成世人未試過咁尷尬。老細連續幾日好似嬲咗成村人咁，問嘢唔應，招呼唔打，喺office粒聲都唔出，我哋班同事全部都察覺到，但你點知佢開邊瓣啫！
生意唔好？同老婆鬧交？股票損手？你係女仔都話問下咩事吖，40幾歲中坑喎，唔通要主動問你有咩心事咩！
無奈地，就算同事唔想知，不過佢始終係老細，工作上點都要靠佢，因為有份嘢一定要老細簽名先可以complete，結果我硬住頭皮開聲搵佢簽隻龜，入到房講明晒來意，老細唔應我，眼尾都唔望我，仲要冇動手簽，咁我以為佢有其他嘢忙，咪返出去做嘢先囉！
一等就等咗大半日，簽個名咋喎，兩三秒簽完啦！正想入房再追，撞正老細出嚟拎print out，仲好，順勢問下係咪已經簽咗，你估佢點答？
老細：「咁叻你咪自己簽囉！」
咩事呀？我有話過自己叻？更何況冇嘢得罪你喎！我有嘢做錯？背叛咗公司？
既然全部同事都唔知你呢排嬲乜，我唔爭在做埋醜人喇！
我：「咩事呀呢排？係咪我工作上有咩問題？」
老細：「你哋唔使尊重我㗎啦！」
你哋？咁即係問題出於大家身上，唔係針對我一個啦！
同事擰晒過嚟，其中一個都忍唔住開聲問：「咩事呀？你講緊邊樣嘢唔尊重你？」
老細：「前幾日你哋收工約食飯有冇叫埋我先？」
？？？咩呀？
老細：「行過聽住你哋話收工去食嘢，但一句都冇問我去唔去？你哋真係當打份工，從來冇當我係自己人㗎喎！」
應該冇員工私下飯聚想嗌埋老細，何況你平時又唔係同我哋食開飯，無啦啦點會叫埋你呢？我哋當打份工有咩問題？返工就梗係為錢啦！唔通為咗同老細做一家人？冇嘢呀？
同事好聲好氣同佢解釋：「唔係，咁我哋一早約咗吖嘛，你又忙過我哋……」
老細：「如果你哋冇諗過預我，一係就唔好畀我聽到，畀我聽到又冇問我去唔去，我覺得好唔尊重囉！」
再重申一次，老細係男人，40幾歲中坑……
經一事長一智，而家我哋全部都識做，就係約食飯唔會喺公司出聲，有咩就收埋WhatsApp講。其實同事後尾有問過佢過兩日想唔想一齊晚飯？然後老細答：「唔去！」
CLS，男人，40幾歲中坑，小器過女人。