M 全部都係M

【M，全部都係M】「你就好啦，你7成同事都係女仔，成日俾女圍，羨慕死人！」呢句說話我聽過N咁多次，容許我講個真相出嚟嘛？

我前後左右坐咗5個女同事，佢哋都有一個共通點，就係有月經，而佢哋5個亦都有一樣嘢係好唔同既，就係嚟M嘅日子。

月頭我會聽到女同事A非常躁底，當我捱過呢一關，又會聽到女同事B萬念俱灰，咩都冇心機做，第三個星期就到女同事C咿咿呀呀，大事小事發晒爛渣，月尾到女同事D嗌生嗌死，當然仲有個不規則嘅女同事E，填補另外4位女同事嘅「沒有M Come的日子」，一句講晒，即係日日見紅。

咁佢哋月經關我鬼事咩？係呀，完全唔關我事呀，但佢哋日日喺我耳邊討論邊隻止痛藥Work、邊隻衛生巾好用、今日有幾多，同埋有翼定冇翼，唔係傑斯同碧咸嗰啲左右翼呀，係M巾嗰對翼呀！

我好體諒佢哋嘅心情同感受，我有聽過何韻詩嗰首《神經痛》，佢哋有時都會問吓我：「聶瞳，我哋係咪搞到你好尷尬？」我都未答，佢哋又會：「嘩哈哈哈！你唔明架喇，好慘架！」慘？喂我又係喎，有冇心理醫生介紹呀？

有一次我買Lunch返嚟食，背後有把聲好響音咁講：「好衰呀，個女廁勁Dirty，成個廁板都係血，地下都有。」大佬，我食緊肉醬意粉呀！

「你就好啦，你7成同事都係女仔，成日俾女圍，羨慕死人！」真係唔好再喺我面前講呢句喇，而家M浸眼眉呀！