原本以為左右做人難，仲有少少緊張，因為要取代Athena個位絕對唔容易，而且做得好又驚害咗阿姐，做得唔好又怕累到自己，真係唔知點算好，不過我嘅擔心原來係多餘，阿Mark喺Athena放大假前一日向隔籬team借人，叫咗另一個秘書幫手，連我都架空埋。
呢位「外援」叫Millie，同一間公司，又係秘書，大家都識嘅，只不過公司有3層，彼此唔同樓層平時比較少交流啫。Millie當然唔夠Athena咁資深啦，不過都做得耐過我，見佢又要follow本身個老細啲嘢，又要handle埋阿Mark嘅job，真係忙到踢晒腳，還好都冇乜甩漏，基本文書嘢做到足，風平浪靜咁就過咗大半個月。
期間Athena經常打嚟「收風」，好在我冇叉隻腳落呢件事裡面，所以有咩都照直同返Athena講。
Athena：「Millie跟得掂咩？阿Mark食嘢好腌臢㗎喎，唔可以重複。」
我：「阿Mark會直接同佢講想食乜，大致上都冇乜問題。」
聽得出Athena有啲擔心。
其實要咁樣比較好唔公平，阿Mark知道Millie係臨時拉伕嚟幫忙，所以好多嘢都就住，簡單舉幾個例子，起碼Millie唔使幫阿Mark上網預約更換身分證，更加唔使去睇瓷磚牆紙，加上近年疫情冇得飛，就連出trip訂機票訂酒店都唔使做，如果只係用35日嘅表現去釐定Athena嘅影響力，個人認為係唔啱數。
我嘅諗法當然唔代表阿Mark，所以休假過後，Athena被告知可以被取代，聽佢轉述，阿Mark係咁樣同佢講。
「我承認你咁多年嚟好幫得手，你嘅能力係毋庸置疑，不過唔代表公司冇咗你唔得，我特登唔搵Megan幫手，走去8樓（公司另一層嘅office）借Millie嚟用，就係想模擬你走咗，所有嘢可唔可以正常運作，事實證明係得嘅，唔係否定你嘅能力，只係想話畀你聽，我好難同公司爭取加你20%人工，到時老細會問我同一個問題，就係Athena係咪冇人代替到？你明唔明我講乜？」
Athena當然明白，何況阿Mark仲講到咁白，大佬可以當乜事都冇發生過，一切照舊，不過Athena唔得，佢選擇過檔headhunt介紹嗰間公司，冇錯人工係加咗20%，但佢承認自己耿耿於懷。
雖然我嘅身份只係旁觀者，不過呢35日就好似上咗一系列嘅Master Class，我睇到Athena嘅立場同埋諗法，為公司為上司默默耕耘長達十幾年，認為自己係不可或缺嘅員工，覺得老闆唔會接受佢辭職，呢種諗法雖然主觀，但合情合理，只係喺一個地方工作太耐，可能忘記咗職場第一大規條－－－除咗出糧嘅金主之外，其實公司冇咗任何人都可以照常運作。
我又企喺阿Mark嘅角度睇，員工同下屬幫到手固然係好事，但如果畀人牽住個鼻走咁就另計喇，佢冇辦法預測Athena幾時會再扭計加人工，假設每年都要求加一次20%呢？而且喺阿Mark嘅世界𥚃面，佢自己先至係主角，佢自己先至係將軍，其他人嘅角色係輔助，唔係調返轉要佢去滿足下屬。
對於自身方面，我亦有所領悟，首先要清楚自己嘅價值同埋定位，我可以好似Athena咁樣為公司付出努力、汗水、青春，大前提係嗰個地方或者嗰個老細值得你咁做，我唔肯定阿Mark放走Athena係啱定錯，只係深明呢個大佬係現實派，而且仲幾狠，冇資格話阿Mark跟唔過，但我知佢唔適合我。
已經決定咗下年完成埋個Top Up Master’s Degree就走，不過喺書本上讀嘅Master，真係唔夠職場上實戰嘅Master Class學到咁多嘢。
我哋可以熱愛工作，可以努力打拚，可以用實力同責任感建立自己喺行內嘅reputation，但絕對唔好嫁畀份工，職場好現實，人走茶涼，世態亦炎涼，任何人喺任何一間公司都只不過係過客，甚至係可以一夜間取代嘅路人甲。
（完）