「初五可唔可以送花畀我呀？」女同事April放年假前突然向我講句咁嘅嘢，你話嚇唔嚇死！本能反應諗都冇諗即刻問返佢：「點解初五要送花畀你？」呢個April又真係好意思答：「今年年初五係2月14號，情人節呀！我哋公司又咁啱初五開工。」
我：「2月14係情人節我知，初五開工我都知，我係唔知點解要送花畀你啫！」我結咗婚有老婆㗎喇，唔好搞呢啲嘢啦！又唔係靚，出軌都唔會搵你啦！當然呢幾句只係我內心對白冇講出口，反而好奇點解叫我送花佢會問得出口。
April：「一紮花之嘛！街市嗰啲平平地都得㗎！我哋公司好多女同事年年情人節都收到花，就算係疊住假期或者星期六日，之後都會有人照送嚟office，呢度得幾個上咗年紀嘅女同事冇花咋！嚟啦！冇花收好瘀㗎！最多之後請返你放工飲嘢啦！」
我：「放工飲嘢？我屋企有水飲喎！其實你仲有一個option，就係自己買花送畀自己，唔使怕穿煲㗎！而家可以網上訂花㗎喇，唔需要walk in，你order間舖頭寫To April，From彭于晏都冇問題，加埋I Love You又得，online畀錢好方便。」
可能我太mean，April聽完就行開咗，我承認當時係有少少忟憎，唔係因為平時熟唔熟或者我結咗婚，而係你無端端叫我出錢送紮花，畀你情人節喺office可以show off，即係當我羊牯呀？我啲錢點解唔用喺自己老婆身上呀？同埋你仲有冇其他目的先？例如係咪想營造畀其他同事睇，覺得我對你有意思……總之April咁樣問，我嘅整體感覺就係搵緊我笨柒。
不過後來我知道自己係錯，原來April唔止開口叫我一個送花，因為有另一個叫Eddy嘅男同事都畀佢問過，結果梗係拒絕啦！
然後今日返到公司，April真係收到紮花，我認得個包裝，加埋花帶上面大大隻字印住Agnes b，未結婚前我都送過畀老婆，以經驗嚟睇，呢個size一定要4位數，難道佢諗通咗，真係自己上網order紮花送嚟公司？
公司有幾位同事圍埋去話紮花好靚，又問April係咪男朋友送，我都衝過去湊熱鬧，聽下你個故事作成點先！
April：「唔好問啦！IT個阿Joe送㗎！」
痴線！你上一句叫人唔好問，下一句就開個同事名，IT個阿Joe長期匿喺自己部門，淨係有人部機hang咗先出嚟嗌人restart，從未見過April同阿Joe交談，點會送花畀你呀？
我又走去IT嗰邊搵阿Joe問個明白，原來另一位畀April要求過送花嘅男同事Eddy已經喺佢隔籬，呢單嘢真係April主動開口叫阿Joe訂花，再安排情人節送上嚟公司。
我：「點解你要應承April呢？佢又唔係你條女！」
IT Joe：「咁佢都好慘嘅，公司好多女同事都有花收，得佢一個冇，仲要主動開口問，唔送好似唔好意思。」
Eddy：「咁你都唔使送紮咁大咁靚啩？幾錢呀？」
我搶答：「Agnes b嚟㗎，呢紮肯定4位數！」
IT Joe：「一千五百幾囉！April話普普通通送幾百蚊嗰啲都得，不過算啦，反正都係送，好睇啲囉！」
Eddy：「一句講晒，On9！」大家同事，講嘢又唔使咁不留情面嘅，阿Joe始終係IT，平時部腦有咩頭暈身㷫都要求佢幫手㗎！係咪想佢次次都restart就算呀……
我：「老老實實，你係咪想溝April先？」
IT Joe：「梗係唔係啦！我有女朋友㗎！純粹覺得April好可憐，情人節要開口叫人送花。」
真係無言，April可憐？IT Joe你條女可憐啲喎！情人節個男朋友送花畀另一個女仔充撐場面，仲要送紮千五蚊嘅Agnes b……
Eddy：「條女知唔知你送花畀女同事？」
IT Joe：「唔知啦！死人㗎！情人節我都冇買禮物畀條女，唔知買乜好，淨係今晚出去食飯咋！」
Ok！Confirm咗喇！成件事最可憐真係IT Joe條女。
唔好意思，情人節咁講可能得罪好多人，不過我覺得呢啲節日送花真係商家佬生意gimmick，當然應下節送花冇問題，氹下另一半開心係好事，但唔明點解有啲人會好似April咁，視有冇花收為女性之間嘅面子之爭。
其實愛一個人唔使咁表面嘅，情人節冇花收唔代表冇仔，亦唔代表冇人錫，時代唔同㗎喇，就好似以前嗰代啲男人咁，覺得有隻勞力士係成功象徵，發展到今時今日，勞力士有得分期供款，戴得最多就係做倫敦金嗰班MK，所以幸福同埋富有唔使曬出嚟嘅，自己知咪得囉！