天氣開始轉涼，我嘅心情亦開心返啲，因為著起長袖衫褲嘅時候冇咁熱冇咁辛苦，其實我係一個有濕疹嘅人，連搵份正常嘅工作都唔容易，生而為人，我很抱歉。
試過搵Office工，唔係有心隱瞞僱主，只係CV冇可能remark自己有濕疹，所以就算收到通知去interview，見工嘅時候都會被對方嫌棄。其實大部分HR已經好有禮貌，雖然佢哋嘅眼神好驚，不過都會完成埋個面試，冇下文就係意料之內。
曾經有一個極端嘅遭遇令我好傷心，有間公司喺我填form嘅時候已經被reception小姐眼望望，然後佢打內線叫另一個人出嚟，嗰個人同我講：「你唔使填喇，咁樣請唔到你㗎！你走先啦！」
又試過另一次比較窩心，個HR見到嗰陣完全冇驚，仲同我講：「我屋企人都有濕疹，主要喺腳，小腿嗰啲範圍，所以天氣乾燥就好麻煩。」
我：「其實小腿已經好好，因為我主要係手同埋頸，真係想遮都遮唔到。」
HR：「係咪好多人以為你會傳染畀佢哋呢？」
我：「係呀，好似生人勿近咁。」
HR：「我明，不過我寧願坦白，好過畀假希望你，就算你過到我呢關，line manager都唔會請，印象中之前都有個濕疹嘅人嚟interview，嗰次line manager唔要之餘仲鬧咗我一餐，話我好揀唔揀畀呢啲candidate佢見，希望你明白，我都同佢講咗濕疹唔會傳染，唔好有誤解。」
我：「多謝你咁坦白，曾經有朋友介紹我去佢公司做，不過佢啲同事話會唔會傳染都好，總之見到我啲濕疹就唔舒服，所以我完全理解。」
我冇怪HR，雖然佢屋企人都有濕疹，但因為請唔請一個人唔係佢話事，夾硬畀我過呢關，下一關second interview都係會有同樣遭遇。
後來我去咗做「外賣仔」，呢度還好，始終自己做自己嘢，去餐廳攞餐送餐，唔使同咩同事夾，就算香港大部分時間都好熱，之前仲三十幾度，我最多就長衫長褲，焗到出汗都唔想嚇親啲客，不過有一次都係畀個客睇到，因為遞嘢嘅時候，件衫點都會扯起咗，直至而家我仲記得個客講咩。
「嘩，你隻手生咩呀？咪傳染啲菌畀我呀！」
我：「唔好意思呀，我呢啲濕疹，不過唔會傳染㗎！」
「你梗係話唔會啦，唉，當我唔好彩，你拎返走！」
我：「拎返走？」
「見到你隻手都冇胃口食啦，直接丟咗盒飯啦，唔好丟去我呢層個垃圾房，丟落樓下，放心，我當收到外賣，唯有再order過，再嗌唔會又係你送㗎嘛！」
聽到佢咁講真係好難過，但我可以點呢？大吵大鬧？得到呢份工作已經唔容易，其實唔止文職唔請我，試過見便利店一樣畀人嫌棄。
最後我將個飯盒拎返走，途經垃圾站附近擺低咗，有隻狗行咗埋嚟自己摷自己食，都好吖，起碼我呢個被全世界嫌棄嘅人，仲可以為一隻流浪狗帶嚟溫飽。
有時我會諗，世界雖然好大，不過有冇容納自己嘅地方呢？其實天氣轉涼唔代表濕疹會好，只係著長衫冇咁辛苦，所以我一直都鍾意冬天，偏偏香港嘅冬天係咁短，凍嘅日子又咁少。
每次被人用奇怪同驚恐嘅目光注視，每次被人嫌棄同拒之門外，我個腦海都會浮現出呢句－－－生而為人，我很抱歉。
投稿讀者：Jack