投稿讀者：Wing子
我老細宣布唔租office，2021全年work from home，起初以為佢只係講下，點知係認真。
成件事起因係office租約期滿，咁我哋就打算續租啦，想強調一下，我哋完全冇要求過業主減租，但對方竟然仲要加租20%，疫情反反覆覆之下，公司生意已經大不如前，原價續租簽新約算係咁啦，不過業主企得好硬，話相信政府引入疫苗同埋推健康碼之後可以控制疫情，所以唔希望租金原地踏步，有信心等到農曆新年後可以加價租出去，如果同我哋原價簽新租約的話，即係未來一兩年嘅租金收入冇增長喎。
我哋公司今年已經好吃力，老實講根本係死捱，再加租等於雪上加霜，老細嬲嬲地話反正呢一年已經幾次wfh，不如2021索性唔租office。
我哋比其他公司home office嘅日子更多，最大原因係公司棟大廈較早前有人確診，老細唔想同事出出入入搭電梯時中招，所以除咗嗰4波疫情之外，我哋仲額外wfh一段時間，最長嗰次個半月，最短嗰次都三星期，不過今次應該係無了期喇，老細話既然公司生意差咗，與其裁員令到同事唔開心，不如退租仲實際，每月慳成接近6位數嘅租金用嚟出糧好過益無良業主。
贊成並非因為唔需要返office，而係老細都分析得好好，我哋公司主力賣service，唔係賣product，而且好少客會上嚟公司，一般見客都係我哋去人哋office，加上賣service唔使存貨，唔使showroom，坦白講真係行得通，最大障礙只係員工夠唔夠自律，即係唔好辦公時間去咗行山，行山都算喇，唔好post出嚟，大家識做。
公司因為第四波疫情，本身已經宣布work from home直至聖誕前兩日，而家直情唔使喇，只要求同事返去半日pack好啲嘢，公司嘅電腦允許同事拎返屋企工作，大家只要pack好個箱，再寫低地址，我哋就會搵速遞送到同事府上，同埋未來一年如果離職，呢啲公司資產就麻煩要歸還，就係咁簡單。
至於同事全年work from home會唔會自律，老細都好有人性咁講：「其實stay home隨時仲忙，又冇lunch time又冇收工時間，加上公司畀唔到一個舒適環境大家工作，作為老細好慚愧先真，所以唔擔心同事會偷懶，希望大家2021 home office努力啲，將來市道好返，2022年再租間大啲同靚啲嘅office。」
老細咁講，乜都抵啦！
本來最大嘅問題係收信同收件，最終老細租咗個收信地址（香港好多公司幫人收信，再轉寄去你個地址），而公司直線就會分別駁去各同事手機，假設嚟緊有咩事要一齊傾或者開會，我哋連嗰啲共享office同埋workplace都搵埋，有需要就逐次租，以後每月慳返啲租金，唔使裁員，唔使益無良業主，其實真係一件好事，但我知唔係間間公司都有呢個條件，特別係賣product嘅公司，總之希望人人都搵到自己嘅方法度過難關。
2021就開始全年work from home喇，到時再同你update，至於相信政府嗰位業主，祝佢「好運」啦！