蔬果斷食法減肥有冇效 餐單與體驗分享

是咁的,小弟即將要進行生酮飲食喇,但係之前同大家講過我試蔬果斷食法,所以好好醜醜都要做返個總結先。

蔬果斷食法呢個主題係幾難寫,因為外面嘅聲音好兩極,一係讚,一係彈,冇中間,以下體驗純屬個人感受,如有得罪多多見諒。

呢個蔬果斷食法係由朋友介紹,而其實藝人蕭徽勇喺一篇2019年嘅Topick訪問中都有透露過,當時刊登出嚟嘅餐單係咁:

羽衣甘藍(4棵)、西芹(2根)、苦瓜(半條)、青瓜(一條)、蘋果(一個)、檸檬(半個連皮)、薑(適量)。

而朋友畀我嘅其中一個餐單就係咁:

羽衣甘藍 7塊、甘筍 6 條、西芹 1束 、青瓜 3條、冬瓜 半個、蘋果 1 個、檸檬 1 個、梨 1 個、菠蘿 10塊。

如果你問我效果,我可以答你蔬果斷食法基本上係即瘦,雖然佢話要堅持一段日子,但係同做運動或者其他飲食法唔同嘅係-----你真係冇食任何固體嘢。幾個月後係一個好穩定嘅效果(有指隨後會反彈得更勁,不過我冇完成整個階段,故不便評論),而進行幾日之後已經見到肚腩細咗,係超級明顯。

你問我會唔會好肚餓?梗係會啦!你問我有冇手軟腳軟?又未至於,但因為冇進食固體食物,所以全日都唔夠精神,個人而言喺工作上較難集中。

蔬果斷食法我只係維持咗兩個星期,放棄嘅原因唔係太餓,而係因為太麻煩,我冇時間。

唔好睇少呢種飲食法唔使開爐煮嘢,初初我都以為好easy,但其實每樣蔬果要洗要切係幾花時間㗎!你一定會話:「煮咩都要洗要切啦大哥!」啱,不過我唔係煮兩碟餸或者煮個麵,我份餐單有9樣蔬果,又要洗又要切細,真係做到hihi,煮兩味餸快好多。

榨汁係最好玩,只要有部可以隔渣嘅榨汁機就得㗎喇,但係比hihi更hihi嘅係-----洗榨汁機!

有榨過汁嘅朋友應該知道,唔係就咁洗兩洗,好多部分要拆開洗,有啲位更加用手洗唔到,要用刷,我洗到厭世呀!試過問朋友:「我每日最少要take兩個鐘做上面啲嘢,係咪手腳太慢?」朋友話佢都差唔多,未計買齊以上蔬果嘅時間,我樓下間超市已經冇羽衣甘藍。

仲有呢……唔好以為冇肉,齋買蔬果就好平喎,成本唔低㗎!

總括嚟講,蔬果斷食法我認為真係減到,但我嫌太麻煩太浪費時間而放棄咗(純粹個人時間分配同取態,蔬果斷食法信徒冷靜,冇惡意,頭盔一戴再戴),而講到健康問題,我驗證唔到,始終冇完完整整進行一個周期,但網上有唔少批評聲音,蘋果日報喺2020年7月就搵過營養師謝詠瑩做訪問,對方話如果10分係滿分,佢只會畀呢種方法1分;Topick亦有另一篇文章搵養和醫院高級營養師陳勁芝傾過,佢話蔬果斷食法有機會出現以下問題,包括正常細胞餓死、缺蛋白質更難抗病、或致脫髮皮膚亁,仲有「 假減肥」易反彈。

介紹我嗰位朋友早幾日話自己突然大量甩頭髮,由於佢仲有個friend又係同一時間用呢種方法減肥,兩人都不約而同話甩多咗好多頭髮,而且皮膚有敏感症狀,佢哋認為太巧合,應該真係同飲食法有關連。我唔敢妄下定論,始終我維持得兩個星期咁大把,冇朋友咁熱血,但對照返營養師篇訪問,似乎唔係空穴來風。

Anyway,如果減肥減到甩頭髮,咁我寧願做一個有頭髮嘅肥仔。

error: