公司有人偷文具其實唔係咩新鮮事，但你有冇見過連廁紙都偷吖？我哋公司買文具不嬲冇限制，膠紙、改錯帶、File、原子筆等等消耗得比較快嘅絕對唔會慳，但後來啲嘢陰啲陰啲唔見，離譜到連膠紙座同鉛筆刨呢啲又大又重嘅文具都有人偷，你話係咪吹脹！
好多同事已經自發性貼label喺文具度，諗住啲筆呀、改錯帶呀、計數機呀，就算唔知點解「有腳走咗去」，都可以跟住啲label相認，不過情況始終冇改善，因為唔見咗嘅文具係連屍骸都搵唔返。
有一排我哋Admin出通告，話文具訂得太多太快，叫同事注意下，初時大家都當我哋係臭四，直至公司冇晒廁紙用，班友仔終於知道有幾嚴重。
記唔記得上年疫情最困擾嗰陣，超市咪出現過廁紙荒嘅，當時我哋好老定㗎，因為公司存貨夠，咁就無謂喪失理智狂訂啦，但你點估到將啲廁紙擺喺Pantry個櫃都有人偷吖！
係咪想問公司棟大廈嘅廁所點解會冇廁紙呢？係有嘅，大廈洗手間有嗰種好大卷，「鞋」到冇人想用嘅平價廁紙，問題係大廈廁紙都有人偷呀，死未？其實咁大餅點運走呢？我都好想知有咩技巧。
有一次，某同事部電腦有問題，IT拆咗個hard disk出嚟，就咁擺埋一邊之嘛，過咗一日連hard disk都冇埋，所以我平時都唔敢將銀包電話擺喺枱面！
老細見我哋啲文具同廁紙去得太快，後來落咗order只准訂cheap嘢，文具就冇乜影響嘅，但廁紙影響就大喇，真係有啲「鞋」到草紙咁，抺完屎忽都出血，從此冇好日子過。
我哋Admin研究過，唔明呢個賊偷咁多文具做乜？用得晒咩？最搞鬼係個鉛筆刨，已經好少公司用鉛筆啦，所以全office得一個，冇乜人用都可以唔見埋，後來我喺屋企拎咗私伙鉛筆刨返嚟，舊式大大個嗰種，反正畢業後都用唔著，不如環保啲攞返公司用啦，最後發展到連呢個鉛筆刨都畀人偷埋，唉，有我學生時代嘅回憶㗎，咁冇陰公呀！
另一位Admin同事話：「你估個賊仔係咪賣出去呢？」
我：「邊有人要呀？原子筆都唔值錢，廁紙都好平啫，喺嗰陣有人搶之嘛！」
「其實咩為之值錢，人人定義唔同，有人覺得幾蚊唔係錢，有人會睇到一蚊係月球咁大。」
又啱喎，佩服我同事，佢一諗就諗到Carousell，話如果想散貨，照計會去呢類拍賣網，咁我哋就search下啦，原來都有好多人賣文具，而我竟然見到一個似曾相識嘅鉛筆刨……
個賣家有好多listing，佢將啲文具一pack一pack咁賣，例如5支筆+膠紙+較剪+改錯帶，簡直係商業奇才，不過咁，文具就來來去去嗰啲牌子同款頭，我哋都唔可以咁武斷嘅，雖然100％肯定個鉛筆刨係我嘅。
開個account同賣家溝通，扮訂貨約佢出嚟面交，再同老細備案，因為捉唔捉到賊都好，唔該Claim返錢畀我。
面交當日，我叫男朋友代我去港鐵站交收，我同另一位Admin同事連港鐵站都唔入，始終我哋在明佢在暗，如果賣家真係公司人，費事喺個站見到啦！男友WhatsApp打定個「1」字，見到賣家先至撳掣send畀我，我同另一位Admin收到msg就狗衝落港鐵站，叫咗男友扮check貨拖延時間。
衝到落去，果然係我哋公司嘅人，佢係Shipping嗰邊嘅女同事，三十幾歲，平時唔起眼，真係估你唔到。
我哋現身之後，嗰位女同事驚到好似見鬼一樣，我質問佢做咩拎公司啲嘢出嚟賣，佢初時死口唔認，話呢啲係自己嘅貨，我拎住個鉛筆刨話呢樣嘢係自己嘅私伙，係咪仲要抵賴？然後佢終於認啲文具係偷公司，重複又重複話會賠返晒啲錢出嚟，希望我哋唔好報警。
第二日同老細講，大家都冇打算報警，亦唔知佢應該賠幾多，所以條件得兩個：
1）佢自己辭職
2）即日攞返個hard disk還畀公司，因為怕裡面有資料外洩，好在佢仲未賣走個hard disk咋，如果唔係件事仲麻煩。
家賊就捉到喇，不過廁紙仲未upgrade返，而家仲係訂緊好「鞋」嗰隻廁紙，真係用A4紙抺都冇咁嬲，所以一粒老鼠屎，真係會搞串成個Party！
投稿讀者 ：忽必烈