魂魄未齊已經收到個客電話：「幫我問下Jacky仲係咪搵緊工？下星期返工得唔得？」
我：「邊個Jacky？返咩工？」
客：「上次個Jacky呀！Marketing個Position，經理拍咗板喇。」
我真係唔記得邊個Jacky，check返啲 email先。嘩！5個月前喎，你咁耐先決定請？
客：「經理好忙吖嘛。」
好忙？咁呢5個月有冇時間食飯屙屎瞓覺呀？我覺得一間公司處理事情要用咁長時間，來來去去得幾個原因：
1)入面嘅人好卸膊，啲嘢推嚟推去。
2)上上下下嘅工作效率好低。
3)公司文化好迂腐。
以上特徵可以參考我哋嘅政府部門。
我：「Jacky去咗第二間公司，佢話而家好開心，又適應咗環境，好禮貌咁表示唔考慮喇。」
客：「吓，唔考慮？佢搵到工嗱？做乜唔等我哋Offer呀？」
「……」
個客好驚訝Jacky冇等，我好驚訝個客認為Jacky要等。
「莫道你在選擇人，人亦能選擇你。」個客認為Jacky應該等，因為佢冇企喺求職者嘅角度諗，當自己公司係世界中心。