有朋友分享咗一啲職場心理學，我同幾位同事做過測試，開估結果之前，不如你都睇下認唔認同。
👉 假設有人不斷同你發牢騷或者講無聊嘢，係咁阻住你工作，而你又插唔到嘴，呢個時候只要跌支筆落地（較剪或者釘書機都得），烏低身執起嗰陣順便講句嘢，咁你就可以成功打斷對方同埋轉話題，全程非常自然。
👉 覺得有個人係咁望住你，但又唔敢肯定，呢個時候只要睇一睇隻錶，如果對方真係有注視你，佢好自然都會睇一睇自己隻錶。
👉 去Interview之前如果可以搵個陌生人傾計，只要傾10至15分鐘左右，你嘅心情就會好放鬆，怯場嘅機會大大減低，對見工有幫助。
👉 當你老細或者上司鬧你，你可以嘗試坐近或者靠近佢，兩個人嘅距離近咗，佢鬧你都會鬧得唔舒服，自自然然會溫和啲。
👉 一個人想唔想同你傾計，可以睇佢對腳，如果你行埋去講嘢，佢只係身體或者塊面擰過嚟，對腳（特別係腳尖）冇跟住你嘅方向轉埋嚟，即係代表佢想自己靜下，或者準備起身走。
Ok，講下測試結果先，第一點我試過，唔work，我跌完筆對方都繼續講，甚至期間有人打電話畀我，條友等我講完電話仲繼續個話題，相信呢招唔係對每一個人都行得通，不過我同事話跌嘢其實係work，唔止令一個人收聲，仲可以一次過令全車人靜晒。
我：「咁勁？」
同事：「係呀，早兩日我跌咗部iPhone Pro Max落地，砰嘭好大聲，全車靜晒，最主要係睇你跌咩啦！」
至於睇錶去測試人哋有冇望住自己，由於我唔戴錶所以試唔到，但個人認為有更簡單嘅方法，就係打個喊露，因為打喊露真係會傳染，對方有望住你一定會跟住打。
而Interview之前搵個陌生人傾計15分鐘就有少少難度，女仔可能易啲，男仔好難喺街同人搭訕，異性當你色狼（主要係睇樣啦），同性唔會睬你，最直接應該係搵間舖頭同Sales傾計。其實見工想唔緊張同埋唔怯場，我會建議早少少上去人哋公司坐一坐，望一望，感受下個環境自然會定啲，所以唔使咁複雜嘅。
對於畀上司同埋老細鬧緊，坐近啲可以令對方溫和啲，我有朋友試過之後話完全唔work，佢老細更加扯火，劈頭就話：「你坐咁埋把鬼呀！彈開啲啦！你唔驚武肺啫，我驚呀！」
唯一覺得最準係同人講嘢嘅時候，對方雙腳同埋腳尖冇跟埋上半身轉過嚟，其實代表唔想講甚至係想鬆人，呢個係幾準確嘅，完全係心理上唔想投入話題，或者對話題冇興趣嘅反射。
其實所謂職場心理學都係一啲經驗嘅累積，對住唔同嘅公司、唔同嘅環境、唔同嘅老細，仲有唔同嘅同事，處理同埋運用上都要靈活變通，我有幾個職場心理測驗反而幾準，嚟緊同大家一齊玩下吖！