公司裁員要交名 上司自己食肥雞餐保下屬

朋友公司裁員,每個department要交2至5個人名出嚟(視乎不同部門人手),成件事早個半月通知晒各部門主管,等佢哋可以有充足時間處理。

唔同部門嘅主管有唔同嘅處理手法,有人選擇剔走冇家室嘅同事,盡量畀屋企有大有細嘅同事留低;有人就選擇留年資較耐嘅老員工,寧願交多1至2個junior同事出嚟拉勻條數,想棄車保帥;有人閂埋房門同下屬開會,如果有人願意食肥雞餐可以自己「報名」。

我朋友嗰team要交4個人名出嚟,佢阿head嘅決定係……自己舉手食肥雞餐。

呢位department head份糧可以一個頂兩個半下屬,拉上補下算係勉強保住3個員工,老細最初唔肯,但佢阿head話自己等錢使,加上近年太攰,希望休息一段時間,堅持要食呢份肥雞餐,糾纏咗幾日,老細終於成人之美。

佢阿head一條命救3個,但仲未夠數,因為差一個人名,呢一round到我朋友舉手,佢話自己單身寡仔,住公屋唔使供樓,而且計年齡亦係全team最後生,有信心搵到新工,不過佢阿head好快已經有行動,幫手鋪路聯絡咗幾個熟客,終於搵到一間公司需要請人,然後穿針引線介紹咗我朋友過去做,換言之班下屬人人有工返,得阿head自己前景未明。

我朋友想藉呢個post多謝佢阿head,一命救全team,又為佢搭晒路,深深體會到有個好上司真係勝過做大公司。

呢段日子聽到好多裁員新聞,其實受影響嘅員工又點會唔明白係受疫情拖累吖,佢哋最唔開心係管理層嘅處理方式同態度,畢竟保就業計劃嘅最大得利益者係公司同老闆,絕對唔係打工仔,呢個時勢冇咗份工可謂雪上加霜。冇可能要求一班管理層好似我朋友個上司咁偉大,畢竟社會上每個人都有自己嘅壓力同負擔,但如果真係出現裁員嘅情況,至少都畀返員工應有嘅尊重,又或者盡力提供協助。

最後,希望我朋友個上司盡快有著落,雖然我唔識佢,亦唔知佢有咩打算,但好人係應該要有好報。

error: