有冇睇過《絕世好bra》？我公司exactly就係做bra做內衣，見工已經知道呢間office係接近全女班，咁點解去完interview仲要take offer，take完又要走嚟呻？見咗咁多份工得呢份有下文吖嘛，失業咗幾個月喇，銀行戶口就嚟唔夠3位數撳唔到錢，嗰陣又未出消費劵，咁有offer唔通仲揀咩！
全女班office點解又會請我？初頭我都諗過呢個問題，不過返工第一日已經有答案，換水、搬嘢、換光管、出去買tea、落街等call車司機送嚟嘅sample……等等，你諗到嘅下欄嘢都做晒（但我個職位並唔係OA），差在未幫佢哋奶腳趾㗎啫，作為公司裡面極少數嘅男丁，呢啲工作亦成為我之後嘅日常。
其實以上所有嘢我都唔介意，最難頂係成班女喺度傾名牌手袋、講老公男友壞話、研究生仔應該開刀定順產（講得好血淋淋同細緻），當然唔少得傾月經，咁我唔出聲好合理吖係咪先，但班女人仲要迫我參與，今日佢哋講講下就特登叫我：「做咩呀？係咪聽唔慣呀？傻豬嚟嘅，月經好正常之嘛，你聽多啲好呀，第日知道女朋友經痛可以點處理。」
叫我傻豬…..我廿鳩幾歲人，老母同前女友都未叫過我傻豬，老母通常叫我仆街仔，前女友叫我單字一個「喂」，突然有班女人叫我傻豬，唔係感動，係毛管戙。
最攞命係班女好鍾意打卡，一星期5日，有3日嘅lunch都係特登搵啲打卡餐廳食，你應該會奇怪，好好地一個工作嘅地點，邊有咁多打卡餐廳呀？冇錯呀！佢哋係癲到call Uber出第二區食㗎！Office喺銅鑼灣，可以call車去西環食，去太古食，問你服未？公司對於lunch hour好寬鬆，呢度食兩個鐘頭lunch都冇問題，但呢個咪就係最大問題囉！
我嚟咗之後已經成為女同事嘅御用攝影師，佢哋咁樣教我影相……
「喂，呢面牆好靚，你幫我影吖。」
「哦，好呀。」影完。
「睇下，喂呀，你影相真係….唉，傻豬，唔好咁影呀，我教你，嗱，你烏低，下面攞到最底，去到我鞋底留一條邊咁上下，再向上斜斜地影。」
牆要影，拎住杯咖啡要影，夾起啲餸要影，單人要影，幾條女合照要影，食個lunch要影百鳩幾張相，有次我叫咗碟意粉，本身已經餓到仆街，仲要幫佢哋影一大輪相先食得，碟意粉唔止凍晒，啲汁仲要「滰」住咗，恐唔恐怖呀？
身邊朋友叫我節哀順變，與其埋怨，不如喺咁多女嘅公司入面搵個女朋友仲好喎！首先，呢度啲女唔係有老公就有仔，其次係，佢哋係我遇過最港女嘅港女，我記得睇你辦公室日報都講過有一樣嘢叫磁場效應，我反而替佢哋啲老公同男友慘，相信平時真係要進貢唔少名牌，仲要係咁揸機影相，唔好話喺度揀個女同事做女朋友，我覺得再係咁落去，自己直頭會中途轉基。
好老實講，我而家冇本事辭職，之前搵工搵咗幾個月，好難得先有一個offer，真係搵到懷疑人生，所以暫時唔敢搏，更加唔敢得罪班女人，頂住先，可以呻下已經好好，祝福我唔會變咗鍾意男人啦，最近已經戒埋AV，仲好似有少少性冷感。
投稿讀者：你當我是傻豬吧
原來我所有2017年嘅post都未擺過嚟網站，今次講起月經先突然諗起以下呢個舊post，等我慢慢update返啲舊文章先。
2017年8月8日《M，全部都係M》
https://hkofficedaily.com/?p=18375