仲有一個月，我就正式住喺日本一年喇，喺呢度有遇過超好味嘅食店，當然亦有難食嘅，不過整體嚟講用餐體驗都好愉快，有唔少人反映疫情後東京服務業質素下降……我覺得還好啦，喺日本出街食飯真係未遇過谷氣嘢，可能係我好彩啩！
不過早幾日位於東京葛飾區嘅人氣拉麵店三浦家就發生咗單谷氣嘢（我唔係第一身），事緣店員準備執枱嗰陣，發現客人留低咗一張字條，內容全部都係負面批評，睇得出怨氣好重，原圖同埋內容大意喺下面：
圖片來源：Twitter帳號@miura_keita6348
加咗價又唔加份量擺明搵笨
唔好令顧客排咁耐隊，唔好連坐咩位置都要指指點點
網上評價高但服務咁差
逼人飲埋啲咁苦嘅湯底
好好管理接客時間啦
去死啦
我都想分享下自己經驗，的而且確，日本好多餐廳會任由客人自己揀位，除非真係繁忙時間，否則你一個人坐張四人枱都唔會話你，反而係來自香港嘅我好唔慣，我細佬都係，一個人就坐自閉枱，兩個人就坐兩人枱，所以日本朋友會覺得我哋好怪，點解有闊落啲嘅座位都唔揀。
不過日本都有唔少餐廳係由店員指示你坐邊度，同食物價錢無關，純粹睇間店嘅作風，所以呢位客人鬧「唔好連坐咩位置都要指指點點」，其實又唔可以話店家有錯。
東京都有拉麵店嘅做法係，店員喺你入去時放定杯水喺個位，佢唔會直接講出口，但行為上即係示意你坐有杯水嗰度，呢種情況都常見。
至於「顧客排咁耐隊」呢個point，我自己覺得日本人鍾意排隊嘅程度仲勁過香港，嗰種感覺就好似「唔排唔知身體好」，不過我相信呢位顧客都真係排咗好耐，可能入到舖頭嗰陣已經好忟憎，呢段時間日本天氣又熱呢，心情差都可以理解嘅。
而「網上評價高但服務咁差」呢樣嘢，嗱！我係有啲個人心得。
以《食べログ》呢個日本常用嘅食評同訂位App做標準，冇錯，網上評價高其實唔代表一定好食或者服務好好，但如果佢評分低呢……咁就一定會出事！
有日本人畀咗個標準我，就係喺《食べログ》上面嘅食店有3.4分以上，通常都好有水準，可以放心去馬，所以評分3.2至3.3呢類中規中矩嘅食店係佔大多數，如果你見到佢係3.2分樓下，甚至係低於3分呢，基本上可以放棄㗎喇，你要明白日本人已經係好客氣。
雖然日本人普遍好客氣，但今次三浦家拉麵店睇完客人留嘅字條就唔多客氣，負責人三浦慶太喺twitter上面隔空回應：「叫人去死呢啲說話唔好講啦，冇禮貌。有咩就當面同我講，馬鹿野郎！」
馬鹿野郎意思係蠢材，嚴格而言日文冇粗口，叫人做馬鹿野郎已經代表好嬲㗎喇！
負責人三浦慶太公審完個客之後，有啲拉麵同業都過嚟留言，同行一般係撐佢，大家互呻平時做嘢好辛苦，仲遇到呢啲客真係嘔血，又笑稱點解講到咁難食，但係碗麵又「完食」，連湯都飲埋。
當然亦有人係食花生，叫店方公開cctv睇吓個西客係咩樣。
不過網上評論都唔係一面倒，有人覺得三浦慶太咁樣公審個客係唔恰當，部分留言如下：
「你出埋呢啲post對餐廳生意冇幫助架喎，隨時仲會影響埋聲譽。」
「唔想當面投訴係驚影響到其他食客，寫低字條宣洩吓，對餐廳嚟講唔係最好嘅結果咩？」
咁樣啦，反正我仲未去過葛飾區，我屋企搭電車去就要一個鐘，搵個weekend我就過去呢間人氣拉麵店三浦家，食完之後寫返個report畀大家，但係我絕對唔會留字條投訴，費事一陣喺Twitter變炎上。