《太子爺》下 – 女同事用一晚時間變老闆娘

晚晚有太子爺照住,飲酒食飯唱K唔使錢,所以每次都一呼百應,而Fernando亦好快同大孖一齊,快到點?佢哋識咗都唔夠一個禮拜,大孖已經同佢喺出面過夜,親眼睇住佢兩個上車走,Fernando第二日仲冇返,電話都冇打過返嚟,咁又係嘅,佢使乜請假。

Manager一貫地無火,仲話反正冇嘢畀太子爺做,佢返唔返都冇所謂,Jessica仲嬲過Manager:「有冇搞錯呀?鍾意返就返,唔返就唔返,又完全冇交帶,咁佢聽日仲返唔返工㗎!離晒譜!」人哋老豆都冇理,你邊位呀?

講起佢老豆,即係我哋老細,有時耐唔耐都會行埋嚟問我哋覺得Fernando做成點,順便睇下個仔,我最收斂㗎喇,淨係一句:「幾好呀!」

Connie:「Ok呀,佢好nice㗎,成日請我哋食飯,好照顧同事。」問你做嘢做成點呀,關食飯咩事呀?

Manager:「佢好有potential呀,又肯幫同事,叻仔嚟㗎!我睇好佢!」Over咗啦!你個良心喺邊呀?

Jessica可能條氣最唔順,冇畀意見,但係Fernando反應最大。

Fernando:「行開啦!咪阻住我哋做嘢。」咁講嘢都得?間公司你老豆㗎喎…..老細又好似慣咗咁,明顯寵壞晒㗎喇。

不過我都見過Fernando對佢老豆有好態度嘅時候,嗰日仲Daddy前Daddy後,罕有地唔同我哋食兩個鐘頭lunch,走咗去同老豆飲茶,點知Fernando食完lunch已經同我講:「而家隊曼聯咁廢嘅?頂佢個肺,我上星期輸咗30個。」

我:「30個咩?」聽到數字,聽到量詞,聽唔到名詞嘅喂~~

Fernando:「30萬呀!要扮孝順仔同隻死老嘢飲茶先搞得掂,麻Q煩!」

聽返太子爺講,佢呢30萬係一個星期之內輸嘅數,犀利!我年薪都係得325,000,呢條數仲未扣MPF,換言之Fernando只係用咗一個星期就輸咗我一年嘅人工。

過多幾日啲錢到手,Fernando又故態復萌,仲比起之前更早執袋離開公司,佢對住我哋成日叫老細做「死老嘢」,仲講過第日等「死老嘢」退休就會賣咗間公司,拎住啲錢周圍嘆世界。

我:「你真係好乖仔,咪講笑啦,一陣畀老細聽到呀!」

Fernando:「聽到咪聽到囉,佢得我一粒仔,公司、物業、錢,唔留畀我唔通捐畀慈善機構呀?我又唔信呀!」

Connie:「我唔理呀,一日你喺度做,一日都要照我茶煙飯。」

Jessica:「咁你老豆留咁多嘢畀你呢個仔,你冇諗過第日留返啲嘢畀你自己個仔㗎?」

Fernando:「生仔?傻的嗎,我先唔會要小朋友囉!湊仔不如打機好過啦!」

我真係替老細傷心,個仔成日叫佢死老嘢,又話等佢退休要賣咗間公司,而且不學無術,如果生咗個咁嘅仔,我都認同Fernando所講,唔生好過生。

不過做人呢,有啲嘢唔好講得咁肯定,通常話想第日個女朋友長髮大波,將來就會同個肥婆冇波一齊;通常話唔鍾意光頭肥佬,將來個老公就係光頭肥佬;通常話唔想要小朋友,將來就會係識得嘅人裡面第一個做人父母……大約8個月後,Fernando真係做咗爸爸,不過媽媽唔係大孖,原來佢哋散咗都冇人知。

Jessica:「畀定個心理準備你同Connie先,下星期我派帖。」

我:「恭喜晒喎,你有男朋友㗎咩?之前唔帶出嚟嘅?」

Connie:「死八婆吖!收得咁埋嘅,做咩結得咁急呀?之前冇聽你提過嘅,有咗呀?」

Jessica:「係呀,早幾日check完,有咗,我就嚟同Fernando結婚。」

Connie:「Fernando?太子爺Fernando?」

冇錯係好突然,但仲有邊個會叫Fernando咁扮嘢吖,唔通係Fernando Torres咩!

我唔敢再問落去喇,反而係Jessica自己講,佢話之前都唔係同Fernando一齊,只係有一晚又係出去玩,飲大咗,搞咗,月經又冇嚟三個月,原來真係一擊即中,世事係咪好好笑呢?通常想生BB嘅人係計晒數都冇著落,反而ONS嘅命中率就高成咁,劇情永遠都係咁。

我私底下問Connie:「你有冇反悔頭先叫Jessica做死八婆?未來老闆娘喎!」

Connie:「個心係涼咗下,而家坐喺隔籬嗰個係未來老闆娘,我應該用咩心態返工呀?」

呢個問題原來唔使煩,因為Jessica派完帖就唔使再返工喇,專心養胎喎!仲搬埋去Fernando屋企住,正式進駐豪門,有次仲打視像電話畀我話間屋好大,又示範要用walkie talkie叫工人做嘢喎,威喇威喇。

擺酒當晚Jessica笑到四萬咁口,相反地,Fernando就繼續死老豆咁款,咁當然啦,佢老豆未死,仲生勾勾出席婚禮,睇得出仲幾開心,可能係因為就嚟有孫抱啩,Fernando同我講過:「隻死老嘢要未見肚前嗱嗱聲擺酒喎,唔想多說話聽。」

可能大家都係男人,其實Fernando私下仲有同我講,「一擊即中」當晚佢一啲印象都冇,一起身就見到Jessica光脫脫喺隔籬。

我:「以你嘅性格冇理由唔即刻著衫走㗎喎,唔似你嘅人設。」

Fernando:「佢光脫脫喺隔籬唔係瞓咗,係望住我係咁篤我個鼻,我係畀佢篤醒,然後嚇親,佢第一句同我講嘅說話係『幫你整黑頭好唔好呀?』痴線!跟住佢就當正自己係我女朋友,你唔見我呢幾個月冇叫你哋出去玩咩,因為我日日畀佢煩呀!冇幾耐就話有咗要我負責。」

我有理由相信,Jessica喺Fernando嚟咗公司做之後,已經上過連登開post問:「老細個仔入咗嚟做我同事,點部署?」因為諗返都覺得有啲怪,當日Fernando同大孖一齊,Jessica好似仲唔開心過我,後來Fernando話要賣咗間公司,唔想生仔亦唔會留任何嘢畀個仔,Jessica仲嬲爆爆……好恐怖呀!

佢兩個結婚之後,Fernando有好大轉變,而家調咗去另一個department,有時行過會見到佢好認真做緊嘢,唔會再食兩個鐘頭lunch,唔會再約我哋去飲飲食食,唔會未夠6點就放工走,有次OT到8點仲要見到佢做緊嘢,睇嚟一個男人有咗家庭就會定性嘅講法係真。

不過呢個結局都唔錯吖,Jessica求仁得仁,一晚時間就化身老闆娘,而家唔使做啦!Fernando又生性,老細有孫抱,而且代替Jessica嗰位新同事仲幾做得嘢,變相減輕咗我同Connie嘅工作量,仲要係靚女,我晚晚同佢WhatsApp,戀人未滿曖昧中,呢個連鎖效應都幾大。

error: