上星期隔籬team嘅Doris戴咗隻鑽戒返嚟，幾個女同事喺pantry圍住Doris研究，有人話好羨慕，有人話好靚，一批女同事走咗，又有幾個女同事入嚟，個個都focus住Doris隻鑽戒，又話要摸又話要試戴。
Doris興高采烈咁講男朋友點樣向自己求婚，期間有人叫我一齊估粒鑽石幾多卡，又問我覺唔覺得好大好靚？我只係禮貌地笑笑，簡單答咗句：「靚呀！」跟住就冇參與話題，沖完杯咖啡準備返埋位做嘢，離開pantry之前見到Doris藐咗我一眼，佢可能覺得我冇禮貌同太冷淡。
大家返埋位之後，身邊幾個八婆同事已經喺度討論：「其實Doris隻戒指勁肉酸囉！唔係粒石大就一定靚嘅！」
「咪係囉，求婚戒指點會戴出街㗎！呢啲收埋㗎嘛，戴返公司晒命。」
「佢頭先話男朋友喺餐廳跪低求婚，痴線！好老土呀救命！」
「你有冇見過佢男友個樣先，成面暗瘡㗎，又矮！」
然後又有同事問我點睇，我依然冇參與，輕輕帶過話冇為意。其實喺Doris面前唔多出聲，又冇同班八婆同事一齊喺背後踩人，並唔係因為我唔合群、唔抵得、冇禮貌，而係我唔想做人做到咁假，見人講人話，見鬼講鬼話。
開會，老細對新product雄心壯志，不斷吹噓公司前景點好點好，幾個old seafood拍晒手話一定掂，跟住輪到幾個擦鞋仔應聲附和，老細見我冇咩反應，淨係對住我一個講：「你都要勤力啲，學下其他同事咁積極同主動。」我點頭表示明白。
開完會，一個唔包括老細在內嘅同事WhatsApp group熱烈討論：「白痴！咁都話新product，人哋公司一早有啦，你自己出得遲啫！」
「妖，講到就嚟要上市咁，收皮啦！加人工先講啦！」
「講起加人工，今年個bonus真係……當我哋乞兒呀？」
其實我開會時冇附和，開完會又冇一齊踩公司踩老細，並唔係因為我唔認真、唔主動、唔積極，而係我唔想做人做到咁假，見人講人話，見鬼講鬼話。
曾經有同事話我知，receptionist話我着啲衫好寒酸，手袋又唔知咩牌子；另外有同事cap過WhatsApp截圖我睇，原來有人喺背後講我朝朝搭正九點返工做壞規矩，搞到其他人遲到會好礙眼。
冇諗過自己着咩衫、用咩手袋、返幾點鐘，原來都會踩親人哋條尾，但我知道自己如果唔慎言，隨時又會畀同事唱或者cap圖周圍傳，所以我喺公司選擇安靜，唔奉承任何人，亦唔bad mouth任何人。
之前做Appraisal，阿姐話我嘅缺點係唔多出聲，喺office太沉默，所以畀人一種唔合群嘅感覺，我聽完笑而不語。
其實我放工之後同朋友一齊係好多嘢講，好多意見，好鍾意講笑，我本性並唔沉默，只係選擇喺office沉默，份工對我嚟講最大嘅意義就係賺錢，所以準時放工同埋準時出糧就夠，唔想喺公司呢個是非之地捲入任何麻煩當中，我嘅朋友同埋大世界喺出面。