呢個唔係投稿，係一位住佐敦嘅朋友同我分享，佢屋企正正喺封鎖範圍。
全香港新聞都講緊呢單嘢，又有直播，啲相仲見到現場各部門嘅裝備好誇張，所以佢老細特登喺公司個大group send msg出嚟，叫我朋友唔好返公司，即使下星期解封咗都唔好返住。
朋友cap圖畀我睇佢老細其中一段說話：「你住疫區，嗰度咁多病毒，就算下星期解封都唔准返office呀！我唔想公司好似佐敦咁，個個上晒頭條咁瘀。」
仲有其他同事都加把嘴附和：「係啦！都唔知潛伏期幾耐！」
「你哋佐敦油麻地好危險喎，我都去醫院自己做檢測先。」
「喂，你起碼農曆新年後先返工啦，穩陣啲。」
「嗱！一係你返office，我哋全體home office。」
「唔好玩啦！佢都出唔到去，出到去返埋office，隨時殘留啲唔知咩菌喺公司。」
我問朋友：「你唔覺唔係出自關心㗎咩？」
朋友：「呢班友冇性，不嬲唔會關心人，最好笑係政府唔封關，但封我哋呢區，啲人唔係鬧政府處理得唔好，係歧視住喺佐敦啲人，當我哋係怪物，本末倒置！」
我：「咁而家喺屋企有咩搞？」
朋友：「咪用佢哋派嗰啲罐頭，再加啲其他嘢，成家人整個部隊鍋囉，唯有苦中作樂㗎咋！」
佢話最緊要有糧出，如果公司因為佢住佐敦所以解僱，到時會直接開名，不過自己一早計劃轉工，希望遲下多出面多啲職位。
「Home office仲好啦，唔使見到佢哋，不過政府安排咁混亂，封區唔封關，再咁搞落去遲早周圍都係疫區。」
頭痛醫頭，腳痛醫腳，根本問題又迴避，所以今日圍封佐敦，真係唔排除過兩日又輪到其他區。