點解跳槽比留職人工加得多 #職場Gossip

喺討論區見到一個post,有網友問點解跳槽比留職人工加得多?啲留言答得好抵死,但其實又啱㗎喎,例如:

「溝咗既女就唔再上心」
我諗呢句應該有唔少女士認同,男士都認同嘅,不過唔敢大聲講🙈

另一個留言就用反問方式解答:

「咁點解寬頻續約會貴過新客?」
每一次我個page賣寬頻廣告,都一定有留言講呢樣嘢,成日見到:「我用緊呢個台喎,點解舊客冇優惠,新客就送嘢兼減價呀?」🙈🙈麻煩你問返電訊供應商吖。

仲有一個留言係咁講:

「聽過老細話,喺同一間公司就算升職唔應該加佢太多人工,反而出面請人就理應開高價請,其實咪講緊留喺到做等升嘅“忠誠員工”係傻9。」

另一個留言就話:

「做多幾間公司既經驗係好重要其實,轉工同升職加既人工唔一樣係好正常,你諗下個動機就明,轉工,人地需要呢個人,人工實會梳爽;升職,純粹係表示獎勵,喺老闆角度係expense.」

我講下自己見聞吖,有個好熟嘅朋友,佢做HR,一腳踢嗰隻,畢業之後開始做,一做就7年半,由青春少艾做到變中女,臨走嗰陣人工係$21000,由於工作量愈嚟愈大,佢要求老細請多個人,一係就加薪,老細兩樣都唔肯,我朋友終於的起心肝跳出comfort zone.

跳槽後嗰份工$28000,做咗一年半再轉,人工變咗$32000,做多兩年,人工加到$36000,後來佢又一次轉工,而家做緊嗰份係$42000. 佢份糧由$21000跳到$42000,期間用咗5年時間,title當然亦升咗。可能好多人喺5年間嘅人工升幅更多,但有一樣嘢可以肯定,就係佢留喺舊公司繼續做,5年後一定唔會有呢個增長。

當然,佢舊公司本身份糧就below market price,所以前後差距先會咁大。

又講下佢舊公司後來點吖(即係第一間$21000嗰份),佢哋請到個$19000嘅人,但嗰個女仔做唔掂,因為workload好重,所以公司再請多一個人,同樣係$19000,Total用兩個人去replace我朋友,總共盛惠$38000,點解走咗都咁清楚?是咁的,兩個replacement太多甩漏,老細間唔中會打畀我朋友問返啲嘢。

係咪以為佢老細有悔意呢?聽講又冇喎,就算後悔都唔講出口啦!我覺得時光倒流的話,佢老細一樣唔會大幅加人工畀我朋友,因為感覺上唔抵吖嘛,你拎開$21000,唔好話加到你$42000啦,加到你$25000都覺得肉赤,老細嘅心理就係咁。

「魚唔過塘唔肥」呢句係老土啲,不過喺職場上老是常出現。

#職場Gossip

error: