辭職信有email留底 保障自己免爭拗

投稿讀者:Daniel

我搵咗份新工,薪酬多咗,福利好咗,人望高處自然決定轉工,print咗封辭職信出嚟親自畀上司,入到房被佢極力挽留,都係嗰啲對話啦,佢叫我後生仔唔好向錢看,又話做生不如做熟,下年再幫我爭取加人工之類。

其實我唔需要佢爭取,因為新工作嘅升幅已經好吸引,同埋除咗錢之外,新公司個品牌都係自己好鍾意,最終擾擾攘攘一輪,上司收咗封辭職信,叫我再三考慮,我臨離開佢間房最後一句就係:「唔喇,多謝你留我,不過真係想有新發展,嚟緊請大家食餐飯答謝啦!」

呢段時間差唔多每位同事都知我辭職會走,我亦都同新公司傾好晒返工日期,甚至已經分別同其他部門嘅同事食飯道別,去到last day前幾日,輪到我請上司同埋自己department嘅人食飯,上司竟然問返我轉頭:「今日last day喇咩?我記得冇咁快㗎喎!」

「今個星期五last day喇,你唔係唔記得呀?」

「你唔提我?」

「吓!成封辭職信畀咗你,仲點提你呀?」

「咁我都要請人代你㗎,你明知我唔記得都唔問?」

「唔通我問你做咩唔請人代我呀?咁樣問好似覺得我自己好重要咁,而且我點知你係咪唔想我接觸新同事,隔離department都唔鍾意畀就嚟走嘅人去train新人,我哋個部門又冇晒吉位坐。」

「喂,咁你要同人事部講喎!」

「我同人事部講?我畀咗辭職信你㗎喎,唔係你交畀人事部咩?」

結果當日lunch都冇食,我即刻衝上一層去人事部問清楚(公司有3層),HR話我上司冇交代過我會離職,亦冇收到封辭職信,照正路星期五last day就要賠人工早走……唔X係呀!!!!

最賴皮係上司雖然承認有收我封辭職信,但就不斷質疑我唔係3號嗰日遞,係上星期先遞,仲叫我做多兩個星期先走,否則唔知點同大老闆交代,唔X係啩!!!!

後來呢單嘢搞咗成個下晝都冇結果,公司個HR已經好好,佢話冇收過都唔緊要,而家叫我上司拎返出嚟,仍然可以照跟返封信上面個日期,至於離職手續就好簡單,頂盡係封reference letter遲啲寄返畀我。

其實我上司唔見咗封信唔係最緊要,只要佢確認我係3號遞就得喇,HR話公司一樣會畀我走,問題係我上司死都話唔係3號,HR想幫我但夾喺中間都好難做。

我好嬲自己!我錯!應該一封辭職信畀上司,一封畀人事部,當時心諗禮貌上應該同上司講resign,再由佢pass封信去人事部,我純粹唔想跨越佢去辭職,最後證明我呢種做法同埋顧慮係錯,自己搵自己笨柒。

呢件事糾纏咗兩日,我亦同上司攤牌,因為再下個星期一就返新工,我唔會因為佢掉失封辭職信就遲兩個星期走,更加唔會賠錢走,總之星期五就係我last day,係咁多!上司竟然話我不負責任,又話我好賴皮,明明唔係3號遞信。

估唔到一場賓主關係,最後會因為呢啲低級錯誤搞到氣氛咁僵。

不顧一切星期五last day,補返同自己department同事食飯,上司拒絕出席,算數!

返新工之後幾日,我收到HR寄嚟嘅reference letter,我順便打返去同幫我個HR講多謝,佢同我講咗兩件事,首先係將來辭職一係email,一係畀多封信人事部,再唔係就要同HR跟進,因為有啲上司真係會隔幾日先pass出嚟。

另一件事係,我走咗之後,嗰位上司將我當日封辭職信pass咗畀HR,上面個日子的確係寫住3號,究竟佢係有心定無意呢?點都好,當日搞到我一頭煙,又屈我唔係3號遞信,我只知道佢係一隻食屎狗。

error: