其實我同阿媽嘅關係可以用「陌生」去形容，我好早已經一個人搬出嚟住，有啲嘢我係嬲佢，當然佢亦有嘢係嬲我，而細佬就係我哋之間嘅橋樑，開不了口嘅野同埋肉麻嘅關心說話，通常係透過細佬去傳達。
由細到大，我都羨慕嗰啲可以同阿媽攬頭攬頸，拖住手出街嘅人，只可以講我同佢真係冇「母子緣」，但隨住彼此年紀漸大，好多事已經冇以前咁執著，以前介意嘅嘢都唔再介意，我相信佢都係。
平時一齊食飯都係拉埋細佬，唔知點解我仲係好怕同阿媽單獨相處，但因為疫情過後，細佬就會正式搬去東京同佢老婆生活，我擔心阿媽之後有咩頭暈身㷫會收埋唔同我講，所以近月一直叫細佬安排多啲飯局，包括嚟緊母親節食飯，希望大家熟悉啲，將來我可以照顧佢多啲。
睇嚟呢一步都算唔錯，因為阿媽同我夾食飯日子嘅時候，終於同我講佢有咩唔舒服。
「唔好意思呀，我生骨刺好痛，所以份工想做埋今個月唔做喇。」
突然間覺得鼻好酸，佢語氣好似問緊我同唔同意？我想話佢知，生骨刺做唔到落去，其實講唔好意思嘅應該係我先啱。
當然，咁肉麻嘅嘢我冇講，我只係話：「梗係好啦，一早叫你唔好做，你又成日話留喺屋企好悶。」
然後我就開始查下生骨刺應該點？食咩藥？睇咩醫生？當然我都冇同佢講，搵到啲資料就forward畀細佬。
細佬後來又同我講：「你阿媽話唔知睇咗套咩韓劇諗起你喎。」
其實我想講，我唔使睇劇都會諗起佢，當然，我冇講，太煽情嘅說話唔切合我呢個叛逃嘅大仔角色。
聽到佢生骨刺當然唔開心，但慶幸佢肯直接同我講，可能我哋都知道細佬就快做唔到彼此之間嘅傳聲筒喇。