其實我哋Speed Dating公司都會遇到MK仔，不過佢哋同食麥當勞都要攞威呢條MK一樣，好少會捨得使錢 join 1 vs 1 嗰種plan，一般係join多人派對，佢哋覺得自己好型，去到會溝死女，一次過可以攞10幾個女仔電話吖嘛！
上年夏天有個週末30幾度，著短袖都出晒汗，有條MK著住皮褸嚟join一個16 vs 16 嘅event（因為多人活動唔會scan，佢未亮相前唔知佢咁MK），雖然個酒店場地有冷氣，但係見佢著成咁，連我都覺得好熱呀！加上條友應該食咗半包煙先上嚟，浸煙味勁到呢！
#編按：多人活動－－－完場前大家要剔一張name list，你可以剔幾個都得，完全保密，我哋收集咗之後，只要男女雙方都有剔對方個名，我哋就會email返個電話number畀會員，等有心發展嘅男女自己聯絡。
呢條MK剔晒16個女會員，真係想漁翁撒網，點知冇女仔剔佢個名， 咁講真，我哋啲女會員join得活動都唔係想識MK，識MK仔落bar大把啦，最後冇人揀佢並唔意外。條MK過咗一日打嚟嘈，問我哋係咪搞錯？係咪miss咗冇send email畀佢？喺電話度大吵大鬧，又話要搵人上嚟搞我哋公司，唉！面係人哋畀，架就自己丟！
不過我都有個女仔friend淨係鍾意MK，愈係MK就愈愛，見過佢幾條仔都好似倫敦金嗰啲蛋散咁，始終男歡女愛呢啲嘢人人口味唔同嘅，MK都係一種style，最緊要帶眼識人啦！唔好搵嗰啲食麥當勞都要攞威逞英雄嘅傻柒，想喺條女面前扮大佬，蝦一個叫你戴口罩嘅職員，最後畀人起晒底再拉鳩埋，而家唔型啦，你話幾樣衰呢，真係又MK又PK！