「賤人！我畀公司炒咗喇，而家都仲未搵到嘢做，你開心啦！做埋啲咁折墮嘅嘢，因住生仔冇屎忽呀！我有咩得罪你呀？要咁樣害我？」某日我步出旺角朗豪坊，等緊過馬路去對面嘅雅蘭嗰陣，有個女人衝埋嚟鬧我，如果唔係我有個男朋友喺身邊，真係唔排除佢會郁手。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
坦白講，我當時完全唔知佢係乜水，所以直接講咗句：「我唔識你㗎喎！」
「你梗係唔認得我啦！你年中害咁多人！XXXXX呀！記唔記得呀？你入嚟扮客買卸妝油吖嘛！有冇屈你呀？」
XXXXX係某一個美容用品牌子名，咁我有印象喇，幾個月前我part time做神秘顧客嘅時候，被指派去呢個brand喺某商場內嘅分店，我嘅任務有幾樣，其中最重要係睇售貨員處理walk in客人嘅流程，仲有對產品熟唔熟悉。
有啲產品係指定要我問嘅，目的係要知道個售貨員講唔講得出隻product嘅selling point，我哋有時亦會因應要求而決定錄唔錄音，總之去完間舖之後就要填返份report畀公司，公司就會轉交畀委託我哋做神秘顧客嗰個品牌。
我：「你唔好喺街咁樣啦，大家都係做嘢啫！」
「你就做嘢，我就冇咗份工，隻supplement我點樣解釋得唔清楚呀？我明明教晒你點樣食、有咩功效、療程係幾長，我全部都有講㗎！」
呢個時候我男朋友都幫口：「大街大巷你唔好咁樣啦，冷靜少少好冇呀？」
「冷靜，我個經理之後同我做review，話係佢（指住我）講我冇介紹清楚隻supplement，有幾個重點講漏咗，之後我就冇咗份工喇，你賠返份工畀我呀！仲有呢幾個月我冇嘢做，冇收入係咪你賠呀？害人精，你搵食就得，人哋搵食就唔得！」
我同男友冇再同佢爭辯，旺角，仲要朗豪坊門口，你都想像到有幾多人，唯一慶幸係佢冇跟埋我哋過馬路，雖然一路行一路聽到佢喺後面講粗口。
香港細唔係今日先知，細到咁樣都撞到真係冇辦法，而我無啦啦畀人咁樣鬧法，仲有人企定定睇熱鬧，心情當然唔好，本來係想去雅蘭食飯，結果都冇食，我仲對住男友喊。
我：「斷人衣食猶如殺人父母，我係咪好衰呀？」
男朋友：「各為其主啫，咁你做神秘顧客，呢個係你嘅職責，點解要怪自己呢？你覺得有冇屈佢吖？有冇特登講到呢個Sales好衰？」
我：「其實咁耐之前我已經唔記得喇，因為做神祕顧客又唔止去一間舖，又唔止試一個Sales，但佢講我出店名同埋細節之後，我對佢個樣都有少少印象，我同佢無仇無怨，點會特登寫衰佢呢？我都估唔到會搞到人冇得撈㗎！」
男朋友嘅分析係，正常嚟講一個Sales就算喺顧客面前表現唔理想，例如介紹product唔詳盡或者冇跟公司指引，最多都係換嚟警告，再嚴重啲頂盡冇得升，唔相信一份神秘顧客嘅result就要搞到炒人咁嚴重，懷疑個Sales仲有其他嘢冇講，或者係唔止一次咁樣。
如果用理性去分析，我都覺得一個品牌唔會咁樣就炒人，如果係咁，會唔會係請神祕顧客呢個品牌有問題呢？而且我都係做份內事啫，我要話你合格，其實剔一剔就ok，反而要講你唔合格，仲要寫多段嘢去交代詳情，我點會搵自己笨呀？
不過同我講呢啲安慰說話嘅人，始終都係我男朋友，佢一定會企喺我呢邊，所以我諗起自己搞到人冇咗份工，依然會好自責，就算唔係直接令人失業，多多少少都係間接促成，好難話完全冇責任。
自從呢件事之後我亦都冇再做神祕顧客喇，本身我有份正職，呢份只係part time，我又控制唔到啲公司收到個report之後會點樣對待個員工，就算唔係炒，搞到人冇得升或者冇得加人工都好似好衰，或者係我心理質素唔夠啦，真係唔想再喺街畀人鬧喇！（完）
有個舊故事嘅主題差唔多 但內容就截然不同。
舊同事好虛偽 被炒後放唔低
https://hkofficedaily.com/?p=21999