當年去咗一間公司做，返得一個月都唔夠，已經意識到氣氛唔多對路，主要係嗰位上司對員工好苛刻，而且好多要求都唔合理，唯一慶幸係身邊班同事傾得埋，通常一間公司個老細同管理層唔掂，下面嗰班都係特別團結。
某日返到公司，有位同事被上司無理解僱，各人群情洶湧，其中一位同事問我：「我哋全team 7個打算集體辭職，不過你剛剛嚟一個月，所以你自己決定啦！」
我：「梗係共同進退啦！」
「坦白講，雖然平時啱傾啱玩，但係返工始終係搵食，你唔需要因為同我哋friend而有壓力，我哋唔想情緒勒索，你真係可以留低。」
我：「唔係跟風跟大隊，我哋阿頭平時啲態度同埋處事方式的確有眼睇，留低都冇好日子過啦。」
結果我呢個新丁真係跟住走，但係有兩個同事最終選擇U Turn留低，原因係諗諗下唔想搞到咁僵。
每個人都有唔同嘅包袱，或者嗰兩位同事有各自嘅經濟負擔同考慮，所以先決定最後一刻變卦，其他人亦冇嬲佢兩個。
大約過咗3個月，當日留低嗰兩位同事突然喺WhatsApp group send 咗句message出嚟：「想問下大家，之前你哋辭職，公司有冇得畀你哋揀扣假早走？而家佢哋話冇option，啲大假最多補錢，唔會畀我哋提早走，我唔想坐足一個月呀，好難捱。」
當日集體辭職，為嘅唔止係一啖氣，而係我哋好清楚知道，如果呢種姿態反映唔到出嚟，留低亦冇好日子過，因為掌權者知道你哋根本唔團結，加上唔聽話嗰班已經走晒，剩低嘅人自然不足為患，嗰兩位同事後來resign被留難，已經應驗咗呢個講法。
總辭，除咗包含風骨，仲係一種姿態，勇氣、決心、團結，決一不可。最老土嘅講法就係：「一枝竹仔會易折彎，幾枝竹一扎斷節難。」
見到有線將《新聞刺針》全組人炒晒，然後引發其他部組同事辭職抗議，不得不佩服佢哋嘅風骨同埋團結，須知道今時今日總辭，搵工嘅難度係遠遠高過我當年。
再重申一次，辦公室日報雖然唔係大公司，亦唔係一份實體報紙，但真係需要編輯、美術、剪片，仲有拍攝嘅人才，即使呢度提供唔到一份full time出嚟，我哋都好需要freelance幫忙，係你哋幫我，唔係我幫你哋，記得inbox過嚟。