唔知有冇人好似我咁，返一份新工過唔到試用期，然後覺得自己好廢。
之前搵到份新工，我真係好畀心機做，冇遲到過，一個星期仲有兩三晚OT，上司叫我做嘅嘢冇甩過，對所有人都客客氣氣，自問就算唔突出，都肯定冇令任何人失望，亦從來冇要人執手尾。
人際關係方面，可能我算有禮貌，其實上司都幾鍾意我，另外同成班同事都friend，除咗平時一齊食lunch，我哋仲試過放咗工去食飯睇戲，唔係刻意要討好佢哋，只係自己性格比較外向，不嬲鍾意熱鬧同埋合群。
不過自我感覺良好係冇用，做咗兩個半月之後，某個下晝突然畀上司叫入房，佢話：「同你講少少嘢，唔好唔開心，公司決定唔轉你做正式員工，不過你聽我講，唔係你有問題，純粹係上頭決定。」
我：「點解呀？係咪我有地方做得唔好？」
「唔係你唔好，喺我眼中你做得好好，純粹係架構上嘅問題，唔關你工作表現嘅事，所以我都唔好意思。」
我：「有冇機會用合約或者part-time形式留低？我真係好鍾意呢份工。」
其實當時失望透頂，仲覺得自己好厚面皮，人哋都話唔留我，但仍然堅持想留低。
「公司冇用合約形式請人嘅慣例，咁樣啦，我應承你，如果將來再有位，我第一時間通知你，連招聘廣告都唔出，真㗎，信我。」
講到咁，唔通死纏爛打咩，嗰陣因為唔知道真正原因，所以成個人都好down，應該點形容呢，即係一件事你冇盡力，然後畀人淘汰出局，你就算覺得幾唔甘心都會認命，不過我喺新公司呢兩個幾月事事做足100分，工作上永無say no，又合群，最終仍不獲留用，連試用期都過唔到，嗰種感覺係極度挫敗，甚至懷疑同嫌棄自己，因為幾盡力都好，原來人哋一直覺得你冇資格留低。
同事好好呀，有同我farewell，佢哋都唔明點解我會過唔到試用期，仲話喺呢間公司未見過有人過唔到probation，明白大家只係替我唔抵，只係聽到呢句嘅時候內心更難受，換言之我係差過晒以前所有嘅新入職員工。
消沉咗一排，唯有繼續搵工，後來呢班舊同事話返畀我知，原來老細介紹咗個人入嚟做，係一個同我年紀差唔多嘅男仔，正正就係做我個位，成件事終於有啲頭緒。
雖然冇正式公開係咩關係，但幾個同事都見過老細唔止一次行埋去個男仔度，雙方言談甚歡，以前老細係絕對唔會行埋去我個department，亦有人聽到老細叫個男仔幫手問候佢爸爸媽媽，至於係親戚定係世叔伯嘅仔女就冇人知喇，只知道老細喺兩個星期內叫咗呢個男仔出去食3次lunch，連我前上司都冇份出席。
聽講個男仔並冇利用自己嘅特殊身份也文也武，overall好nice，只係我個舊上司唔敢畀嘢佢做，所以其他同事比起之前忙咗，如無意外舊上司係知道啲嘢，但始終唔可以反對老細欽點嘅人選，相信佢都係身不由己。
人哋有冇背景同埋關係都好，呢啲嘢唔喺我控制範圍之內，只係當日做到滿分都冇得留低，前上司又冇辦法話我知個實情，所以有一段時間好唔開心，以為自己嘅工作能力真係咁不濟，好在目前已經搵到工喇。
有舊同事話個男仔似乎只係過下日辰，睇落唔會做得耐，仲問如果前上司叫我返去會唔會考慮？其實邊有咁多如果吖，而且見過鬼都怕黑，再返去好冇安全感，試問有邊個想返一份朝不保夕嘅工呢！點都好啦，知道咗個原因之後，成個人總算釋懷，起碼唔會覺得自己咁冇用。
投稿讀者：Victor