投稿讀者：Pui Yee
大家信唔信風水或者神怪嘢？我公司有個位好邪，坐親落去嘅同事都會好多病，喺度做咗6年半，一單比一單恐怖。
同期入嚟呢間公司個男仔係陽光運動型，基本上晚晚放工都會換埋運動裝先走，方便夜晚打波做gym，周不時見佢孭埋羽毛球拍返工，照計唔會係病壞書生。
當時佢坐喺嗰個「邪位」，返咗工兩三個月就開始成日病，每日都有五顏六色嘅藥丸要食，我哋問過佢咩事身體變得咁差，個男仔話自己都唔知，起居飲食正常，份工又冇咩壓力。佢堅持咗半年左右終於辭職，理由係呢段日子成日病，想take個break唞下。
後來公司請咗個女仔代佢，呢個女仔雖然唔係運動型，但都算活潑開朗，始終係後生女，平日跳跳紮，仲幾多男同事鍾意佢，但後來呢個女仔嘅遭遇都差唔多，除咗成日病，皮膚亦開始轉差，見佢有段日子直情爛面咁滯，又要睇專科又盛。呢個女仔做得耐啲，接近一年，最後聽講係搵到另一份工所以辭職。
當時冇人覺得嗰個位好邪，始終一間公司有人走有人留係十分常見嘅事，所以冇人擺上心，直至坐呢個位嘅第三位同事出現。
今次唔係新請返嚟，而係內部調職，呢位同事當時已經有咗BB，過多幾個月就放產假，但係個肚七個月大嘅時候，無端端有一日阿姐話佢小產，暫時返唔到工，我哋梗係覺得好驚訝啦！上星期一齊做嘢仲好地地，突然收到呢個消息大家都唔開心，私底下亦聯絡佢表示慰問，只知道佢冇咗個BB之後心情好差，休息完就冇再返嚟做喇。
發生完上述三件事，坐親邪位都冇好結果嘅傳聞就愈嚟愈勁，奈何一間公司有幾多吉位吖，而且始終係迷信嘢，再請新人都係得呢個位可以安置。然後第四個人坐呢個位，咁啱當時請暑期工，諗住返兩個月應該冇事啦，點知呢個小朋友做咗幾日就開始話頭痛，我哋成班同事已經從理性角度分析，例如係咪冷氣風口位，定係冷氣唔到先至好焗，甚至係咪有電子嘢搞到輻射之類，不過大家都搵唔到答案，亦似乎唔關事。呢個暑期工平安做足兩個月離開，雖然係冇乜事，但任何人都見到佢瘦咗一個碼，比起剛入職時明顯冇咁精神。
個「邪位」吉咗5個月左右，老細失驚無神話美國head office有同事調過嚟，跟完一單project就走，由於當時真係冇其他位，所以鬼佬嚟到都冇得揀。
個鬼佬30幾歲，笑容滿面風趣幽默，佢冇好似上幾手咁又暈又病，一切正常，我哋都覺得以前可能太多疑，或者呢啲神怪嘢唔會影響到外國人，點知後來鬼佬攞大假返美國探屋企人，一去冇回頭。
某日一位Senior同事叫人幫手清咗鬼佬枱面啲嘢，最初以為個project完咗，但奇就奇在點解無聲無息，因為大家平時都有兩句，趕唔切farewell都say個goodbye吖，見Senior又好似吞吞吐吐咁，部分人仲估係咪鬼佬畀總公司炒咗，點知問問下先知鬼佬喺美國自殺，原因係家庭問題，詳細就唔知喇，同事好傷心又半信半疑，忍唔住走去問老細，老細話係真事，不過head office都冇講太多，所以大家亦唔好追問喇。
其實有同事提議過喺個「邪位」做啲類似法事或者擺風水嘢，不過老細唔buy，仲好嬲咁話迷信，但我哋估老細都有啲驚同埋憂慮，因為自從鬼佬之後，公司冇再安排任何人坐呢個位，而家張枱用嚟擺訂返嚟一箱箱嘅A4紙，而我哋對住呢個「邪位」都有種唔舒服嘅感覺，唔係行過會即刻頭暈咁誇張，只係太清楚之前嘅「歷史」，一望到呢個位就會諗起，個感覺唔多好。