同事辭職後被上司留難，可能係經常出現嘅情節，我記得你《辦公室日報》都有類似嘅投稿，不過我呢個同事就真係好狠，將我哋上司張枱啲嘢掃晒落地，連notebook都掟，最終唔使賠錢仲有得提早離職，示範咗一次辭咗職嘅人先至係最惡，最大無畏。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
咁就話說呢個同事叫Bowie，男仔嚟嘅，其實佢同上司一直都唔係好啱，大家面和心不和嗰種，上司覺得Bowie唔聽話，做嘢太有自己性格，而Bowie亦覺得上司好苛刻，而且鍾意監管同猜度同事，其實呢個亦係Bowie立定決心轉工嘅原因。
誰對誰錯好難三言兩語講清楚，合則來不合則去，Bowie既然都遞信辭職，呢個結局就最好啦，一個有新工作，一個就除去眼中釘，大家唔使再日對夜對，舒服晒！點知我哋上司好似想執個尾彩，臨尾一個月頻頻搞埋好多小動作玩針對，呢下就焫着咗Bowie喇！
我哋Sales Team一直以嚟都係出去見完客就直接放工，但上司就要求Bowie最後一個月見完客要返嚟打卡，其實咁樣就有啲唔公平，你一係全部要打，一係全部唔使打，特別針對Bowie就有啲小家，同埋你都預咗當事人會有hard feeling，大家都成年人啦，何必做埋啲小學雞嘢呢？
咁都未算，上司喺Bowie最後一個月嘅時候，特登畀啲山旮旯嘅客佢見，包括長洲、西貢、石門等等，全部都係距離我哋公司好遠，總之唔就腳嗰堆，而呢啲客都係冇生意冇potential，正常嚟講email或者電話聯絡已經足夠，上司就係都要Bowie親自入去派Catalog，指定要佢食完lunch先出發，再要佢返公司打卡先准走。
我個人覺得呢班都係「死客」，去唔去都冇分別，但上司要咁樣做亦擺明係玩嘢，應該係覺得就算Bowie喺呢堆客面前講公司壞話都冇所謂，反正長洲、西貢、石門嗰堆都冇生意返。
上司仲要每日嗌外賣然後叫Bowie去拎，佢話外賣自取平啲，反正Bowie遞完信唔需要處理太多文書工作，有時間就不如幫大家去拎飯盒喎！其實呢個行為比起叫Bowie去山旮旯派Catalog更幼稚，不過心理變態呢啲嘢冇得解，佢係要咁樣勞役人都冇辨法。
Bowie最初嗰幾日都係沉住氣完成一切工作，但係上司有次叫佢去離島派Catalog嘅時候就講咗句：「你去到問人拎卡片，同埋影張相，證明你真係去過，我點知你係咪扮去咗然後夠鐘返公司打卡呀？」
真係有需要咁做咩？用人不疑，疑人不用，何況Bowie都辭咗職啦！
有時人嘅憤怒真係一剎那，Bowie聽完上司咁講之後，突然發脾氣掃跌晒上司張枱啲嘢，本身部notebook冇事（可能重），但Bowie再拎起掟落地，即刻見到個Mon爆咗，我嗰下直頭驚Bowie會出手打人，不過佢冇。
上司：「喂，你想點呀？我覆緊email嘢㗎！」笑死，Mon都爆埋，邊個理你覆緊email呀？我估上司都係因為事出突然，冇諗過Bowie會做啲咁激進嘅行為，所以都有啲語無倫次。
Bowie：「你玩嘢吖嘛！」
上司：「咁即係點呀？你唔好喺度搞事。」我覺得上司係輸咗氣勢，好典型嗰種挑起事端，然後對方發火就即刻淆底嘅感覺。
Bowie：「我唔怕搞大件事呀，橫掂辭咗職，我而家都係倒數，你要留低喺度繼續做先至最瘀，有排畀人講，我有咩所謂？」
鬼殺咁嘈，又掃跌嘢又掟notebook，結果引嚟一個高層開聲做和事佬，Bowie返埋位坐低，個高層嗌咗上司入房唔知傾咩，然後HR個阿姐亦走埋嚟搵Bowie傾，後來公司決定畀Bowie提早離職，即時可以執嘢走，但又唔算炒，佢哋係傾掂數。
聽返知情人士講，高層驚Bowie，所以勸佢提早走，條件係雙方都唔需要賠錢，大家即時終止僱傭關係，部notebook都唔使賠，咁究竟炒Bowie再叫佢賠機抵啲，定係雙方協議互不追究再提前結束賓主關係著數啲呢？呢條數我就真係唔識計，但聽講HR都有畀Bowie一封離職證明信件，裡面只係簡單列咗Bowie幾時入職，做咩position，last day係幾時，評語就冇喇，不過總算將來可以當reference letter用嘅。
我個人覺得Bowie最後嘅行為確實激進咗，雖然上司係過份，做咗啲嘢去針對佢，但Bowie掟notebook時係唔知高層會點處理，而家冇事就梗係好啦，一陣要追究可能會好麻煩。
而上司啲舉動亦真係太小學雞喇，仲跟你搵食就話要睇你面色啫，信都遞埋，梗係辭咗職嗰個最惡啦！第一日出嚟做嘢咩，嗰啲delete晒公司file嘅例子都見唔少，好嚟好去唔需要私怨啦，大家都係打份工，啱就做，唔啱咪let it go囉！(完）