《診所低能奇觀》專欄 新年假期安排

有日一位先生嚟到診所。

佢行埋嚟登記處問我:「喂,點呀最近?」

仲返緊工,冇咩點。

我:「係咪睇醫生呀?係嘅話俾身分證我登記呀」

佢:「今年係咪都係年中無休呀?」

你就年中無休。

我:「初一至初四唔開嘅,初五正常應診」

佢:「咁我寫定初一至初四假紙啦」

你終於肯入正題啦咩?

我:「你俾身分證我登記先啦,俾醫生睇咗先,醫生認為你需要放假休息就會寫病假紙俾你」

佢:「寫定初一至初四得呀嘛?我想嚟睇㗎,你哋唔開我都冇計」

我:「寫幾多日唔係我話事,要由醫生決定,你一陣入房再醫生講呀」

佢:「即係OK啦?OK!俾你登記啦!」

我拎住佢張身分證登記,佢一直問我:「係咪寫幾多日都得㗎?新年流流唔想嚟診所㗎我」

頭先又話想嚟睇,而家又話唔想嚟,點呀你,你條嘢揈完未呀?

我:「一陣同醫生講啦,我唔係醫生唔會答到你」

最後入到醫生房,佢好快又出返嚟。

佢一出嚟就鬧我:「初一至初四唔係唔開咩?唔開又唔寫定假俾我?咁我呢幾日去邊睇呀?有冇搞錯呀你?」

點解你喺醫生房入面唔咁樣炳醫生呀?頭先喺醫生房入面低聲下氣咁做咩呀?

我:「寫幾多日病假醫生決定嘅,你係咪要入返房再問醫生呀?係嘅你等等呀,我同醫生講聲」

佢制止我:「唔好唔好,你唔好咁你唔好咁,我驚佢連今日都唔開俾我,冇事冇事,我呻吓啫」

我坐返低:「哦~」

佢細細聲問:「初一至初四我點算呀?我唔想返工呀,你哋真係唔開㗎?」

我都唔想返工呀!

我:「唔開呀,你到時睇吓有冇其他診所開啦」

佢:「你寫多幾日俾我咪大家方便大家好做人囉!」

我:「係咪要再問醫生呀?」

佢:「唔好唔好,講咗唔好咁㗎啦你,冇講過嘢冇講過嘢」

係就最好啦。

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: