我哋公司今日開工，Admin放假前已提醒咗大家2月15號初六要準時9點返嚟，因為老細例牌會搵佢個御用風水師搞拜神儀式，然後噚晚2月14號，Admin又透過WhatsApp group再remind多次所有同事，強調唔可以錯過吉時返工，你話幾咁大陣仗。
拜神儀式喺公司門口進行，搞到同一層樓返工嘅人都眼望望，保安仲上咗嚟干涉幾句，最後老細用咗封利是打發佢走，個師傅又準備咗啲發糕、糖果、蠟燭、酒、生果、綁咗紅紙嘅白蘿蔔，佢話財神鍾意食甜嘢，以上拜神物品可以利市同埋增加財運，唔知你信唔信，但老細就好信。
我條team有個新人為咗迎合，竟然隱瞞自己嘅宗教信仰，強調下先，雖然佢係新人，但新嘅意思係入咗嚟做兩個月，講年紀佢已經三十幾，唔係fresh grad，呢位新同事每隔一兩個星期都會嗌我返佢間教會（我冇理佢），所以我先知佢係基督徒。
我：「返教會可以拜神㗎咩？我唔熟呢啲呀，但應該唔得㗎喎！」
「唔得㗎！咁我未過試用期，廢事搞突出啦！入鄉隨俗跟大隊一齊拜囉！」
我：「Admin問過有冇人因為宗教信仰唔拜得，你照直講咪得囉！」
「佢哋都唔知我係基督徒，唔想影響老細對我嘅印象分吖嘛！」
雖然我係無神論，冇任何宗教信仰，不過作為基督徒都走去拜神，似乎有啲唔妥當，更何況佢只係一個入咗嚟做兩個月嘅新人，坦白講老細都未必認得佢，Who Cares？搵食啫！我又唔信話自己信耶穌唔拜得神會畀人炒，如果真係咁，你告返老細轉頭都得啦！
師傅畀咗張紙老細，話上面有段禱文要照住讀：「恭請五路財神蒞臨，我哋係XXX公司，公司地址係XXXXXXX，今日2月15號，開工吉日，我喺度帶領全體員工，誠心誠意獻上供品，祈求新一年得到五路財神襄助，等我哋公司可以事業興隆、財源廣進！」
因為我已經喺呢間公司做咗6年有多，每年都會經歷一次呢個開工拜神儀式，第一年覺得好迷信，仲有啲恐怖感，但之後就習慣咗喇，仲會覺得啲禱文內容幾funny，要朗讀埋公司地址喎！
其實往年冇喺門口拜㗎，純粹喺office裡面搞，係今年師傅話要走出嚟正門口做儀式。有一年疫情，公司蝕咗好多錢，師傅咁樣同我哋講：「好在你哋老細有拜神咋！財神已經將公司蝕嘅錢減到最少，疫情邊間公司唔蝕錢呀？如果連呢啲儀式都唔跟，分分鐘執埋添呀！」
老細覺得好有道理，真係信不信由你，不過今日的確有同事冇參與拜神，唔關宗教信仰事，係關月經事……
師傅：「有冇女同事生理期？」
女同事個個你眼望我眼，男同事又望住女同事啲眼……
見大家遲遲未答，風水師再講得更白：「即係月經，嚟M呀！嗱！嚟M唔好拜呀下！自己行埋一邊，誠心就得㗎喇！」
唔係唔明呀師傳，係尷尬呀！即係要當住全公司面前話畀人聽自己嚟M，個個同事都熟咩，難為情㗎！往年拜神冇問呢啲㗎喎，今年又加多咗新元素？
結果有6至7個女同事舉手話自己月經，齊齊行埋一邊，你睇下，拜個神啫，嚟M都要公開匯報，全公司都知你幾時period……
師傅：「一陣啲香插完呢，我會幫你哋處理㗎喇，因為太大煙怕燻到個灑水系統，不過最緊要係一件事，各位唔可以用自己嘅慣用手上香，我諗大部分人都係用開右手㗎啦，咁你就要用左手插，用開左手嘅，咁就用右手插喇！」
拜個神都幾多學問同禁忌，然後我見到嗰位基督徒新同事用右手插香。
我：「你左手㗎咩？」
「我右呀，始終我係教徒，如果聽晒師傅講，好似背叛咗自己個宗教信仰，咪特登用返慣用手囉！」
……我唔知呢個「自我救贖」嘅方法係點諗出嚟，唔理左手定右手，你拜神已經背叛咗啦，點知拜神又犯埋禁忌，即係兩頭唔到岸，一陣穌哥唔理你，財神又唔照你，咁咪仲衰多二錢重。