中層投稿，想講下最近一單好無奈嘅事，話說我公司喺疫情期間已經試過兩次work from home，早排以為回復正常，點知又嚟個Omicron，結果澳洲老細出咗個notice，叫我哋香港、新加坡、韓國，同埋馬來西亞嘅office採用新措施防疫：
「為應對最新一波的Omicron疫情，請未完成兩劑疫苗注射的同事，必須停止返回Office工作，至於已經接種疫苗的同事，則可以照常上班，但務必緊記在工作環境內要戴口罩，新措施即時生效。」
我簡單用兩句總結，即係冇打疫苗嘅人可以work from home，打咗疫苗嘅反而要返工，唔知你覺得澳洲老細呢個決定係反智定合理，總之通告已經出咗，而家事在必行。
咁我哋公司一直都冇強制同事打疫苗，返工同請人當然亦唔需要出示任何打針證明，嚟緊政府係咪強制就唔知喇，At least呢個moment我哋自由度就好高，所以邊個同事打咗針，邊個同事冇打針，只有大家私底下先知㗎啫，平時傾計亦會傾開，但唔會開file紀錄在案。
據我理解，office裡面大部分人都接種咗疫苗，得返幾個人係冇打，不過班友仔知道公司有新措施之後就個個話自己未打，真係吹脹！明白既，長期work from home的確好頹，但有得wfh有邊個唔想吖，呢度都慳唔少車錢同飯錢啦，而且公司好少OT，所以個個借頭借路話冇打針換work from home都符合打工仔嘅心態。
只係當我哋一班team head要各自同自己組員講嘅時候，我其中一個下屬突然情緒激動，佢大約40幾歲，年紀大過我，典型老屎忽，有時我叫佢做嘢都叫唔郁，冇得升又恃住自己做得耐扮晒大佬嗰種呢，佢無啦啦發睥氣大鬧：「有冇搞錯呀！成間公司我最早打齊兩針，你同我講冇打針反而可以留家工作？」
佢反應過敏到嚇親其他同事，咁我只好同佢講：「呢個係老細決定，我負責轉達畀你哋聽啫。」
「咁而家即係點呀？我要返嚟公司做嘢呀？」
我：「係呀，你嗰陣時打疫苗周圍同人講，打咗針咪要返工囉！」
「痴撚線，咩道理？我唔理呀，我唔返呀！即係打咗針冇著數啫！」
我：「你冷靜啲，唔好講到公司針對你一個咁。」
「咁咪好唔抵？Phoebe冇打針，之後又放產假，而家仲可以留家工作。」
我：「你要比較都唔好用Phoebe比啦，佢係因為大肚而唔想打針，你同個大肚婆比？都話係澳洲老細決定，新加坡韓國同埋馬拉嗰邊都一樣㗎！」
點估到條老屎忽拍枱離開會議室，之後仲搵唔到人，聽其他同事講佢落咗樓煲煙，不過成個鐘都未返，點呀？辭職出聲喎，仲細咩，使唔使當女朋友咁氹呀？
一個鐘頭後佢又出現返，態度180度轉變走埋嚟同我講對唔住：「Sorry頭先語氣重咗少少。」
我：「你知就好啦，咁多細嘅睇住你。」
「其實我未打疫苗，可唔可以在家工作？」
真係畀佢激死，坐得近我少少嗰兩位同事聽到後已經忍唔住笑，唉！當時你打針話有得抽獎就周圍講，而家聽到冇打針可以work from home又驚死攞唔到著數，費事同佢嘈，我淨係講咗句：「是但你啦！」
有呢啲老屎忽下屬真係命都短幾年，反正佢唔返公司仲好，免得篤眼篤鼻，慢慢喺屋企抗疫啦！