「張秀文貼出與未婚夫婚照感謝金牌媒人Bob撮合改變一生」睇到某個page呢單報道，係因為我同事阿健喺下面留咗句comment，佢段字係咁：「終於搵到水魚喇！阿Bob條光頭佬最鍾意扯皮條，搵到個傻仔幫條女埋單！睇下幾時離婚吖！」
以為佢好憎TVB所以咁樣留言？唔係，因為另一個page出咗段新聞，標題係「193咖啡店今日開業Fans大排長龍引警員到場了解」，阿健又喺下面留言：「面目可憎，以為自己好紅，咖啡都未識沖又想搵fans笨，講到尾咪又係呃錢，不過大把豬西甘心畀佢呃。」
佢又唔止鬧ERROR，MIRROR都鬧，喺另一篇「為姜Man慶生，姜糖4.30請港人免費搭電車」嘅post下面，阿健嘅留言係咁：「垃圾，食屎啦！成班無腦，人哋賣麥記廣告就走去食，生日又要請人搭電車，冇人想搭呀！見到啲車身有佢哋個粉樣就想嘔。」
不過阿健又唔止關心娛樂，早幾日W Hotel出咗一款有兔肉嘅食物，外界有人話外國有兔肉食品根本好常見，同食豬食牛食羊一樣，然後佢就打出一段自己對動物界嘅精彩見解：「傻㗎？兔仔點同牛豬羊比呀？牛豬羊不嬲食開㗎啦，兔仔有思想㗎，要嚟養㗎！白痴！」
社交媒體嘅玩法就係，如果你有friend留咗comment或者share，本身睇唔到嗰個post或者冇follow嗰個page嘅人都會睇到，因為阿健add晒我哋成班同事，所以佢嘅留言大家都睇得一清二楚，清一色負面，清一色鬧人，清一色批評，而且每個留言都好凶狠。
係咪覺得講嘢又權威，又寸，又有「見地」嘅阿健樣樣嘢都睇唔過眼，真實中一定係懷才不遇嘅民間高手，又或者係得天獨厚嘅有為青年呢？唔……阿健應該係咁樣睇自己，不過喺我哋眼中，佢徹頭徹尾係一個廢人，做嘢冇交帶，office每個同事都幫佢執過蘇州屎，咁廢都未炒完全因為呢個人好識得卸膊，成條軟皮蛇一樣。
今朝我哋個經理先鬧完佢：「健哥，保你大啦喂！呢份文件得百幾字之嘛，點解你仲可以有咁多錯字㗎！我見你好多時間上網鬧人㗎喎，頭先見到你喺唔知邊個page睇到段文叫人零分重作，你就真係零分重作喇，做好自己啲嘢先啦好嘛！」
阿健真實同網上嘅性格好似，對住經理嘅責罵，兜口兜面係唔敢反駁，匿咗喺背後就凶狠好多喇，所以食lunch嗰陣佢同我哋講：「仆街啦佢，真係想屌爆佢，幾時add咗經理做friend㗎，unfriend先，我留咩言關佢鬼事咩，呢啲都要mon住，咁嘅人都做到經理，呢間公司簡直係垃圾！頭先佢再講多兩句我就一張職員證飛埋去，幾想打柒佢呀！」
如果我冇記錯，當初係阿健自己走去add經理，同埋打咩柒人吖，你面對面嘅時候連唞氣大聲啲都唔敢啦！而且阿健永遠唔會反省自己有咩問題，點解你畀人鬧先？前因係咩？話張秀文搵水魚，話阿Bob扯皮條，你識佢哋咩？話193呃錢，你知佢間cafe點運作咩？話姜濤賣麥記廣告？早兩日先見你食緊喎！做咩講到你好似冇食麥記咁既？網上嘅人唔知啫，你身邊嘅人知吖嘛！咁清高真係過到自己？
其實阿健以前Facebook頭像係有相㗎，不過有一次又係唔知邊個page揀十大靚仔，有吳彥祖有陳冠希，而阿健就留言話：「呢啲都係靚仔？香港人係咪盲咗呀，吳彥祖而家頭髮稀疏到，陳冠希？變咗阿伯啦！」有啲網民見佢咁囂張，咪走去佢個Facebook account度起底囉……
有人喺阿健個留言下面cap返阿健頭像個樣出嚟，仲講咗句：「由你副尊容去批評吳彥祖同埋陳冠希唔靚仔，真係特別冇說服力🤣」
另一個留言就話阿健：「笑死人咩，你冇鏡都屙篤尿照下自己個樣啦！佢哋唔靚仔唔通你靚仔呀？」
仲有一個網民cap埋阿健Facebook其他相拼埋：「師兄，真心問，有冇人話你好似一個明星，同周星馳拍過戲㗎，嗰個明星叫咩名呢？呀，記得喇！蜥蜴仔呀！」
估下阿健有咩回應同埋反擊。（未完待續）
《辦公室日報》IG今日出咗post，睇咗未先？
https://www.instagram.com/p/Ccm-cQlrEHn/