投稿讀者：阿朗
之前喺一間幫人度身訂造贈品嘅公司返工，即係有時去申請信用卡會送支筆畀你呀，又或者有啲品牌搞活動會送個環保袋呀，我嗰間公司專門做呢類生意，sourcing啲貨再印客人嘅logo之類，而我就係行街sales，要出去見客。
出去見客自然要claim車錢，睇你一個下晝去幾多地方啦，通常我哋啲sales會group埋晒一區咁去，有時都會去唔同區，所以每日車費平均10幾蚊至40蚊左右，一般坐巴士地鐵，唔會搭的士，每個月加埋約莫claim 300幾至500蚊車費。
本身公司claim錢流程已經好慢，填form交form，等老細簽名，然後由一個老臣子阿嬸畀返張嘢我哋簽，跟住先可以拎返錢，claim錢係收cash，我都唔明點解次次都要3個月咁耐。後來我辭職，去到last day當日都收唔返之前3個月要claim嘅車錢，幫公司搞claim錢同埋出Petty Cash個阿嬸話冇辦法，不嬲要等老細check完先ok，叫我之後再返嚟拎。
我已經有新工，第日要再返嚟拎呢筆車錢真心煩，不過費事同佢哋嘈，初初嘅諗法係好嚟好去。
離職時公司欠我$1075車費，搞足半年仲未收到，期間打返去問仲要話老細未批，咩事呀？走咗半年都批唔到$1075車錢？填晒form好清楚㗎喎！
有人勸過我算數，$1075唔係多錢無謂勞氣，不過我認為唔係多與少嘅問題，係公義同原則問題，我付出嘅亦唔止$1075，仲有當日周圍去sell客嘅努力同汗水，我拎返應有嘅車錢點解要被為難？真係要貼錢打工？如果我有呢個下場，將來佢哋嘅其他員工亦會受到如此對待，同埋你點樣衡量$1075對唔同嘅人有幾重要？可能有人真係等住開飯呢？公司有義務claim嘅錢，就算$75都要claim㗎啦！
最賤係舊公司態度極差，期間我只係一個月打返去問一次，因為本身都忙到冇時間，但佢哋啲口吻真係不得了，個阿嬸隔住電話講呢句完全引爆咗我：「你成日打嚟唔煩㗎咩？有幾多錢呀？千零蚊啫，老細批咗自然會打畀你啦！好窮咩你？」
得，唔使講嘢！我直接去勞工處同埋小額錢債開file，估唔到拎返$1075要搞咁多嘢，我啖氣啃唔落。
佢哋應該收到小額錢債方面嘅通知，仲夠膽怒氣沖沖打嚟話我搞事，我問佢：「搞咩呀？你公司欠人錢就要還㗎啦！而家我錯呀？」
阿嬸：「你星期三上嚟拎，你知claim車錢不嬲出cash㗎啦，得星期三有時間招呼你。」
我以為返去最多受到不禮貌對待，例如啲人黑口黑面之類，點知個縮頭烏龜老細自己唔喺度，走去吩咐個阿嬸用啲小學雞手法報復，捧堆散銀畀我，全部係一蚊，話老細叫我數清數楚先好走，啱數就簽名confirm，叫我唔好搞小動作！
好嘢！好嘢！欠員工車錢半年唔找係你哋，態度惡劣又係你哋，而家用「神沙」小學雞報復嘅都係你哋，仲話我搞小動作？
你要玩吖嘛，我奉陪到底，我望一望啲神沙，撥兩撥啲一蚊銀，直接同佢講：「唔啱數喎，呢度唔夠好$1075，少咗一蚊，我數完㗎喇，一係你逐個數返畀我睇。」
阿嬸：「你玩嘢呀？」
我：「吓，唔啱數就叫玩嘢呀？一係你唔使數，我再上小額錢債，上網開埋你公司名，總之我一日認為唔啱數唔收，即係你公司一日仲欠我錢。」
阿嬸唔夠我玩，個腦又轉唔切，數得兩數發現唔係辨法，最終咪又係屈服，粒聲唔出咁行返出去會議室，然後拎住兩張500蚊紙，一張50蚊紙，死要執返個尾彩再數25個一蚊銀出嚟，就咁樣畀返$1075我。
垃圾公司，快啲執笠啦！