「Sor，遲咗放工，而家搭的士趕嚟，係咪好爆先？有冇留枱畀我㗎？」女朋友個阿哥開咗間餐廳，試業完之後正式營業，應承咗會去支持，偏偏上司臨放工先嗌開會，搞到7點先走得，我都唔想飛的咁奢侈，不過驚女朋友嬲。
「爆乜鬼吖，人影都冇隻，你嚟到直頭包場都得呀，阿哥心情麻麻地呀！」女朋友故意壓低聲線描述餐廳實時現況，明顯係驚佢阿哥聽到，乜咁大鑊呀？我女朋友都有夾少少，算係細股東，正式開張第二日就咁嘅局面？
去到餐廳嘅時候我都嚇一跳，嗰陣已經7:30，明明係晚飯時間，點解可以得一枱客㗎？
同女朋友阿哥打咗聲招呼，然後就隨便坐低咗，我細細聲同女朋友講：「可能呢頭啲街坊未知係咩料，個個唔敢入嚟試，想觀望下先啫，你睇，都有一枱客吖！」
女友：「嗰枱係老豆啲friend嚟㗎，老豆仲叫我哋唔好收錢，全部入佢數喎，咁咪一樣，老豆啲錢都係我同阿哥畀佢嘅家用之嘛！」
其實我講嗰句說話都係違背良心，通常啲人係新屎坑三日香，就係見你新先至會走去試，但係而家都咁樣，係咪選址有問題呢？不過我行過嚟嗰陣，見到附近幾間食肆都爆到要排隊喎！
講裝修，女友阿哥呢間餐廳應該係最好，起碼夠新吖嘛！味道就唔敢比較，始終我冇試過附近嘅餐廳。
我：「有冇上過OpenRice嗰啲呀？隔籬啲食肆口碑好好？你哋之前唔係話有做過research㗎咩？定係價錢差好遠呀？定價太高？」
女朋友：「唔係囉，我哋同隔籬幾間差唔多價錢咋，如果你講口碑，嗰幾間都係麻麻地，最新幾個留言仲係咁鬧好細碟，又話侍應服務態度好差，肯定唔係嗰啲招牌人氣店，更何況啲人都要試下我哋舖頭好唔好食先有得比較吖，而家人影都冇隻喎，煮成點都冇人知啦！」
又係，試都未有人試，上食評網站都冇評價啦！傾傾下女友阿哥拎咗碗湯麵同埋一碟餸過嚟，佢真係算好樂觀㗎喇，仲識得笑同埋招呼我，又同我寒暄咗幾句，講笑咁話可能餐廳裝修得太靚，住宅區啲人唔多buy。
都唔知可以講咩好，我唯有安慰幾句，再低頭默默食嘢，啲食物完全冇問題喎，坦白講比起我想像中好食，如果開喺公司附近肯定日日幫襯，正當我想同女友讚幾句嘅時候，抬起頭嗰下好似去咗另一個場景，咩料呀？咁多人嘅，頭先得一張枱有人，而家得返一張枱係冇人。
望多幾眼，連僅餘嗰張枱都full埋，門口仲有一家四口等緊，咦喂，迴光返照定係海市蜃樓，7月14又過咗吖，我食咗幾啖麵啫，再昂高頭點解好似進入咗二次元咁？
結果我急急腳食完走人，因為想騰空埋我坐緊張枱畀佢哋做生意，女朋友由於幫手做埋侍應嗰份，所以臨尾只可以同佢匆匆道別，夜晚再同佢傾電話時都覺得好神奇。
女朋友：「原來呢頭啲人慣咗8點之後先出去食飯，阿哥後尾開心返晒喇，初時我哋幾驚呀！」
我：「根本就係我旺場，未嚟之前得一枱客，你睇下我嚟咗之後，仲唔讚下我。」
女朋友：「一定關你事啦！你當自己係招財貓呀？」
好普通嘅一段情侶吹水對話，冇諗過之後會變成認真討論嘅議題，因為緊接落嚟嘅第二晚、第三晚、第四晚，間餐廳又回復拍烏蠅嘅狀態，一切又返到最初嘅循環，我同女友講放工去撐場，今次想自己科水真金白銀支持下（上次佢哋冇收我錢），然後我又OT，呢鑊搞到8點幾先去到餐廳，結果一枱客都冇。
抵達餐廳之後，女朋友無厘神氣，佢阿哥就好愁咁同我講：「係咪有人食完上網講好難食呢？冇理由吖！你老老實實答我係咪唔好食？我想檢討下。」
我：「嗱，唔係因為你係瑩瑩阿哥，我先至盲目讚你，我覺得上次碗拉麵好正喎，湯底又夠濃，就算你話唔係最好食，但都一定唔係難食，冇理由完全冇客。」瑩瑩即係我女朋友。
女友阿哥：「就係咁先奇怪，唉！食咩呀？今晚我請，陪我飲酒傾計。」
呢次我叫小菜加碗白飯，仲有個湯，味道確實冇問題，咁究竟間餐廳咩問題呢？當我食咗幾啖之後，一樣嘅劇情又再度上演，一枱、兩枱、三枱、四枱，開始愈嚟愈多客入座，當時都已經9點幾，啲人唔係一下子湧入嚟，係慢慢累積，逐個逐個，直至爆場，再去到門口有人等位。
女朋友：「原來你真係一隻招財貓嚟喎，兩次爆場都係你嚟咗之後。」
我：「你記唔記得有次我哋去名古屋旅行，有間喫茶店又係完全冇客，個侍應直頭畀張6人枱我同你坐，隔咗陣就愈嚟愈多人，多到出面啲客要留電話登記，我哋本身想讓返張6人枱出嚟，不過日本啲侍應太有禮貌，堅持唔使我哋轉枱，叫我哋放心慢慢坐。」
女朋友：「記得呀！你又記唔記得有一次我同你去法國，間餐廳又係吉晒，點知我同你坐底叫完嘢食之後，個場突然愈嚟愈多人，隔籬枱仲要講廣東話，搞到你好掃興。」
女友阿哥聽到之後就搭嘴：「咁你男朋友真係招財貓，好旺喎，不如咁吖未來妹夫，你晚晚嚟坐，我畀返人工你，$100蚊一粒鐘，再免費提供晚餐，我都想睇下你係咪咁旺。」
我：「咁又唔使講錢，有免費餐食已經好好喇，為咗瑩瑩，我又好甘心去做招財貓嘅，不過晚晚嚟就有難度，始終份工困身，個上司又痴根，總之我一得閒就落嚟啦！」
如是者，大家講笑完咗呢個topic，而最邪嘅係，每次冇我嘅日子，餐廳總係冷冷清清，雖不致於好似初期咁一枱客都冇，但就真係生意淡薄，相反地，只要我光臨，半個鐘內例必爆場。
連續幾次都係咁之後，有一晚女朋友阿哥現兜兜拎住$1000蚊過嚟：「喂，真心，幫幫手，唔知點解有你喺度真係特別旺，呢$1000蚊心意心意，多啲落嚟好唔好？」
原來「招財貓」呢單嘢畀女友個阿爸知道咗，當晚世伯又喺度，結果佢阿爸就行埋嚟加把口：「超！$1000蚊咁少？有冇搞錯呀你？我同Uncle Timmy講過呀，佢話自己間雞煲呢排冇晒客，唔信你咁旺喎，仲話如果你去到真係爆場，佢畀$2000蚊利是你！」
我：「$2000蚊？真定假呀？但係Uncle Timmy係邊位？」
世伯：「Uncle Timmy咪我老友囉，識咗30年都有喇，佢睇住阿俊（即係女友阿哥）同阿瑩大，你同我去一次佢間雞煲啦，屈佢請返餐都好吖嘛！」
女友阿哥：「Uncle Timmy好有錢㗎，雞煲執咗都冇所謂啦，不過佢講得出畀$2000蚊利是你，以佢嘅性格就一定畀。」
車！我又冇成本嘅，去咪去囉，點知我原來真係有招財貓呢種超能力，已經揀星期一過去，嗰個Uncle Timmy間雞煲竟然愈嚟愈多人，爆唔到場，不過我坐低之後就坐到8成客，佢唔止守承諾畀$2000蚊我，仲話有幾個世叔伯都要我幫手，總之一定會畀錢，現金即出糧……（未完待續）