳幸美，我好鍾意呢種類型呀！」
我：「佢唔似吳幸美，吳幸美皮膚比較黑，佢似吳美珩呀！一樣係白白淨淨。」
Fernando：「邊個吳美珩？」
我叫佢自己google下，跟住太子爺都話好似，而佢不知誰是吳美珩，因為Fernando之前一直喺加拿大生活，近幾年先返香港，吳美珩都冇活躍於娛樂圈一段日子喇，佢唔知好正常嘅。
有乜嘢係比不幸更不幸？咪就係大孖似乎都對太子爺有意思囉！Fernando財大氣粗，當晚一行幾人食嘢唔係好貴，係咁開酒先至最貴，埋單三皮幾嘢，我哋一蚊都唔使出喎，我係女都濕啦！
除咗Connie、Jessica，同埋我之外，當晚其他女仔開頭並唔知Fernando咩料，純粹以為係我哋同事，臨走細孖仲講咗句：「你哋個friend好有錢喎，仲call Uber，早知痴車一齊走啦！」
Jessica：「你就call Uber，太子爺嚟㗎，嗰個係我哋公司嘅司機。」
雖然問題係出自細孖把口，但係大孖喺側邊聽到嗰陣嘴角上揚，含情脈脈咁望住Fernando個車尾，咁我就知道出事喇。
第二日我求其搵啲嘢講，讚Fernando好乖，飲完酒唔揸車識得搵司機接佢。
Fernando：「我都冇車牌！加拿大都係請私人司機，香港又考過，加拿大又考過，全部肥晒，是但啦唔考喇，請司機仲好，睇嗰日心情想坐咩車咪叫佢揸出嚟囉！」
我：「我有朋友都考咗3次先得，唔使灰心喎！」
Fernando：「我兩個地方加埋考咗10次呀！搞到想買跑車都唔得，司機坐完就得我坐，車唔到女，冇意思。」
廢柴二世祖！考10次車牌都考唔到……不過做人就係咁唔公平，有車牌嘅人冇錢買車，冇車牌嘅人屋企大把名車，仲有埋司機車出車入，唉！
Jessica：「其實Fernando都幾正吖，不拘小節，有錢仔都唔一定豪爽㗎，真係愈睇愈正。」講緊呢句說話嘅Jessica當日著住條超短裙返工，心口一定裝咗假狗，之前波平如鏡，而家突然漲卜卜，鬼影變幻球咩！
Connie：「收皮啦你，孖妹都話Fernando好正呀，而家想我哋再約食飯，你冇行㗎喇。」
Jessica：「超！孖妹得個樣之嘛！同埋姣囉！都冇內涵！」
難道Jessica覺得太子爺需要一個有內涵嘅女朋友？Fernando隨時連內涵個「涵」字都未識寫啦！佢內面就咸喇！因為Fernando見到有咁多女都好亢奮，第二日返嚟又問：「今晚仲出唔出？我有個私人會所可以食水煙，好正㗎，仲有得篤波！」
唔出？Connie同Jessica打個電話咋，佢哋啲friend聽到唔使錢任飲任食個個仆出嚟呀！聽講大孖誇張到請咗半日假返屋企換衫化妝。
Fernando：「仔要畀錢㗎喎，我淨係請女，Hugo你就唔使，因為你係我同事。」
被遺忘於角落嘅Manager聽到我哋講嘢都搭嘴：「我又去得唔得先，我都係你同事喎！」
Fernando：「你幾年出世㗎？」
Manager：「1977……」
Fernando：「1977老到甩牙喎！你唔好去啦，下次齋飲酒先預你，promise！」
你話Manager係咪自取其辱吖！不過咁都未算，本身當晚係要OT，Fernando一聲令下就叫我哋唔好再做公事，未夠6點已經拉大隊走。
Manager：「5:50咋喎，唔OT都算，坐到夠鐘先啦！」
Fernando：「得啦！有咩我會同Daddy講㗎喇，唔通早兩個字走會搞到公司執笠咩！」
識咗Fernando之後，最唔爽就係佢搶咗我個大孖，係呀！佢兩個一齊咗呀！我追咗大孖成年都得個桔，Fernando幾日就到手……我唯有從另一個角度去接受太子爺嘅出現啦，因為佢入嚟公司之後，我哋基本上冇再OT喇，晚晚放工都畀佢拉去飲飲食食，lunch又餐餐貴嘢，食足兩個幾鐘先返office，重點係一蚊都唔使我哋出，嗰段時間我真係儲多咗錢呀！（未完待續）