離職原因超爆笑 第一日返工就遲到

話說,我公司請人,收到其中一份CV覺得幾啱,咁就約個candidate見工啦(以下稱A先生),不過對方喺電話度扭扭擰擰,問可唔可以3個星期之後先至嚟interview,點樣等你3個星期呀?唔通hold起其他人唔見?定係見完其他人遲遲唔做決定等埋你呀?

我:「你如果想見真係要抽時間上嚟喎。」

A先生:「我知呀,不過我公司喺你公司樓下,怕尷尬。」

其實我唔知佢公司喺我公司樓下,因為冇特登睇過大廈水牌,而且以同類型公司嚟講,我哋係比較大,A先生呢間就比較細,唔算出名,不過睇到份resume講嘅工作內容係match嘅,點講都好啦,3個星期後先interview搞唔掂喎!

我:「有咩咁尷尬?唔係要教你吞pop,講真大家咁近,你行開行埋嚟in都得啦,最多咪in半個鐘,一係你send定啲cert畀我,咁上嚟interview嗰陣就唔使拎任何嘢,你o唔ok?」開晒方便門啦!

A先生:「我唔係指呢樣呀,我指嘅尷尬係如果你哋唔請我,將來搭lift撞口撞面好瘀。」

我:「瘀?瘀咩?你話已經resign,只係做多3個星期,你都係因為咁先想推遲見工之嘛,就當我哋唔請,你瘀得幾耐啫,咪又係3個星期,搭lift一定撞見㗎咩,何況見工一係請一係唔請,點解要覺得瘀?」

A先生:「都瘀㗎,好啦好啦,我上嚟見啦!」

咩料呀!CV係你send嚟,又要扭扭擰擰,見工唔請都話驚瘀,你係咪有偶像包袱呀?但我又冇理由講咗咁耐先叫佢唔使上嚟見,唉,算啦,照見啦!

同A先生interview嘅過程真係麻麻,因為佢太緊張,好多時問非所答,唔係對佢先入為主,A先生真係嗰種你問佢食咩,佢答你凍華田,你問佢飲咩,佢答你埋單畀八達通,溝通上有一定難度。

算喇,見完唔請最大原因係佢嘅reason for leaving……

我:「即係咁,你填現職嘅reason for leaving係因為離家太遠……離家太遠喎,我公司喺20樓,你公司喺7樓,同一棟大廈,咁會唔會我哋公司離你家更遠呢?話晒都高咗幾層……」我覺得超爆笑,但角色上又好無奈,究竟我in緊一個咩人?

A先生:「哦,我都係求其填啫,呢個唔使理。」

欽敬欽敬,法官大人,我冇嘢問喇。

其實我打從心底裡覺得有少少可惜,因為A先生嘅緣故,我了解到佢公司原來同我哋做嘅嘢係相似,但唔知咩事,隔咗兩日又收到呢間公司嘅人send CV嚟(以下稱B先生),橫掂已經有啲了解,約埋啦!

我:「想約你見工,不過你公司好似喺我哋樓下,方唔方便?」

B先生:「唔會,點會呢,多謝你畀機會我interview就真。」

終於有返個正常人。

從Interview所見,B先生嘅談吐同表現係正常發揮好多,甚至比起其他嘅candidate更好,畢竟兩間公司相類似,match到係非常合理,我亦知道A, B先生呢間公司最近出現離職潮,因為佢哋老細喺市道差嘅時候要求全體減薪,一減就一年,又反口冇加返,所以A, B先生就差唔多時候resign,好在B先生嘅離職原因唔係離家太遠。

不過請咗B先生之後,佢第一日返工就遲到30分鐘,第一日喎,不如你估下佢點解遲30分鐘。

B先生:「唔好意思唔好意思,頭先返工慣咗撳7樓出lift,仲推門返咗舊公司。」

我:「……」

B先生:「舊公司始終做咗5年,太習慣,5年都行同一條路,掛住聽歌傻下傻下撳錯lift入錯舊公司。」

我:「咁你即刻出返嚟咪得囉,都唔使遲半個鐘,你dept head頭先問個新人係咪甩底。」

B先生:「Sorry呀,我一入去已經覺得唔對路,明明返新工,點解啲同事全部都熟口熟面嘅,想走又唔知點算,其他人已經走埋嚟話我已經辭咗職,點解仲返嚟舊公司,就係咁,我畀佢哋纏住傾咗好耐,仲爆埋自己而家喺樓上返工,總之下次唔會㗎喇,我會準時。」

呢段文我唔識埋尾,因為我有少少頭暈,學古天樂話齋,唔講喇,完。


離職原因可以參考呢到 👇
https://hkofficedaily.com/?p=669

error: