UA戲院全線結業，香港人真係感慨萬千，我有個已婚女同事話自己特別懷念沙田UA。
「我住乙明邨吖嘛，不過佢畀MCL接手後就冇去喇，因為結婚搬離咗沙田，當時成日同老公拍拖睇戲，佢嚟乙明邨接我，一齊行過去新城市廣場，有時諗返好似係噚日發生嘅事，原來咩都變晒喇。」
我：「係㗎！回憶總是美好，我女友睇戲好鍾意儲票尾，我成日話佢傻，點知UA執咗之後，啲票尾、現金券、會員卡，仲有3D眼鏡都畀人放上網熱炒，真係有人買㗎咩？」
「唔係啩！睇完啲票尾都有得炒？嗰啲3D眼鏡好雞咋喎！會員卡已經冇用，炒到幾錢呀？」
我打開個拍賣網同佢一齊研究，啲價錢真係嚇親人，普通票尾就幾廿蚊至幾百蚊，本身100蚊嘅現金券就過千，UA會員卡先誇張，過萬蚊，問你服未？
我哋兩個噚日仲笑緊香港人咩都炒，呢啲嘢肯肯定有價冇市，點知今日返工峰迴路轉，嗰位已婚女同事話我知：「我老公上網bid咗幾張UA票尾返嚟，仲有現金券同3D眼鏡，使咗千幾蚊，我嬲到癲咗。」
我：「UA會員卡呢？」
「佢話太貴唔捨得，如果佢連會員卡都買埋，我即刻趕佢出廳瞓。」
又唔使咁嘅，其實佢老公都一樣懷念當時拍拖睇戲嘅日子，想買個實體回憶返嚟好好珍藏啫，都幾浪漫吖……我思疑佢老公有買會員卡，不過見個老婆咁激動，唯有收返埋唔敢拎出嚟。
今晚返屋企睇下有冇UA票尾先，可能我女友以前同啲Ex拍拖都儲唔少，放上網執返餐晏仔都好吖。