家有惡妻 Happy Hour都要簽回條

當年有個上司好鍾意捉住班下屬去Happy Hour,我真係唔明佢點解晚晚都要去飲嘢先安樂,仲要唔係約自己啲friend,係同同事喎,一星期見五日,每日見咁多個鐘都唔夠咩?

成班同事已經推得就推,但間唔中都要畀畀面出席,某次喺尖沙咀一間酒吧Happy Hour,其中一位同事Nathan嘅電話響起,聽到佢講:

「喂,老婆……同班同事飲緊嘢……唔係呀……咁又冇……吓……唔係,我唔係咁嘅意思……好小事咋喎……你聽我講先……得得得,我而家返嚟……唔好咁啦……返嚟再講……而家搭的士返嚟。」

我哋意識到氣氛凝重,等到Nathan收線,大家即刻問咩事?

Nathan:「我老婆知我出嚟飲嘢發晒脾氣呀,唔同你哋講喇,家變,走先。」

上司對住Nathan笑笑口咁話:「有冇咁驚青呀?老婆之嘛!」

Nathan喺大家嘅笑聲之中離開,當佢走咗之後,幾個同事就七嘴八舌討論:「好慘呀佢。」、「好在我條女唔係咁。」、「佢老婆好似幾惡喎。」

仲有一次,上司食lunch嗰陣已經講定Happy Hour,去到差唔多放工嘅時候,Nathan話要放飛機,叫大家飲得開心啲,上司問佢點解?Nathan拎部手機出嚟,直接播咗段voice msg,聽到佢老婆把聲鬼殺咁嘈:

「我一樣要返工,即係陣間屋企啲嘢我做晒?你就Happy Hour,我就Unhappy Hour,想問下你放工仲要應酬當唔當OT?有冇補水?返一份工朝九晚十一?你工時都好誇張下喎!你返文職定係做陪酒?唔返嚟都冇問題㗎!你決定吖!」

阿嫂殺聲震天,同事都叫Nathan唔好去搏喇,早啲返屋企交人啦!而Nathan走後,各人又一次覺得佢好慘,家有惡妻,飲杯嘢都要簽回條。

雖然同Nathan已經唔係同事,不過我哋仲有聯絡,之前中秋節我想買某一間嘅月餅買唔到,都係靠佢幫我買多一盒。

Nathan:「上我度攞月餅兼食飯啦!」

我有些少猶疑:「唔好喇,驚阿嫂唔鍾意。」

Nathan:「上嚟啦,其實嗰盒月餅係佢買㗎!」

好啦好啦……

上到去,我發現阿嫂份人好溫柔,好Nice,好好笑容,代入唔到當年殺聲震天個形象,還是……換咗老婆?

Nathan察覺到我嘅疑慮,直接就講:「其實一直以嚟都係我迫老婆做衰人,佢係唔會管我㗎!」

阿嫂聽完扮嬲咁講:「係啦!寫晒對白迫我錄voice msg,話要公開畀同事聽,等佢唔使出去應酬喎!不過唔緊要啦,主要都係畀你哋個上司聽之嘛,我又唔識佢,亦都唔使同佢相處,有啲嘢Nathan唔好意思開口,推得多又怕得罪人,咁咪我做醜人囉!慣咗做衰人㗎喇!」

Nathan:「你講到自己好偉大咁喎!上次你嗰幾個港女friend話要去咩Rosewood酒店Staycation,你咪又係用我做擋箭牌。」

阿嫂:「咁係吖嘛!疫情已經唔想去Staycation啦,仲要Rosewood咁貴,佢哋3條女冇負擔就話啫,唔好焗我去吖嘛,好似我唔去就要取消咁,好大壓力㗎!我咪即刻話老公唔鍾意我去囉!」

我:「哦,原來你兩個夾埋,咁嗰次喺酒吧,Nathan講完個電話要趕住走,應該都係夾定啦!」

阿嫂:「佢話推咗好多次,點都要扮去一次,然後叫我7:30打佢手提,Nathan扮喺電話畀我鬧,其實我喺另一邊瘋狂恥笑緊佢。」

Nathan話,喺職場好難識到真心朋友,對住老闆、上司、同事,大部分時間唔可以表現自己真實一面,返工無論開心、辛苦、委屈,喺公司都唔可以100%畀人睇晒,所以老婆同時係佢嘅「Soulmate」(靈魂伴侶),Nathan覺得好幸運。兩個人相處得耐,會清楚大家係點,有時一個眼神,一個表情語氣,已經知道對方諗咩。

Nathan:「人生有3分2時間係工作,我真係唔願意再花時間去應酬,雖然好多嘢可以出公數,甚至當時Happy Hour都係上司請,不過呢啲根本就唔係福利,一間公司最好嘅福利,其實係畀員工有更多私人生活同埋時間,但你知道出嚟做嘢有時身不由己,好在老婆唔介意做衰人角色,幫我解決咗好多麻煩。」

明明聽緊呢兩公婆扯貓尾嘅故事,唔知點解愈聽愈覺得佢哋幸福。

error: