份工唔啱自己 介紹朋友畀你

之前去interview，其實對方幾nice幾好傾，過程好愉快，無奈佢哋個Job Ad有個位講得唔夠仔細，就係出差嘅頻密度，平均一至兩星期要飛一轉台灣同韓國，咁你去得就唔會即日來回，即係每星期梗有兩至三日唔喺香港，單身寡仔就梗係無所謂啦！幫你長駐台灣都得，但我結咗婚呢！

其實當時我仲要剛為人父，見工嗰陣阿仔都未滿月，雖然老婆就冇咩產後抑鬱症，不過我唔希望喺呢啲時候成日丟低老婆出差工作，何況我想睇住小朋友每個成長moment，所以呢份工雖然唔錯，人工亦完全符合我預期，但亦只能夠忍痛放棄。

對方即場開offer畀我，而我亦即場婉拒，照直講咗個原因，個老細都好體諒，跟住我哋再傾咗幾句，忽然間醒起啲嘢。

我：「有個朋友應該好適合，其實佢係我再對上一份工嘅舊同事，因為大家好friend所以keep住聯絡，佢好似搵緊工。」

個老細：「真？佢而家係冇嘢做定係點？因為呢個position我哋搵咗好耐喇！」

我：「有印象佢已經遞咗信，但唔肯定佢有著落未，要唔要我幫你問問？」

老細：「要呀！如果同你差唔多background，我都想見下，方唔方便問下你朋友有冇興趣？」

即刻幫佢問囉！反正呢間公司似乎唔錯，自己唔做都可以畀個熟人試下，我即時WhatsApp朋友問佢得唔得閒，佢話ok，我就直接打去傾，個老細就坐對面睇住我同朋友傾，其實成件事都幾搞笑。

我：「Ok喎！佢後日last day，見工可能要過多幾日，不如叫佢send份resume畀你睇睇先，你真係啱先至搵HR約佢囉！」

就係咁，我推咗個offer，介紹咗個朋友，我冇插手亦都冇理會佢哋後續係點樣約見工，不過朋友喺期間有同我提及interview同埋一啲細節，印象中隔多一個禮拜左右，我朋友就話份工請咗佢，跟手要請我食飯當係多謝喇！

其實我都有少少揼春㗎！因為將個offer讓咗畀朋友之後，我係一直都未搵到新工，send咗廿零份CV出去，真係有得見嘅得三份，仲要唔啱，話咗剛為人父啦！尿片同奶粉錢唔係講笑，同埋呢單嘢我冇同老婆講，佢嘅性格一定話唔介意我出差，講係咁講啫，我自己過意唔去，亦唔捨得成日丟低佢兩母子吖嘛！

隔咗兩個月，嗰間公司無啦啦call我，原來係個老細叫我上去拎錢，準備咗張HKD 10,000嘅支票……

我：「點解呢？」

老細：「你介紹咗個人畀我吖嘛，當係介紹費，錢唔多，唔好介意。」

個老細同我講，因為呢個position搵人搵咗好耐，佢哋已經準備叫獵頭公司出手，收費係呢個職位年薪嘅18%，即係大約幾萬蚊左右，獵頭公司仲話只要個求職者做滿一個月，就算係第二個月嘅第一日就辭職，佢哋都唔會幫手補返個人，除非求職者係第一個月內走，同埋replacement只會搵一次咁大把。

老細：「呢啲應該係行規，可能我比較少搵獵頭公司，個人覺得唔抵，好在你介紹咗個friend嚟幫手，呢度慳咗好多㗎喇！」

仔細老婆嫩，當時搵工又冇進展，突然有筆意外收入當然好啦！所以我都唔扮嘢喇，講咗幾聲多謝就約時間上去拎支票。

朋友因為出緊差都唔知佢老細有呢個舉動，不過佢都話個老細成日提起我。

再上去間公司，跟程序簽份form確認收咗張票，佢哋話公司當係一次性freelance咁樣畀錢，因為要出數，咁當然冇問題啦，揸正嚟做仲好。

不過我都有啲隱憂，兩個月喇，仲未有著落，可能年紀唔細，looking for 嘅職位又係一啲middle level，所以搵工係要啲時間，希望可以快啲搵到啦！好感恩呢間公司同呢個老細無啦啦畀1萬蚊介紹費，其實佢唔需要咁做，好！我繼續再搵工先！心存正念，一定有好消息！

【超多凶籤】東京淺草寺😮求籤禁忌 護守要還？ 🇯🇵日本人示範手水 參拜投幣有學問