放工路過有人嗌救命 以一敵三被扑到爆缸

之前冇工開,後來經朋友介紹去咗蘭桂坊一間Bar做侍應,時薪都頂住先啦,起碼唔會悶,而且晚晚好精彩,早兩個星期就刺激喇,我入埋醫院。

凌晨點幾鐘收工,仲有啲人三五成群圍喺街邊,有人齋傾偈,有人醉到嘔,有啲人就去七仔買啤酒飲都唔願走,突然有個女仔喺街頭喊住咁跑,神色好慌張,不斷嗌救命,後面仲有一個男人追住佢,再後面仲有另一對男女跟緊追上嚟。

喊晒嗰條女差二十步左右就跑到埋嚟我面前,不過佢仆低咗,仆到走晒光嗰隻,然後個男人就一手攬住佢條腰,扯個女仔起身,向返街口方向折返,期間條女不斷掙扎,繼續嗌救命,係咁喊,後面對男女截咗架的士仲開埋門,我見個男人好粗暴咁推個女仔上車,其實當時條街零零星星都有十幾人,全部得個望字冇人幫手。

見勢色不對,個女仔又未停過叫喊,仲愈叫愈淒涼,我好擔心佢畀人溶咗都唔知咩事,所以就快步追上去叫的士司機唔好開車,一手撥開個男人再拉返條女落嚟,有咩事講清楚先,話晒呢度都係香港,仲要係中環,當街當巷夾人走會唔會太誇張呀?

雖然我冇193,但都有190,而且失業之前就係做健身教練,所以都幾大件頭,個男人雖然同我推推撞撞,不過唔敢郁手打,因為我起碼高佢一個頭,佢又成條道友咁,真係要打咪睇下邊個蝕底囉!個男人同另外嗰對男女諗住人多蝦人少,而條女就keep住匿埋喺我後面喊,情緒失晒控係咁叫救命,混亂中我一手推到條道友跌落地,個的士佬可能怕惹麻煩,嗱嗱聲開車走。

正當我以為件事定咗落嚟,突然有硬物一嘢「亨」落我後腦,好大力搞到我好痛,俗語話滿天星斗就係咁解,堅係暈,而且下意識用手摸一摸個後腦係涼既,濕既,拎返隻手去前面一望,成手都係血,一秒間閃過係條道友嘅同黨偷襲,原來唔係呀!係我救嗰條女「亨」我㗎!

意識迷糊,只見條女一個箭步喺我身後繞返上前,衝去扶起畀我推跌嗰條道友,仲用好凌厲嘅眼神望過嚟鬧返我轉頭:「痴線㗎你!做乜打我條仔呀?」呢一刻我睇清楚兩件事:1)佢係用隻高跟鞋大大力「亨」我後腦,因為佢手上拎住隻除咗嘅鞋;2)呢單唔係拐帶或者非禮強姦,而係一單感情糾紛。

我好嬲,頭先係條女神色慌張喊住跑,不斷喊不斷嗌救命,我只係放工路過都不顧一切衝上嚟救人,仲以一敵三喺的士度拉返你落車,而家你竟然扑到我爆晒缸?好想衝埋去教訓佢哋,但係愈嚟愈暈,只能夠睇住班人再截另一部的士離開,臨尾仲見到條女同個道友打車輪,WTF!

同晚入咗醫院報埋警,過程同後續就唔多講喇,因為有啲嘢而家仲進行緊,返工間Bar個Bartender同事就同我講:「做得好好,不過下次唔好再做喇。」雖然佢有啲開玩笑潤我,但其實係出自關心嘅,同埋佢都分享咗一啲親身經歷。

Bartender:「夜場返工成日會見到呢啲場面,我喺呢度做咗6年,都試過枉作小人,有次條女畀人撳住喺地下係咁摑,摑咗5, 6巴左右,又係喊得好犀利,我埋去阻止,差啲同個男人打交,警察嚟到拉開我哋,後來先知嗰對男女係情侶關係,畀人摑咗5, 6巴條女話唔追究,純粹耍花槍喎!其實同你畀人扑穿頭單嘢一樣,如果條女畀人咁樣對待都不知自愛,係要返去啲垃圾身邊,咁咪由佢囉!呢度晚晚有人飲醉酒發癲,你理得幾多吖,一個打十個做英雄咩!宇宙最強葉問呀?」

我:「雖然好心著雷劈覺得自己傻仔,但唔通唔理咩。」

Bartender:「條街咁多CCTV,遇到呢啲情況我哋慣咗報警,再喺側邊睇住,差佬嚟到就拎住支啤酒行埋一二邊食花生。」

有時做好人真係好難,但又唔想被呢個世界同化,所以扑穿頭單嘢雖然好傻仔,不過時光倒流我都會救個女仔,因為你永遠唔知道邊次真邊次假,如果袖手旁觀而事後先知有人受侵犯,我個良心會過意唔去,上次單嘢覺得羞愧嘅應該係嗰對男女先啱。

暫時仲未搵到工呀,又唔想再做健身教練,唯有繼續喺Bar做住先啦,希望唔好再比我遇到呢啲事,最緊要每晚可以平安返到屋企。

投稿讀者:Roy

error: