我做代購，因為做咗好多年，加上日本同韓國都有partner幫手，見到生意逐漸穩定之後，我就開咗間公司仔，所謂「仔」，原因係得5個人，不過我仲有向外批貨，工作量方面有啲吃力，所以就想請多個妹妹仔返嚟幫忙。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
由於我要去一轉韓國做嘢，請人嘅事就交畀Elsa負責，佢其實係我個friend嘅姑姐，Elsa之前係做手袋廠嘅Merchandiser，後來因為屋企有啲事就冇做，全職照顧佢老公，近幾年佢想再搵工，不過可能年紀大冇人請，而我呢間公司仔要求又唔高，而且佢又唔介意人工低，所以我就搵咗Elsa入嚟做。
除咗我同Elsa，公司仲有3個同事，佢哋分別負責客戶服務，更新網站，仲有pack貨寄件，年齡介乎30至40歲，我呢個老闆反而係全公司最年輕，今年都係27歲，亦係因為咁，我先想請個妹妹仔返嚟，希望有個後生嘅一齊喺入貨方面畀啲意見。
當我由韓國返香港之後，Elsa已經請咗一位25歲嘅妹妹仔，佢叫Cherry，年齡真係同我差唔多，同埋想講多一樣嘢，雖然我係呢間代購公司仔嘅老闆，但我個位並唔係坐最後排，因為最入係靠窗，背脊真係好熱，而Elsa就唔介意，佢話自己係老人家想曬下太陽，覺得會精神啲，所以Elsa喺位置上係坐我後面。
或者因為Elsa負責in同埋決定請Cherry，加上又坐喺office最後，所以呢位妹妹仔一直誤會Elsa先係老闆……仲有，呢間公司太細，我年紀亦係最細，大家都唔會嗌我老闆，個個直呼我英文名Stephy。
由於韓國嗰轉太攰太多嘢搞，我第二日返到公司都未回魂，淨係同新請返嚟嘅Cherry打咗個招呼就要忙其他嘢，未到lunch time已經暈暈地，所以就伏喺張枱小睡片刻，呢個妹妹仔竟然走嚟拍醒我！
Cherry：「喂，你唔好喺度瞓覺啦，老闆見到唔好呀！」
我：「老闆見到？」
Cherry：「係呀，Elsa同佢哋行咗去點貨咋，一陣返嚟見到你瞓覺就唔係咁好啦！」
其實我好想笑，但當時真係好攰笑唔出。本以為咁都唔錯吖，請咗個咁有規有矩嘅妹妹仔，所以過多兩日等到冇咁忙，我就話想請Cherry食飯，班同事已經同佢係咁易食咗welcome lunch，反而我仲未，雖然係公司仔啫，都希望對個新人好啲嘅！
Cherry聽到我話請佢食飯都好開心，佢覺得公司裡面其他同事年紀大，有個年齡相若嘅女仔做飯腳會好啲，結果餐飯真係食得好開心，因為過程中佢問咗我好多問題，講咗好多對我公司嘅睇法。
Cherry：「你就好啦，啱啱去完韓國玩，我都好鍾意韓國㗎！以前仲喺交友App識咗個Oppa，係呢，你有冇拍拖呀？」
我：「而家冇呀，咁忙。」
Cherry：「係囉，我都見你去完旅行返嚟日日做到冇停手，晚晚放工都見你未走，其實你係咪特登做畀老闆睇㗎？」
我：「老闆？你指Elsa？唔係啦，真係好多嘢做㗎！」
Cherry：「即係你唔係扮嘢㗎？咁就仲戇居，勤力做嘢冇好結果㗎，唔怪得個個都拎晒啲嘢去你個位啦，我見你文書又要理，揀貨又要理，最多電話又係你，仲見你幫手拆箱搬箱，你唔好畀佢哋覺得你好蝦吖嘛！」
我：「Er……最緊要公司賺錢啫，邊個做冇咩所謂嘅。」
Cherry：「唔好咁傻啦Stephy！呢間細公司嚟咋！代購成行成市，打開IG大把代購啦！呢度唔會做得大㗎喇！你咁勤力冇用㗎！」
唔知點解，聽完佢講之後有啲「中箭」嘅感覺。
其實嗰次lunch我已經想同Cherry「表明身份」，可惜埋完單之後韓國個partner打WhatsApp call嚟傾嘢，我全程行返公司都要講住電話，所以唔係有心唔同佢講。
之後一日，我因為M痛嘅緣故，忍唔住又伏喺枱休息，今次又畀Cherry拍醒，由於office當時有其他人，Cherry示意我行出去傾兩句。
Cherry：「喂，同你講咗唔好喺個位瞓覺啦，你咩事啫？」
我呢個老闆竟然要向個新人解釋：「M痛，第一日。」
Cherry：「我帶你去倉仔嗰邊吖，我發現咗有個corner可以匿埋，你想hea下就去嗰度啦，跟我嚟！」
又要講一次，我呢個老闆竟然要個新人帶領去咗倉仔嘅一個角落休息，因為唔可以畀Elsa佢哋見到我伏喺枱度……
Cherry：「你請假返去休息啦！呢間公司雖然細啫，都有有薪病假㗎嘛，唔好蝕呀！教埋你第日點射波，去睇醫生，千祈唔好話發燒嗰啲，check到你冇燒隨時冇醫生紙，你話胃痛，咁樣表面check唔到，一定開醫生紙畀你！」
我：「Cherry呀，我諗有啲嘢我要同你講清楚。」
Cherry：「你快啲抖下先啦，我幫你睇水，如果Elsa入倉我就跟埋入嚟，然後大大聲講嘢，咁你聽到就醒水喇，扮執緊貨，知唔知？」
我：「唔係呀，Cherry，我想同你講，我係呢間公司嘅老闆，Elsa唔係老闆，我先係。」
Cherry：「點會呀？」
我：「真，你唔信就問下Elsa。」
然後我同Cherry由倉仔返出去office，佢全程靜默，我就趁lunch time同Elsa講：「新同事唔知我係老闆，有機會同佢解釋下啦！個傻妹真係……」
Elsa：「唔使喇，頭先你去咗洗手間，Cherry走咗嚟問我。」
呢單嘢雖然好笑，但亦好尷尬，我曾經有一刻擔心Cherry會唔做，好在佢而家都好穩定，只係同我嘅距離就明顯疏遠咗，有時我攰得滯都有伏喺枱，不過Cherry冇再拍醒我喇。
作為同事，其實Cherry呢個妹妹仔都幾可愛嘅，我唔擔心佢用盡啲有薪病假，反而驚佢「教」完我之後，自己真係有病時唔敢請假，希望佢唔好嫌我間公司仔「唔會做得大」啦！大家一齊共事，最緊要開開心心。(完）
唔知Cherry有冇提醒Stephy，中醫病假紙未必會被公司承認呢🙈
中醫病假紙未必承認 同事感針對作出報復
https://hkofficedaily.com/?p=18124