見咗份工都幾痴線，所以好想分享下，唔知係唔係我大驚小怪呢！話說我喺求職網見到有個job ad幾適合，咁就send resume去啦！隔咗一日已經收到電話約interview，不過對方唔係約去office，而係約喺coffee shop，聽聞有啲公司係唔想畀現職員工知道請緊人，特登會約出去見，加上coffee shop又係公眾地方，我又係男仔，冇問題啦，照去in囉！
出到嚟之後，對方係由一個中年男人赴會（約見工係個女仔打嚟），interview過程一切正常，講嘅所有嘢亦都正頭正路，點知去到最後，個男人就同我講：「Simon你都幾適合我哋公司，不過有一樣嘢希望你唔好介意，如果冇問題，我可以即刻決定請你。」
我：「係，有咩介意？你指邊方面？」
「就係我哋公司係冇office，會喺屋企做嘢。」
當時我心諗，冇office，即係work from home？正喎！我又唔介意呀！
我：「Work from home？冇問題，我之前份工喺疫情期間都work from home！」
「唔係唔係，唔係work from 你個home，係work from我個home！你覺得點吖？介唔介意？」
點樣work from你個home呀？
問清楚先知，原來呢間公司係由頭到尾都冇office嘅，全部人work from眼前呢個中年男人，亦即係老細個home……不過咪住先，你冇正式office，咁樣開間公司work from home，當拎得到商業登記喇，咁點解咁大個求職網站會畀你刊登招聘廣告㗎？個job ad仲有location話公司位於尖沙咀㗎喎！
聽返個中年男人講，佢一開始就係租嗰種虛擬辦公室，即係租一個商業地址做BR，登記埋代收信代收件，仲有一條專屬公司電話線，如果有人打嚟就會駁咗去虛擬辦公室，嗰度有職員會再轉駁返畀佢。咁你個求職廣告其實有少少名不符實喎！
「我公司，即係我屋企同尖沙咀都好近㗎咋，喺長沙灣，都係嗰條線之嘛！我知你擔心啲乜，放心啦，另外幾位同事都喺我屋企返工，始終我哋呢行有時要傾啲design，唔方便各自喺自己屋企返，設計嘅嘢好抽象，聚埋一齊傾有效率好多。」
我：「咁樣……我考慮下先覆你吖！」
「不如咁啦！你上嚟我度睇下先，你都係擔心會唔會真係有同事返工啫！見個面囉，香港地租office好貴呀！根本就唔抵，不如我用租office啲錢擺喺你哋人工度仲實際啦，啱唔啱先？」
因為我都失咗業3個月喇，加上佢話將租金成本擺落人工度更實際，呢部分我係認同嘅，何況佢係男人，我都係男人，照計都冇咩好驚，如果我係女仔就唔會跟佢返屋企……呀唔係，應該係唔會跟佢返公司啦！
從尖沙咀嘅coffee shop離開，個男人直接同我搭的士去長沙灣，成程車佢都繼續同我傾工作，點知一落車就……
我：「呢度？」因為地點係幸福邨，大哥，公共屋邨嚟喎，唔係話睇唔起公屋，因為我都住緊公屋，但你叫我work from你個home，我仲以為係環境好啲嘅私樓單位，個心理落差真係愈嚟愈大。
「係呀，幸福邨我由細住到大，嗱！你哋食lunch仲可以落嚟呢個幸福商場，嗰間賓墟餐廳幾正㗎，再唔係仲有麥當勞，粥粉麵又有，過對面元州街就仲多嘢食啦！好多YouTuber都去元州街嗰邊拍片㗎！不過有時我阿媽會煲湯煮飯，你哋唔一定要出去食，咁又可以慳返一餐喇係咪？」
等等，關你阿媽咩事？呀！原來真係關㗎！
上到去間公屋單位，係一個有啲年紀嘅女人開門，佢仲同我介紹呢個係佢阿媽，而我更加講咗句：「伯母你好！」我究竟做緊咩？我原本唔係見緊一份工㗎咩？
我冇度尺，亦都冇直接問，只可以講目測間屋得200幾呎，又真係有「員工」做緊嘅，2男2女，未計呢位「老細」同埋伯母，咁即係加埋我會有7個人，再重複，呢度200幾呎……
啲「同事」好友善向我打招呼，仲自介一番，佢哋有啲坐喺飯枱做嘢，有啲坐梳化，我都未開聲問，個「老細」就好似預判到我嘅問題咁，率先開聲解釋：「有時我會坐自己張床做嘢嘅，我阿媽唔係成日喺度㗎！如果真係要開啲好緊要嘅會，我哋可以落樓下嘅快餐店，連鎖嗰啲有樣嘢好，通常唔會理你。」
唔知點解我嘅心態起咗少少變化，有啲佩服呢個男人，佢喺有限嘅環境同資源之下照樣創業，甚至強調雖然係租虛擬辦公室，冇一個實體office，但強積金同其他嘢一樣做到足，連個阿媽都幫手，有時會煲湯煮飯畀員工，突然有一秒覺得成件事好勵志。
其實個老細仲有同我講：「唔好意思，因為招聘廣告寫得太清楚，好多人會唔肯見，我想interview面對面同求職者講，呢度啲同事都係咁樣請返嚟，初初佢哋有戒心㗎，特別係女同事啦，不過而家做落都好自在，唔係要說服你做，咁講真句，返工最緊要有糧出㗎啫，如果返中環office人工少過而家2000，你又會點揀吖？」
未等我答，個老細已經自己答返：「我就會揀呢度喇！屋邨配套食個飯都平啲啦！」
好可惜，同我追求嘅工作真係落差太大喇，我唔係要做大集團，但都冇諗過要喺一間200幾呎嘅公屋返工，所以最終都係拒絕咗，真心想問下其他人，如果糧照出，福利一樣有，每樣嘢都係跟足程序，只係要喺咁嘅環境返工，如果係你又會唔會接受呢？