今日紅雨落狗屎，不過一早就約咗見工，冇辦法，而其實我已經有一個Offer，新job會喺六月中返工，咁既然send出去嘅CV有回音咪見埋囉，話唔定會有驚喜呢，作為一個求職者嘅身份，有得揀永遠係好事，有比較先至可以分到高低。
可惜上到去呢間公司冇幾耐，我已經覺得自己浪費緊時間，因為有個等緊見工嘅女仔無啦啦情緒激動發脾氣，指住個receptionist嚟鬧：「有冇搞錯呀！我今朝9點3上到嚟，而家12:00都未有得見！喺度坐咗差唔多3個鐘喇！」
Receptionist重複咁叫佢耐心等，話負責interview嗰位同事仲開緊會，又指住另外3個坐咗喺度嘅candidate，話佢哋都一樣等緊，最終發脾氣嗰個女仔走咗。
我一路填form一路觀察，另外3位candidate都係等到坐立不安，其中一個女仔就睇得出好凍，始終今朝好大雨，有遮都會成身濕晒，齋坐喺度而啲冷氣又咁大，之後唔病都偷笑。
Receptionist畀人鬧完之後行開咗，似乎係搵同事傾呢單嘢，當我填form填到一半嘅時候，receptionist又行出嚟向我哋咁多人講：「負責interview嘅同事仲忙緊，而家都12點幾，不如你哋食完晏再返上嚟吖！」
我二話不說企起身，遞返個訪客證畀receptionist，然後問佢：「我唔見喇，介唔介意我撕爛呢張form？因為有個人資料喺度。」
Receptionist錯愕咗一下，但都算禮貌，佢示意我拎走張form又得，撕爛又得，咁我唯有成張拎走，返屋企再處理啦！
因為我起身走先，唔知道另外3位由今朝等到中午嘅candidate最後係咪食埋lunch再返去in，點都好啦，先唔講尊唔尊重求職者，你公司約完人上嚟interview，但負責同事竟然可以去開會置之不理，又唔搵人幫手follow up，可想而知呢度嘅架構係幾混亂，唔in絕對唔係損失。
近幾個月不斷搵工，其實比呢間公司更過份嘅情況都遇過（因為今朝份工我冇乜點等就走咗），就上個月之嘛，試下節錄同嗰位HR嘅對話。
HR：「我睇過你份CV，覺得你唔係好啱我哋要求。」
我冷笑咗一下，冇回應，心裡面諗點解唔啱又叫我嚟in。
HR基本上冇望我，自顧自低頭睇我份CV繼續講：「其實我哋呢個position好多人見緊。」
我打破沉默，答咗句：「不過我見你哋呢個position由上年9月開始請人，咁多人見都未請到？」
HR：「之前請過㗎喇，幾次都請到，係佢哋做唔長啫，走咗咪要再請囉！」
吖，佢自己講完覺得冇問題呢下先好嘢！
我：「哦！」
HR：「人工方面你要求係幾多？」
我：「寫咗喺張form度，$26,000至$30,000，CV都有寫。」
HR：「其實呢，我覺得唔應該咁進取。」
？？？？？
我：「咩意思？」
HR再講多次：「我意思係你叫價好進取。」
我：「我而家份工$25,000喎！點樣叫進取？」當時我未resign舊工，current salary的確係$25,000。
HR：「其實要睇情況，我哋公司喺中環，image都唔同啦，你舊公司喺新蒲崗，嗰度係工廠區。」
雖然講緊中文，我隻隻字都聽得明，但係砌埋一齊就聽唔明，佢嘅意思係返中環高尚啲，所以應該降低人工去遷就？真心聽唔明，不過已經冇興趣深究，敷衍兩句就結束咗個interview離開。
隔咗唔夠3個禮拜，嗰位HR打電話嚟畀我，單刀直入就問咗句：「而家公司出咗offer，$22,000，你有冇問題？」
哦，唔怪得見工嗰陣句句腌臢啦，原來想壓價。
個腦未轉得切應該寸佢定係cut線，呢位HR已經再問另一條問題：「另外呢，呢度OT比較多，有時都會做到幾夜，過咗12點可以claim的士錢，捱夜你ok？」
我都費事同佢講當時已經有一份$28,000嘅offer，雖然唔係返中環，但足足多你$4,000，所以淨係答佢後面條問題：「捱夜打機我ok，捱夜做嘢唔ok，係咁！」然後就cut咗佢線。
唔知係咪個市麻麻，呢一兩個月見工特別多古怪嘢，唯一安慰係搵工有著落，暫時唔使再去interview畀呢啲人激親，希望今朝等到發脾氣嗰個女仔都快啲搵到新工啦！