日本開放畀旅客之後，好快已經有朋友嚟探我……講笑啫，呢個friend主要當然係旅行啦，順便搵我食飯咁解，不過短短4日都同佢食咗4餐飯，重點係4餐都食松屋，呢個數字已經超越我之前咁多次嚟日本嘅總和。
朋友唔係松屋迷，佢只係想慳錢，一個牛肉飯¥380（附圖），最新嘅兌換率即係HKD 20，松屋仲要係熱辣辣堂食有水有綠茶免費任斟任飲，早幾日東京得十幾度，行入去撳飛畀錢就有得食，簡單過你去便利店買嘢返酒店叮。
之前有個日本電視台搵咗啲人上節目試牛肉飯，唔開名預備定幾碟喺度，睇下參加者食唔食得出來自邊間食店，有個日本藝人試完其中一碟之後就話：「呢碟肯定係松屋！好肯定！」
呢個日本藝人答啱咗，主持人問佢點解咁犀利嘅時候，個藝人咁答：「有一排我冇工開冇嘢拍，因為冇收入所以日日都食松屋，食咗一段頗長嘅時間，所以我到而家都仲好記得松屋嘅牛肉飯係咩味道。」
松屋的味道，唔知你仲記唔記得，不過我連續食咗4晚之後，而家都記得好清楚。
第一日同呢個朋友食松屋，係因為佢指定要去食，第二日同呢個朋友食松屋，係咁啱經過，佢話再食，畢竟松屋實在太多分店，淨係計我住嗰頭，兩邊馬路前後200步之內已經有兩間，其中一間近JR嘅keep住客滿，平日都好多上班族喺度食。
第三日食松屋，我喺門口提議帶佢食其他嘢，再mention一句：「我請！」朋友回我：「請咩吖，個個嚟旅行都要你請食飯，你咪好唔得閒，得啦，松屋冇問題呀！」然後我就同佢食咗第三餐松屋，據我所知，朋友好似lunch都係食松屋，對佢嚟講已經唔止三餐。
一不離二，三不離四，第四晚又經過松屋（分店多到呢），我哋本身講好咗去食壽司，但係佢停留咗喺門口個價錢牌前面，望住個¥380牛肉飯自己講嘢：「松屋抵喎！除咗牛肉飯仲有咖哩，又有豚肉。」結果佢入到去又係撳咗¥380牛肉飯。
最緊要佢食得開心自在，既然佢唔肯畀我請佢食其他嘢，咁就捨命陪君子囉！
不過我又唔可以用窮遊日本去形容呢個朋友，事關佢除咗食同酒店之外，其他方面係一啲都唔慳。
朋友今次嚟日本嘅主要目的係睇地下樂團嘅band show，佢買飛買碟買音樂器材係一擲千金，其實呢方面我都好理解，因為我見過有人餐餐食三文治，然後買好多潮牌，件件衫都好貴，冇牌子絕對唔會著上身。
我又見過另一個相反嘅例子發生喺舊同事身上，就係一件tee著到穿窿同黃晒都唔買新衫，但佢幾乎食盡全香港嘅米芝蓮餐廳，嗰位舊同事講過：「啲衫洗多幾次都會殘啦，款式仲會out，幾百蚊買件衫好唔抵，食咗落肚就唔同，我知，佢哋話食完之後都係屙出嚟吖嘛，不過我寧願將啲錢用嚟食好嘢。」
每個人對於用錢嘅準則同取捨都唔同，最緊要自己舒服，正如有人為供樓而不惜降低生活質素，亦有人唔願意降低生活質素而一直選擇唔買樓，雖然呢類銀碼係大好多，不過邏輯都係同食松屋將啲錢留去睇band show買CD一樣，開心就好。
其實去日本旅行想食得平都仲有好多方法，首先東京雖然物價相對於其他日本城市貴，但係隨住日圓不斷創新低，執筆之時¥1000兌換港紙都係HKD 52.77，食嘢買嘢已經抵咗好多，普遍餐廳都係¥800至¥1000成個set，我之前住屋村嘅茶記都唔得，晚餐起碼HKD 70起跳，都唔好計油尖旺或者商業區，所以嚟日本旅行食得正正常常都唔會花費太多，比例上其實交通費先係比較貴。
早排有日本電視節目介紹我屋企樓下間扒房，食高級和牛飲紅酒，網上booking起碼要一個月前訂位，入面嘅環境媲美香港頂級酒店嘅餐廳，講緊都係¥8000至¥9000一位，望落好似好貴，但計返都係大約四百幾港紙。
如果你可以晏啲先食晚餐，東京嘅超市其實夜晚7至8點就有好多食物減價，例如蛋包飯、炒麵、大大條燒玉子、大大塊雞扒、沙律、餃子，講緊都係百幾yen至三四百yen，成盒刺身會由千幾yen減到四五百yen，而且超市一般會好似便利店咁有埋微波爐，叮完拎返酒店慢慢食仲得。
唔好忘記喎，日本時差係快香港一個鐘，換言之減價時段都只係香港時間7至8點，所以大家嚟旅行想食平啲仲有好多選擇，松屋係好，但係難得飛過嚟，咪當試多啲唔同嘅食物囉！
個人認為喺日本最唔抵係食居酒屋（當地人放工飲酒傾計就另計），特別係磯丸嗰類，呢啲居酒屋埋單通常最貴，一碟一碟你真係唔覺，兩個人食好多時都¥5000至¥8000又唔知食咗啲乜，但係呢類連鎖居酒屋勝在有部pad畀你自己落單，又有中文英文，對遊客嚟講係免除咗唔識睇唔識叫嘅尷尬，不過有得呢啲pad，擺明就係做遊客生意啦！
我喺松屋叫到放題咁🙈，IG有相
https://www.instagram.com/p/Cjuiihfr_4m/?igshid=NDc0ODY0MjQ=