見咗份工遇到個好奇怪嘅HR，奇怪到我都唔想打其他嘢，直接入正題，interview嘅時候對方問我：「你屋企有幾多兄弟姊妹？佢哋而家有冇做緊嘢？父母呢？爸爸媽媽仲有冇做嘢㗎？介唔介意講下佢哋做緊咩工作？」
其實我介意呀！不過作為今次interview第一個問題，我有諗過HR咁問係咪有咩後續同玄機，反正我鍾意答咩都得，咁咪同佢吹兩句囉：「得一個細妹讀緊書，阿爸做司機，阿媽係全職主婦，你仲有冇咩想知？」
HR：「Ok……咁你平時有咩興趣？」
？？？？？我係女，個HR係女，佢問我有咩興趣，應該唔係對我有興趣，不過你知而家啲公司古靈精怪，可能佢想知我嘅嗜好係咪合群，適唔適合喺度返工啩！
我：「我鍾意打羽毛球同埋睇書。」
HR：「Ok……咁你而家睇緊咩書？」
？？？？？睇緊咩書都要問？
我：「我咩都睇，八卦雜誌又睇，咩小說都睇。」
HR：「Ok……我見到你填single，即係未婚，咁有冇男朋友？有冇打算幾時結婚或者幾時生BB？」
聽到呢度我就有啲著著地，首先佢每次問問題前都會講Ok然後拉長，真係好un耳，O咩k啫？同埋呢條問題我理解，你都係驚我請婚假同埋請分娩假係咪？如果唔係你問嚟做咩？想介紹條仔畀我結婚？
我：「冇男朋友，不過呢條問題有啲私人喎！」
HR：「Ok……你可唔可以講3個自己嘅缺點？」佢又拉長音講ok，好討厭，而且佢ignore咗我話覺得啲問題太私人。
我：「3個缺點？勤力、上心、有責任感。」你玩嘢吖嘛，即係冇速度，唔夠快，跑得慢，我就睇你係咪機械人式咁樣回應我。
HR：「Ok……但係呢啲唔係優點嚟咩？」
我：「我覺得係缺點呀，因為打份工太上心太勤力太有責任感未必係好事，唔係咩？」
HR：「Ok……都啱，另外想問下你上一份工點解辭職？」
咪寫咗囉盲亨！Resume有打，上嚟填form你有個欄又要再填，而家又用口問多次！
我：「因為冇晉升機會，我覺得做落去冇咩前景，未來幾年相信都會一樣，我希望有啲突破。」
HR：「Ok……就係咁所以辭職？會唔會有其他原因？你同之前啲同事做嘢夾唔夾㗎？」
可能係我小人之心，又或者係我對呢個HR（再從而對呢間公司）嘅感覺已經好差，我意識到嘅係佢想捉我錯處，想喺我上一份工辭職嘅理由裡面搵到負面嘢，跟住再發大去追問，但其實呢個真係我resign再搵新工嘅原因。
我：「我同同事相處冇問題喎，每個人諗法都唔同，可能你會想hea住做，但我唔想30歲呢啲黃金年齡咁hea，我會睇埋公司前景。」
好明顯，個HR係完全感覺唔到我寸緊佢，之後佢仲問咗一兩條勁廢嘅問題，廢到我都覺得寫出嚟浪費時間，總之我已經完全對呢份工失去興趣。
最重要嘅環節終於嚟喇，個HR問我：「咁你有冇咩問題想問返我？」等你咁講好耐啦！
我：「我想問你公司點解成日請人嘅？因為apply呢份工之前，我都有keep住睇招聘網，幾乎每個月都會見到你哋登廣告，雖然好多職位都唔同部門，但又真係成日有人走，其實之前啲人點解會走㗎？做得唔開心呀？我個position呢？之前個人點解走？」
面對我一連串嘅提問，呢位HR終於唔係用「Ok」做句子開場，我見到佢面有難色，如果佢夠膽講呢啲嘢唔關我事，我就會問返佢：咁我老豆老母返咩工又關你乜事？
HR：「呢層……之前個同事因為搵到工，所以辭職。」你不如答得再廢啲！
我：「我知佢搵到工，我意思係點解做得好地地要搵工？係咪做得唔開心定係點？」
HR：「佢冇話自己做得唔開心。」
我：「冇話做得唔開心，但又搵工？」
HR：「咁同事做得耐想轉換新環境都正常嘅。」
我：「正常？你信佢想轉換新環境呀？咁你又唔信我上一份工係冇晉升機會嘅？」
呢個HR真係好柒蠢，我估佢嚟到呢part終於feel到我唔多友善，不過我嘅唔友善，都係因為你問啲侵犯私隱，又試圖發掘負面嘢嘅問題而開始，來吧！來互相傷害吧！你叫得我問問題，我都唔會問廢嘢，擺明係要令到你尷尬。
HR問我嗰堆問題，我認為好多都不必要，而且同份工無關，例如我睇咩書同埋我家人返咩工，至於離職原因就係應該問嘅，呢個都係HR嘅職責，但你抱住懷疑心態去問，即係我答咩都冇用，咁你嘅動機就唔夠單純，我係咪太躁呢？不過佢成個interview過程的確令我好反感。