我本身做Headhunt，不過而家冇做喇，得罪講句，呢行嘅質素係有少少參差，唔好誤會我走嚟刻意唱衰，唔係想一竹篙打一船人，事實上有好多Headhunt都係好嘅，只係我見到一個反面教材，想講下自己quit咗呢行嘅原因啫。
我嘅範疇係做banking and finance方面嘅job，同其他headhunt之間嘅競爭係大嘅，而且過程比較漫長，特別係對住大行同埋一啲比較senior嘅職位，interview搞幾round絕對常見。有隻job我睇住個同事搵咗幾個求職者，再send佢哋去某大銀行見工，過五關斬六將之後，個客終於揀定其中一位求職者，呢個position有成8萬幾蚊月薪，可想而知佣金唔會差得去邊啦！
本身一切順利，但過程真係太漫長喇，嗰位求職者自己喺出面見成咗另一間bank，offer都出埋，佢喺權衡之下就放棄咗我同事介紹嗰份。
食到埋口嘅肥肉冇咗，我同事好明顯老羞成怒，除咗一連串轟炸個求職者之外，又軟硬兼施咁氹佢接受自己個job，其實嚟到呢一刻，我都覺得冇乜問題嘅，始終求職者有求職者立場，headhunt有headhunt立場，同事想做成呢單job所以施展渾身解數說服個求職者，坦白講係好合理，亦係職責所在，不過當我同事費盡唇舌都唔成功之後，佢就突然反晒面變成另一個人。
我聽住佢喺電話同嗰位求職者講：「我唔理你呀，一係你寫返封信同我個客解釋。」
唔知電話另一邊講咗啲乜，我同事再繼續：「總之你要Black and White解釋下點解turn down offer，否則我個客就會永久blacklist你，咁你將來就好難入呢間行做。」
當我聽到反晒白眼嘅時候，同事又出言恐嚇個求職者：「係呀，我個客好嬲呀！」
等到佢收咗線，我直接問同事：「個客真係咁嬲？會永久blacklist咁嚴重？」
同事答：「係我好嬲呀！搞咗咁耐，佢同我搵第二份工，而家我又要再搵人。」
Headhunt千辛萬苦搵到個適合嘅求職者，臨門撻Q覺得好挫敗係可以理解，而客人怪責我哋hold唔住個求職者亦係人之常情，但你吹到turn down offer就會畀個客永不錄用，我就覺得係捏造事實，太Over喇！
我哋headhunt要搵食，求職者都係一樣啫！冇理由要個求職者犧牲佢嘅前途去為你賺份佣，人哋冇欠你，亦冇義務要成全你，選擇一個適合自己嘅offer係求職者應有嘅權利。
調返轉講，我哋去一間公司見工，對方如果唔請，係咪都要寫返封信向求職者解釋？點解我哋turn down offer就要寫封信向對方懺悔呢？
客人詐型係一回事，點都冇理由迫個求職者去寫信，仲要威嚇話唔寫信解釋就永不錄用，呢件事令我對headhunt嘅工作突然生厭，結果幾個月前quit咗喇。
臨尾再補充多句，每行都有害群之馬，同樣亦有好人，只係我唔好彩見到呢次咁無賴嘅行為，突然間覺得好反感。
投稿讀者：Jessi