年紀愈大感受愈深 睇清搵你笨實嘅人

噚晚收到個msg，係一位好耐冇見嘅朋友send嚟，佢劈頭就話自己最近搵緊工，問我可唔可以出張reference letter畀佢？同埋到時有新公司請嘅時候，想留我公司email或者電話，再由我「飾演」前僱主幫佢完成reference check……交代少少背景先，我同佢識咗幾年㗎喇，佢做HR，我搞小生意有自己嘅公司仔。

睇返同呢個朋友對上一個msg原來已經係上年4月，當時係我主動搵佢，因為嗰陣有份「僱員薪酬及退休金報稅表」唔識填，我都唔係搵佢填㗎，只係當中有少少唔明白，咁呢個朋友做HR，所以我就問咗一條問題，就係咁多㗎啫，不過佢就一直都冇回覆我。

或者你會話，老奉要幫你解答疑難咩！朋友都分熟同埋唔熟㗎嘛！

啱嘅，所以再推前多一年，即係2022年嘅時候，呢位朋友當時又係搵緊工，佢又係問我可唔可以出張reference letter畀佢，又係問我可唔可以扮佢前上司或者前老闆，而我係有幫嘅！

其實我有同佢講過出reference letter係偽造文書，但佢又一直話無所謂，仲話最多佢自己出去整個印，最緊要我之後幫手做reference check，呢方面我承認自己都有錯，只因為我當佢係朋友，希望佢盡快搵到工。

嗰次唔係第一次，又推前多一年，2021年嘅時候，佢都提出過相同要求，就係因為一場朋友，我又係幫咗佢忙，呢兩次佢去應徵嘅公司都有搵我做reference check㗎，我送佛送到西完成埋，兩份工都協助佢成功入職。

Ok！時序又去返上年4月我問佢關於「僱員薪酬及退休金報稅表」嘅事，睇住佢在線上，冇回應，其實唔答都唔緊要，可以講句「我都唔識」或者「我好忙」，咁都得㗎啫！

人哋唔幫你，咁我識做啦，自己再搵其他人問，同時預計到呢位朋友總有一日會搵返我，果然不出所料，就係噚晚佢又叫我出reference letter同埋幫手做reference check喇！所以我係絕對唔意外。

呢位朋友轉工比較密，有啲工做得幾個月，有啲半年，因為份resume會唔好睇，所以佢唔止一次叫我幫忙，出reference letter話喺我公司做，唔係貪我公司大，佢純粹想駁長啲工作經驗，例如呢兩年轉咗4至5份工，佢就選擇唔喺resume裡面提，想淨係填我公司個名，可以顯示之前兩年一直喺我度做冇轉過工。

噚晚望住佢嘅msg，我猶疑咗一陣好唔好同佢講，結果都係忍唔住打咗以下msg

「做朋友唔係咁呀？次次都有事先搵我，次次都係我幫你，你睇下之前個msg係幾時？我問你啲乜嘢？你有冇理過我？」

以為佢會多多少少覺得唔好意思啦！點知呢個朋友錄返個voice msg畀我話：「喂！唔好講呢啲啦！幫咗我先，份reference letter我打得㗎喇，你睇下幾時得閒借個公司印畀我吸吖！你上次係咪問咩報稅呀？我一陣幫你睇下。」

等你幫就死得人啦！上年4月呀！有啲後悔講咗心底話，畀佢知道我介意，仲要聽佢個voice msg「指揮」我借個公司印畀佢吸，因為聽完之後個心都好唔舒服。

結果我block咗佢，唔想再討論落去。同返身邊其他朋友講，佢哋擔心呢個人都係會自製reference letter，再參考我之前幫佢整嘅信再自製我公司印，不過我又唔驚，因為你過到呢關都隨時要做reference check，總之有人打畀我，我就一定講真話，呢次唔會再幫忙講大話。

可能人大咗，呢一兩年感受特別深，有啲人搵你笨實嘅同時，係完全唔會覺得唔好意思，當你年紀愈大，遇到呢種人嘅機會係愈嚟愈多。

有時好懷念以前細細個，啲朋友會毫無目的咁搵你出去飲嘢食飯，甚至傻下傻下咁樣坐公園吹水，嗰種友誼係特別真摯，人大咗之後，真係好常遇到有目的先會搵你嘅人，呢樣係無可避免，一定要對自己好啲，對一啲唔當你係朋友嘅人狠啲，無情啲，人愈大，時間愈嚟愈少，盡量要令自己開心，唔好再浪費時間招呼搵你笨實嘅人。