「唔好意思……想問下，如果我帶個女返公司得唔得？我家姐返早更，四點幾可以過嚟接小朋友走，不過唔得都唔緊要㗎！」
Ellen係一位單親媽媽，冇問佢其他detail嘅家庭狀況例如有冇老人家睇住小朋友，始終呢個係佢私隱，冇必要向我呢個老細或者公司交代，今次佢戰戰競競問可唔可以帶個女返公司，我一口就答應。
其實公司呢排都會開放WFH畀同事，不過有啲嘢真係要返office處理，所以佢哋一般嘅做法就係每星期有兩至三日work from home，其餘一兩日會返嚟，眾所周知，政府早前又要幼稚園停課，所以Ellen苦無辦法之下先要帶個女返公司。
我都識得一個單親媽媽好靚，睇返啲舊相，佢後生嘅時候好鍾意唱歌，20歲仲走去玩新秀，可惜冇入圍，嗰屆冠軍係杜德偉，同屆仲有周慧敏；22歲結婚，睇婚紗相真係一個大美人，同年生咗小朋友；25歲因為畀老公家暴，最終離婚成為單親媽媽，聽講佢當年乜嘢都唔要，淨係要個仔嘅撫養權，結果一個女人每日返兩份工，死慳死抵湊大個小朋友，供到佢讀大學，呢種艱苦嘅生活維持咗十幾年，佢就係我媽媽，我都係單親家庭長大。
細細個嘅時候，媽媽帶過我返佢公司，因為我哋真係冇人冇物，親戚都唔多個，冇人得閒睇住塞豆窿咁大嘅我，嗰個年代電腦未算普及，亦唔係教學必需品，屋企環境更加冇遊戲機呢啲嘢，所以我去到媽媽公司真係齋坐做功課同埋玩手指，記得佢啲姨姨叔叔同事仲對我好好。
大個之後，我開始做暑期工，再大啲就正式投入社會工作，屋企嘅經濟狀況亦已經大大舒緩，而由於家庭環境因素，導致我一直奉行謹慎理財，印象中每次出糧就會分開兩筆錢嚟儲，一筆係用嚟創業，一筆係旅行基金，因為我知道媽媽好想去旅行，可惜後生嗰陣掛住搵食冇機會。
聽返媽媽講，老豆喺我小學嘅時候曾經要求復合，不過媽媽唔肯，佢話打女人嘅男人絕對唔可以原諒，果然夠倔強，仲遺傳落我身上，因為我喺事業上都好倔強，30歲嗰陣開咗間IT公司創業，托賴生意唔錯，做老闆事小，最希望畀阿媽享下清福，佢辛苦咗大半世人，我希望佢抖下，做啲自己鍾意嘅事。
有時我會諗返轉頭，如果媽媽當年個老細唔畀佢帶我返公司，又或者佢啲同事好排斥，嗰陣嘅日子一定更難捱，好在冇咋！所以我員工Ellen提出帶個女返office，我二話不說就OK，坐到六點都得，唔一定要中途搵人接走。
話時話而家啲小朋友真係幾慘，兩歲嘅Pre-Nursery（好似係叫N班）都要用zoom上堂，有冇咁chur呀？不過睇住Ellen同佢個女喺公司排排坐，真係令我諗起細個跟媽媽返工嘅日子。
大道理我冇，感動嘅故事亦欠奉，只係想藉此講一聲：「願所有單親媽媽，都擁有自己想要嘅人生。」希望疫情快啲過去，我好想帶媽媽去旅行。