撇除有兩年去咗working holiday，我出嚟社會工作加加埋埋都已經五年，清一色任職HR，同求職者做interview可謂駕輕就熟，不過都有被拋窒嘅時候。
兩個月前，我約咗candidate 上嚟見工，雖然唔係第一次見名牌大學畢業嘅人，但對方所散發嘅自信同埋舉手投足嘅淡定，我暫時未喺其他求職者身上見過，整個interview對答如流，基本上已經穩奪second in嘅入場劵，所以臨尾我亦循例做返個closing：「你有冇咩問題想問？」
交畀求職者反問HR，問題通常都係圍繞福利、晉升前景、公司架構、文化氣氛、工作細節，再唔係就關心上一手員工點解要走，偏少少極其量係問office附近有咩食，最離題試過有人問公司多唔多同事拍拖，點諗到眼前呢位叫Murphy嘅男求職者問咗我一句：
「我淨係想問一樣嘢，你會唔會有興趣嚟我公司做？」
真係猝不及防，當時我呆咗三秒，因為身份上有少少混淆，乜呢句唔係HR嘅對白咩？我而家唔係in緊人咩？定係我去咗見工？仲未回魂畀反應，Murphy已經向我解釋：
「希望你唔好介意，其實係咁嘅，我開咗間公司，不過我爸爸提醒我，做生意最緊要識睇人同埋請啱人，佢話請錯一個員工會對公司造成好大影響，headhunt我信唔過，驚佢哋為咗complete張單就亂咁塞人畀我，所以想親力親為，自己去見下HR，用第一身感受對方適唔適合。」
我：「你意思係，今次嚟唔係想見工，而係想睇下in你嘅HR得唔得，如果得就挖角去你公司，之後幫你請人，係咪咁？」
「Exactly! 我好有誠意，其實你用email同我confirm見工嗰陣，我已經去LinkedIn睇過，見到你過去嘅工作經驗同埋education都好合適，或者你聽一聽個offer先決定吖。」
正當我盤算緊呢個Murphy係咪玩嘢嘅時候，佢又向我遞上自己嘅卡片，office喺IFC，再聽埋佢講人工同福利，問心嗰句的確有心動，起碼份糧多咗接近35%，大假嘅日數亦多咗。
今次interview嘅closing由Murphy嚟做，佢臨尾同我講：「你慢慢考慮下先，我有你直線，下星期一再call你吖，但如果你決定過嚟我公司，可以隨時打畀我。」
呢件事我冇同公司任何人講，淨係同咗身邊幾個friend講，佢哋問係咪二世祖想溝女出埋啲屎橋，真心講我完全唔覺得係，無論係真實年齡定係外型，嗰個Murphy都可以做我細佬，自己知自己事，我未致於有吸引力到咁，同埋回望返整個interview嘅過程，對方好明顯係嚟探路同埋挖角，我LinkedIn冇擺相，所以嚟之前佢唔會知我咩樣。
至於有冇跳槽過去做？哈，我冇呀，主要原因係兩個，首先我唔係太想去一間新開立嘅公司，人大咗追求穩定，呢個階段嘅我偏向大樹好遮蔭，加上富二代做生意始終有一定風險，我唔太了解Murphy，點知佢開公司係咪三分鐘熱度。其次係，我而家個老細真心唔錯，幾有人情味，唔敢講呢度可以做一世，但一定穩陣同開心。
每個人都有各自嘅追求，不過我將呢個機會留畀其他HR，亦都相信嗰位叫Murphy嘅「求職者」，最終可以搵到適合嘅人選幫佢。