不為人知的秘密 已婚男另外租樓有私竇

我嘅行業係Banking and Finance,要追數,搵到錢,但份工壓力好大,有時難免會帶咗啲情緒返屋企。

其實做咗爸爸之後,我已經冇後生嘅時候咁火爆,好少同老婆鬧交,因為我知佢要湊住個仔都好辛苦,某程度上「媽咪」呢份工作係有返工冇放工,365日全天候on duty,而家個仔大個咗雖然冇BB嗰陣咁困身,但細路仔唔同階段就有唔同階段嘅顧慮,所以老婆一啲都唔輕鬆。

我份工同老婆「份工」係兩種唔同嘅辛苦,我冇得向住同事或者客戶發脾氣,加上經理捽起數上嚟有時講嘢好難聽,亦非常橫蠻,嗰種壓力同抑鬱真係冇渠道可以宣洩,甚至係冇時間冇空間去宣洩,因為放工返到屋企之後,已經唔似以前單身寡仔咁樣,鍾意攤喺度唔郁就唔郁,鍾意打機就打機,始終都有做老公同埋做爸爸嘅責任,工作同家庭之間每日不斷轉換場景,難免會唞唔到氣。

唔怕老實講,上年捽數捽得最勁嗰期,日日畀客屌畀經理屌,返到屋企又要即刻平靜,我曾經想去睇心理醫生。

最後我冇睇心理醫生,反而喺屋企附近租咗個舊樓嘅單位,百幾呎,5800蚊租,呢個租金我消化到,一直消化唔到嘅只係生活壓力,所以好需要呢個小天地。

上手住客留低床架,但冇床褥,我特登唔買,驚喺度瞓著,而佢本身仲有張舊梳化,另外有個入牆櫃,跟住就乜都冇喇,其實咁樣正合心意,因為有一張梳化就夠晒,另外我有申請電,至於煤氣同埋水我就唔需要,不過唔知點解入嚟住左咁耐都仲有水,其實我唔會用,唔會喺度沖涼亦唔會喺度煮食,我只係需要電,因為我要燈同埋冷氣。

冷氣係業主原有,少少虧但ok㗎喇。

每個星期我會嚟二至三晚,試過有一個星期嚟足五晚,通常都係嗰日工作好辛苦或者有挫折,壓力好大先至會嚟,咁你應該想像到我份工有幾咁惡頂。

一個男人加一張梳化可以喺度做啲乜?其實我每次放工淨係嚟玩電話玩iPad,就咁上網無目的地睇嘢同埋玩下game,極其無聊,不過就令到我可以好放鬆,釋放晒啲壞情緒先至返屋企。

特登租屋企附近,除咗有咩事可以即刻返去之外,亦因為我係偷時間嚟,一般我會同老婆講OT,然後竄上嚟玩電話玩個零鐘,視乎當日真實放幾點,有幾多時間淨,我唔想超過10點返自己屋企,因為想喺個仔臨瞓前見下佢,同佢傾下計。

星期六日或者放假我好少上「第二個家」,因為放假就陪老婆同個仔。

呢個小天地冇朋友知,冇同事知,連我最close嘅豬朋狗友同細佬妹都唔知,係100%嘅私竇。

有時我攤喺張梳化玩手提電話玩iPad望住個窗(雖然冇景),我會自己笑咗出嚟,都話有需要睇心理醫生㗎啦!不過真係好放鬆。澄清一件事,我笑唔係因為唔愛我老婆,相反地,因為愛佢,所以更需要呢個地方畀自己作出小小調整先返去。

曾經有一段時間都覺得自己租個私竇喺度孤獨hea好怪,但諗深一層,好多同事都會晚晚出去飲嘢食飯,同其他朋友玩同呻先返屋企,只係我唔鍾意去人多嘅地方,因為太嘈嘅環境反而會精神緊張,同人呻又要解釋一大輪,聽人呻又多咗其他嘢諗,我只係想靜靜地冇人煩自己啫,況且我班銀行朋友每星期都有兩三晚飲嘢食飯,平均都幾嚿水一次,埋單每月使費未必會平過我租而家呢度。

其實每個人都需要搵渠道、空間、時間,去釋放工作、家庭,同埋生活嘅種種壓力,只係大家用嘅方式唔同。

喺呢個百幾呎嘅小天地,我好似返到以前做仔嗰陣咁,唔係任何人嘅老公,唔係任何人嘅爸爸,喺呢度我單身一個人,真心舒服。

投稿讀者:L先生

error: