相信大部分人都好鍾意聖誕節，不過我就剛剛相反，因為有一道陰影喺我人生之中驅之不散，最慘係每逢平安夜都會諗起。
2018年12月24日，星期一，平安夜並唔係紅日，當時我仲喺某銀行返工，上司Jacky早成兩個月前已經吹雞去卡拉OK搞party，呢啲大時大節其實令唔少同事有怨言，但礙於要畀面點都要出席下，約咗人嘅同事可能坐一陣就走，冇約人又冇拍拖嘅就自己留到最後。
多人去卡拉OK例牌出現一種情況－－－根本冇人認真唱歌，認真唱歌亦唔會有人聽，主力就係飲酒飲酒同飲酒，好多同事都玩得好放，包括我在內，因為Jacky帶住嘅幾條Team平時都要追數，大家嘅壓力好大，有人埋單自然要大釋放玩到盡。
全晚玩骰盅嘅我已經唔知飲咗幾多酒，堅係醉咗，成個人斜晒，不過酒醉尚有三分醒，仲記得所有同事陸陸續續離開，得返我同上司Jacky兩個，唔明點解佢又完全冇飲醉跡象，究竟係冇乜點飲定係酒量好就唔知喇，只記得佢埋完單之後用挑逗嘅語氣喺我耳仔邊講咗句：「去我屋企。」仲要一路講一路吹氣，我當堂打咗個冷震。
睇到呢度，你係咪以為呢個係甜故呢？其實我係男仔，而家過咗三張，即係當年得27歲，而我上司個名雖然叫Jacky，但佢係女人，唔知佢幾多歲，但40到尾至50頭一定走唔甩。
再睇到呢度，你應該仲會覺得係甜故係咪？甚至心諗27歲唔可以同40幾50歲嘅女人搞嘢咩？大把四十路五十路愛情動作片啦！啱嘅，年紀大嘅女人一樣可以有韻味，可惜Jacky唔係，佢唔止個名中性，連個外型都好中性，短頭髮，因為熱愛運動所以有啲健美小姐身型，平胸但有老鼠仔嗰隻，陽光膚色。
工作方面，Jacky平時做嘢都幾辣，但係條數真係好靚，一個女人可以lead幾條跑數team都唔簡單啦，據悉佢一直係單身，有種「等愛的女人」feel，不過有傳佢係Lesbian，未經證實，相信只係外型比較似tomboy，銀行班友就人云亦云。
呢份係我當年讀完大學之後第一份長工，女上司喺我耳仔邊吹住氣咁講：「去我屋企。」其實我係不知所措，say no又驚自己小人之心，或者Jacky純粹想我去抖抖呢！當時個頭好痛，因為飲得太多酒喇，朦朦朧朧間我就跟Jacky上咗的士。
喺的士上面Jacky撳咗我個頭落佢膊頭，一直來回摸我啲頭髮，真係好有姐弟戀feel，究竟佢係想照顧我呢個小弟弟定係準備食我嘅小弟弟呢？後來證實咗係後者……
坐完嗰程的士我開始有啲想嘔，成肚酒加埋個司機揸到一級方程式咁，真係搞唔掂呀！點知上到Jacky屋企連鞋都未除，佢已經一嘢咀咗落嚟，係呀係呀，我哋打茄輪呀！
Jacky一路強行伸條脷入我個口，一路用對手除我啲恤衫鈕……咩情況，好猴擒下喎！
唔係想落佢面，只係嗰陣好迷好暈，同埋成個人好熱，我推開Jacky問可唔可以開冷氣，依稀記得佢答咗句12月開咩冷氣之類嘅說話，然後我見到佢地下有把風扇，我走埋去拎起，大約講咗句唔開冷氣開風扇都好吖，真係好熱呀。
如果你仲覺得係甜故，咁記住睇埋落去，喺我拎起風扇想開咗佢之際，Jacky仲唔放過我，喺後面攬住我，隻手伸入我恤衫摸我個胸，今晚誓要吞咗我落肚咁嘅款，Sorry呀，我好唔爭氣喺腦海飄過一個念頭：「搞完女上司係咪會升職？有冇人工加？以後喺公司有冇特權？」
可惜我始終唔係做鴨嘅材料，有三樣嘢同一時間發生：
1）我開著咗風扇
2）Jacky開始錫同埋咬我耳仔
3）我嘔
我嘔落把風扇度，嗰把轉緊嘅風扇又將啲嘔吐物還返畀我，嚴格嚟講係飛埋去Jacky塊面同埋佢屋企四周，聽到Jacky成個彈開講英文：Oh! Shit! 我企喺度繼續拎住把風扇，再嘔多嘢，風扇又再將嘔吐物吹散落四周，我望一望Jacky，佢個樣除咗有少少污糟之外，表情亦由頭先好饑渴變成好嫌棄，我意識到事態嚴重，即刻話借個廁所洗面，估唔到最危急嘅關頭係把風扇救咗我。
問Jacky借廁所嗰陣，佢雖然面露不悅之色，但都有答我前面第二度門，點知我喺廁所清洗完出嚟之後，Jacky已經黑晒面冇再望我一眼，女人真係好善變，頭先仲摸我lin頭，10分鐘後同我講嘢都唔擰轉頭，咁又難怪嘅，因為Jacky痞咗喺地下好努力咁用塊布抹緊個廳。
我見個氣氛怪怪地，同Jack講咗聲唔好意思，佢冇睬我，然後我試下講個爛gag：「嘩，真係好似頭先玩骰盅咁，789，飲到嘔。」我自己笑，但佢冇笑。
連續講兩句嘢都冇應，我又講第三句：「不如我走先。」Jacky繼續冇回應，結果我自己去開門，臨尾回望咗一眼個風扇，啲嘔吐物仲未清潔，我講第四句嘢：「打搞晒！」然後閂門離開。
落到樓我根本唔知呢度係邊，隨手截架的士上車，當時上身因為清洗完所以好濕，加上有啲衣衫不整，我同司機講：「鑽石山龍蟠苑吖唔該，呀司機，請問呢度係咩地方？」我見司機喺倒後鏡望住我嘅眼神充滿疑惑，佢應該以為我係I.I. （非法入境者），語帶不屑咁答我：「呢度係深井。」
哦，深井，原來我上司Jacky住深井。
經過呢件事之後我同Jacky嘅關係有冇唔同？有呀！佢冇再喺office同我講過一句嘢，兜口兜面路過都唔望我唔打招呼，究竟係嬲我冇搞佢定係嬲我嘔呢？冇再深究喇，因為做多4個月左右我就離職，50%避佢啦，50%就真係想轉工，雖然已經冇做，但每逢平安夜我都會諗起呢單嘢，唔知Jacky會唔會每年平安夜都諗起我呢？
789，飲到嘔，平安夜，早啲抖！雖然我對聖誕有陰影，但都想祝大家聖誕快樂！🎄
🎅🏻 有時間follow埋我哋個IG吖，內容唔同㗎
https://www.instagram.com/officedailyhk/