Tokyo Banana係好多人去日本必買嘅手信，但對於某啲人嚟講竟然係痛苦回憶，因為有讀者投稿表示，有一年同老婆去東京旅行，上飛機前喺成田機場買咗幾盒Tokyo Banana畀同事，點知返到公司畀老闆當眾揶揄冇新意，仲反問佢知唔知手信嘅意義係慰勞同事，又批評佢將手信擺喺pantry，冇親自派到所有人手上。
其實旅行買手信唔應該成為壓力，買同唔買，或者買啲咩都係個人選擇，今次YouTube影片探討咗東京駅2024年十大手信排行榜，全部以真實銷量作依歸，大家以後去東京除咗Tokyo Banana之外，絕對可以考慮呢啲最新同埋最受歡迎嘅手信，就算唔打算買畀同事，一樣可以買畀屋企人同埋朋友，順帶一提，Tokyo Banana大熱倒灶，並冇躋身東京駅銷量榜十大……乜而家真係唔興Tokyo Banana咩？
唔好以為淨係得遊客先會買手信，其實日本好多人係會特登去東京駅或者上野呢啲地方搜購，有啲意想不到？原因係日本地方大，而且每個地方嘅著名手信都唔一樣，例如北海道札幌最出名係白色戀人（白い恋人）、京都最hit就係八橋、福岡就係明太子製品……等等，由於日本人會送禮畀工作上嘅客戶，或者想寄畀家鄉嘅親朋好友，所以佢哋自己都好鍾意買手信，絕對唔係遊客專利。
我自己就認識一個日本人係喺東京任職手信公司，每朝9點有公司車佢去品川同埋東東京駅搶手信，冇錯，係搶！有啲熱門嘢或者限定嘢係會好快冇晒，而佢間公司只係將產品放上樂天同Amazon賣畀日本人，可想而知市場幾大。
不過潮流會變，喺2024年5月出爐嘅東京駅十大暢銷手信排行榜當中，並冇出現一啲港人遊日常買嘅大路牌子，即係手信店見得最多嘅New York Perfect Cheese、Tokyo Banana、東京ひよ子（好大隻雞嗰個）都不蹤影，不如睇下十大當中你對邊一款有印象：
1）サンドクッキー ヘーゼルナッツと紅桑子 – COCORIS
榛子和紅桑子三明治餅乾
2）メープルクッキー 詰め合わせ缶 – ザ・メープルマニア
楓糖餅乾綜合禮盒
3）グミッシェルBOX 6個セット 東京駅限定 – ヒトツブカンロ
果凍軟糖盒裝6個入 東京車站限定
4）クレームブリュレタルト 6個入り – 喫茶店に恋して。
焦糖布蕾塔 6個入
5）Calbee＋東京駅店なら奈じゃがボルダ 黄金コンソメ味 – じゃがボルダ
Calbee＋東京車站限定 黃金洋芋片濃湯口味
6）メープル カステイラ – nuevo by BUNMEIDO
楓糖蛋糕
7）フィナンシェ「カマンベール&レモン」 – THE DROS
費南雪「卡門貝爾奶酪和檸檬」
8）チーズケーキサンド – Snow on Cheese「Hello, Tokyo Station！」
起司蛋糕三明治 – Snow on Cheese
9）フレンチトーストフィナンシェ バニラ&ミルク – Ivorish
法式吐司費南雪 香草牛奶
10）広尾のビスティーヌ アソート 8個入り – BURDIGALA TOKYO
広尾餅乾禮盒 8個入 – BURDIGALA TOKYO
影片第1:10秒，同事Sara手上呢款榛子和紅桑子三明治餅乾 – COCORIS，係東京駅長期No.1嘅手信，就算係21年同埋22年受疫情影響，仍然喺國內賣出好多，當然啦，而家多返旅客，數字就更加一直突破。
影片第3:25秒，呢個金色鐵罐嘅楓糖餅乾綜合禮盒就係東京駅第二暢銷手信。
影片第6分鐘，男同事天佑手上嘅焦糖布蕾塔 6個入- 喫茶店に恋して喺東京駅手信排行榜位列第4，由於設計到好似本書一樣，所以非常受歡迎，佢亦係我哋拍片當日最多人排隊買嘅手信。
排第7嘅費南雪「卡門貝爾奶酪和檸檬」雖然喺影片裡面得唔到我哋同事嘅青睞，不過佢都喺排行榜當中名列第7，同事唔揀佢嘅原因係得5塊太少，返公司派畀人會唔夠。
同事Lotty介紹嘅広尾餅乾禮盒 8個入 – BURDIGALA TOKYO，打開之後感覺好高級，雖然只係僅僅打入第10位，不過可以喺東京駅上榜，可想而知絕對唔簡單，然後我發覺原來好多女仔都鍾意佢裡面一款開心果味，睇嚟送畀女同事一流！
撤開排名，4位日本同事嘅選擇已經顯示咗喺左下角，如果你下次嚟東京旅行想買手信，不妨參考下佢哋嘅意見吖！
【2024最新】日本手信十大東京駅人気手土産第一位連續多年No.1
