喺一間公司做咗15年，當中有13年係跟住同一個上司，對我嚟講唔止覺得時間好長，直頭係匪夷所思，因為我出咗嚟社會工作5年都轉過幾份工，近3年先至喺呢間公司坐得定。
我坐得定係因為跟咗個好上司Athena，而Athena就係做咗十幾年嗰位老臣子，佢嘅頂頭上司係阿Mark，換言之Athena係我阿姐，Mark就係Athena大佬，而Mark就係我嘅大大佬。
阿姐對住其他部門嘅人係有啲霸氣同架子，不過對我呢位下屬真係唔錯，好肯教嘢之餘，有時亦會傾下私事，所以工作認真嘅背後都有人性化同輕鬆嘅一面，如果唔係咁我應該一早辭咗職，因為呢度做嘢都幾忙，OT係每日例牌菜。
聽返Athena講，佢15年前入嚟呢間公司做秘書嗰陣係跟另一位team leader，後來因為工作表現出色，兩年後就被當時上緊位嘅阿Mark搶咗嚟用，佢哋喺呢13年裡面合作無間，Mark愈升愈有，上年老闆再開多間分公司都交畀阿Mark揸莊。
阿Mark深得老闆器重，而佢亦相當器重Athena，我喺度做咗3年，每日睇住Athena貼身幫阿Mark打點一切，聽電話再篩選邊啲call要覆要接、管理每日每周每月嘅agenda、安排同埋召集開會、準備所有memo通告信件等等paperwork、整理同更新所有客戶同合作夥伴嘅資料、擋住一啲阿Mark唔想見到嘅人、提醒見客、book枱食飯、訂機票酒店再寫個出trip行程……等等。
以上已經太基本喇，香港大把秘書都做緊相同嘅事，Athena仲會幫大佬搞好多私人嘢，例如阿Mark個囝囝之前要報幼稚園K1，張form係Athena填嘅；阿Mark老婆生日，份禮物係Athena揀同埋買嘅；阿Mark夠期換智能身份證，係Athena幫佢網上預約，再順手搞埋大佬個媽咪一齊換，因為可以帶一個長者，換言之佢連ID number咁私人嘅嘢都知；星期五smart casual但有客臨時要meeting，Athena即刻幫阿Mark去買領帶再襯埋衫；Lunch會幫阿Mark買飯盒，完全知道大佬口味，如果阿Mark要OT，Athena可以留嘅都會陪到最後，就算中途要走都一定嗌定dinner放喺大佬枱面。
Athena同阿Mark嘅阿媽、阿哥、細佬、老婆、菲律賓工人、囝囝，全部都好熟，就連阿Mark買樓，Athena都有份揀瓷磚、牆紙、爐具，秘書呢個字眼實在太局限，Athena根本就係阿Mark嘅智囊、助手、喉舌、私人管家，我有時會有種錯覺以為佢哋係一家人。
直至某一日，Athena行埋嚟我個位講：「我下星期放大假，呢幾晚可唔可以OT？我想交帶啲嘢畀你。」
我：「冇問題呀，阿姐你放幾多日？」
Athena：「35日。」
我：「咁耐？而家冇得飛喎，諗住去邊度玩？唔係你屋企有咩事吖嘛？」
跟住Athena拉咗我入meeting room，明顯唔想其他同事聽到。佢同我講，最近有headhunt撬佢走，聲稱人工可以多20%，所以頭先就同阿Mark傾，自己希望留低，但同時要求加薪。
Athena：「阿Mark冇話加定唔加，佢反而叫我清晒手頭上累積嘅大假，因為想睇下係咪冇人代替到我先決定。」
我：「你唔覺得呢句嘢有少少侮辱性？加定唔加都係一句，點解要試驗下有冇人代替到你先決定？」
Athena：「聽到嘅時候梗係嬲啦，不過我唔覺得有人代替到我，唔好意思呀Megan，咁講唔係話你做嘢唔及得我，只係跟咗阿Mark 13年喇，佢嘅口味、喜好、習慣，我全部都知得好清楚，呢啲係咁多年累積返嚟，我唔認為有人可以喺咁短時間內代替到自己。」
我：「我明白你嘅意思，知道你唔係踩我。」
Athena：「但我都唔可以睇住阿Mark冧檔，所以一定要同你交接好啲工作，你盡力幫大佬啦！」
可能你會話Athena扭計加人工，不過作為打工仔，有加薪嘅渴求係好合理，而且就算阿Mark講咗句：「睇下係咪冇人代替到佢先決定」，Athena都係抱住一個正面嘅態度，當然我知道佢心底裡係諗：「睇下點！」但起碼唔會睇住我死，清大假之前都同我交帶咗日常工作先吖。
對於我嚟講，心情有少少複雜，首先好肯定自己冇可能pick up到阿姐嘅工作，佢跟咗阿Mark 13年，而我喺呢度只係3年，又唔係直接跟阿Mark，其次係如果我做得好，大佬係咪大條道理唔加人工畀Athena？假設做得唔好而成全咗Athena，我喺度嘅前途又有冇影響呢？
（未完待續）